Փաստ ինֆո

Իմ անձնական կարծիքով՝ իշխանությունն այսօր տեղեկատվական դաշտում նախապատրաստական աշխատանք է տանում տխրահռչակ «խաղաղության» դարաշրջանի տապալման համար, որպեսզի պատասխանատվություն չկրի իր արածների պատճառով: Իրենք ասում են՝ մենք չենք երաշխավորում, որ խաղաղություն կլինի, բայց մեկ է՝ գնալու ենք այդ ճանապարհով, սա աբսուրդ է, չգիտեմ՝ էլ ինչ պետք է հորինեն՝ այս թեզն արդարացնելու համար: «Փաստինֆո»-ի հետ զրույցում հայտարարել է ԲՀԿ քաղխորհրդի անդամ Արման Աբովյանը՝ անդրադառնալով Նիկոլ Փաշինյանի երեկվա հայտարարությանն առ այն, թե ոչ ոք չի կարող երաշխիք տալ, որ իրենց իշխանության սկսած խաղաղության օրակարգը հաջողություն կունենա:

Ըստ Աբովյանի՝այն քաղաքականությունը, որ գործող իշխանությունը վարում է՝ սկսած «խաղաղության դարաշրջանից», լիովին համապատասխանում է թուրք-ադրբեջանական ոհմակի հետաքրքրություններին:

Նրա համոզմամբ՝ իշխանության որդեգրած խաղաղության կոնցեպտը բերելու է նորանոր կորուստների և արհավիրքների.

«Խաղաղության դարաշրջանը ենթադրում է Հայաստանի և Արցախի կենսական շահերի հատում, մի բան է՝ երբ այս իշխանությունն ամեն բան հանձնում է՝ ակնկալելով, որ մեզ չեն կոտորի, ինչը տիեզերական միամտություն է, հիմա էլ գնում է գործընթաց, որ արդարացնեն ոչ միայն այն արհավիրքը, որի մեջ մտցրել են երկիրը, այլ արդարացնեն նաև նորանոր պարտությունները, մեզ նախապատրաստում են նրան, որ ծայրից ծայր պետք է հանձնենք մեր ազգային, պետական, տնտեսական բոլոր շահերը, ինչի դիմաց կարող է մեզ չի կոտորեն, բայց սրանում անգամ իրենք համոզված չեն»,-ասաց Աբովյանը:

Նշենք նաև, որ երեկ հերթական անգամ Նիկոլ Փաշինյանը բանակցային գործընթացի տապալման և պատերազմում պարտության մեջ մեղադրել են նախկին իշխանություններին՝ հայտարարելով, թե նախկին իշխանություններ են հանձնել Արցախը, իսկ ինքը բանակցային վատ ժառանգություն է ստացել:

Արմեն Աբովյանը նկատում է՝ Փաշինյանը փորձում է Արցախի բանակցությունների ողջ ընթացքը ներկայացնել այնպես, ինչպես իրեն ձեռնտու է։

«Մի կողմից ասում են՝ զրոյական կետից են սկսում բանակցությունները, այսինքն՝ բանակցային ողջ ժառանգությունը դնում են մի կողմ, հետո ասում են՝ նախկիններն են մեղավոր: Հիմա իրենք ի՞նչ են ուզում ասել, որ 30 տարվա ընթացքում նախկիններն ինչ կա-չկա հանձնել են, բայց Ադրբեջանը չի՞ ուզել վերցնի, սպասել է՝ երբ իրենք կգան, որ վերցնի, այնքան անհեթեթ է սա:Ոչ մի դեպքում չեմ ցանկանում նախկիններին կամ ներկաներին արդարացնել, բայց հարց է ծագում, եթե նախկինները տվել են, բա թուրքերն ինչո՞ւ չեն վերցրել»,-ասաց Աբովյանը:

Զրուցակիցն անընդունելի է համարում, երբ իշխանություններն իրենց շարունակական պարտությունները փորձում են վերագրել այս կամ այն իրավիճակի.
«Ի վերջո, իրենք են եղել իշխանության և իրենք են պատասխանատվություն կրում: Ենթադրենք իրավիճակն իրոք ծանր էր, ինչու՞ Փաշինյանը չկանգնեց ու ասեց՝ ժողովուրդը իրավիճակն այսպես է, աբսուրդ է այս ամենը»,-նշեց Աբովյանը:

Աղբյուր` Փաստինֆո