Փաստ ինֆո

44 օրյա պատերազմի ժամանակ զոհված զինծառայողների հարազատներն իրենց վրանները տեղափոխել են Ազատության հրապարակ՝ վստահեցնելով շարունակելու են պայքարը, քանի դեռ Նիկոլ Փաշինյանը չի կալանավորվել։

«Մենք հենց առաջին օրվանից էլ այստեղ ենք եղել՝ Ազատության հրապարակում, մեր վրանն այստեղ է եղել։ Ուղղակի, որպեսզի նույն ժողովուրդը երկու տեղ չկիսվի, տեղափոխվեցինք Ֆրանսիայի։ Մեզ համար պայքարը չի ավարտվել։ Պայքարելու ենք մինչև վերջ, այնքան, մինչև մեր երեխաներին սպանողները, հատկապես ստանա Նիկոլը կպատժվեն։ Մենք հետնահանջ չունենք»- «Փաստինֆո» լրատվականի հետ զրույցում ասում է նահատակված զինծառայող Էրիկ Եղիազարյանի հայրը՝ Էդուարդ Եղիազարյանը, ով այլ զոհված զինծառայողների ծնողների հետ միասին, շարունակում է վրանային պայքարն Ազատության հրապարակում։

Նրա խոսքերով՝ ընդհանուր առմամբ, ոչ մի կապ հավաքական ընդդիմության հետ իրենք չեն ունեցել. «Մենք մեր պայքարն ենք ունեցել, իրենք իրենցը։ Չգիտեմ իրենք ինչի համար էին պայքարում, երևի իշխանափոխության, մեր պայքարն ու պահանջը միշտ նույնն է եղել՝ պատժել մեր երեխաներին սպանողին՝ Փաշինյանին, որովհետև առաջին մեղավորը հենց ինքն է, հետն էլ՝ ինքը սատանա է։ Չնայած, մենք սկզբից էլ գիտեինք ու վստահ էինք, բայց ապրիլի 13-ին Ազգային Ժողովի իր ելույթում Փաշինյանը հաստատեց՝ ինքն է սպանել մեր երեխեքին և պետք է պատասխան տա»։

Ծնողները պահանջում են ձերբակալել Նիկոլ Փաշինյանին։ Էդուարդ Եղիազարյանը նկատում է՝ գործը Քննչական կոմիտեում է՝ Արգիշտի Քյարամյանի վերահսկողության ներքո, սակայն սա ծնողներին լուրջ դժգոհության առիթ է տվել.«Քյարամյանը մարդ կոչվելու իրավունք չունի։ Ինքը չի կարողանում մարդկանց մոտ իրեն որպես մարդ դրսևորի, որովհետև էդքան հասկացողություն չունի։ Հիմա ուզում ենք, որպեսզի մեր երեխեքի գործն իր մոտից տեղափոխեն ԱԱԾ։ Եթե չուզենան, մենք կստիպենք իրենց»,- ասում է նահատակված Էրիկ Եղիազարյանի հայրը։

Մանրամասները՝ տեսանյութում

Աղբյուր` Փաստինֆո