Փաստ ինֆո

Նիկոլ Փաշինյանն Արարատի մարզ այցի ընթացքում ծանոթացել էր ճանապարհի շինարարության ընթացքին, որն իրականացրել է ԱԺ նախագահի եղբոր ընկերությունը։

ՏԿԵ նախարար Գնել Սանոսյանը ԱԺ-ում տեղի ունեցած ճեպազրույցում պնդել է, թե Ալեն Սիմոնյանի եղոր ղեկավարած ընկերությունն ամենաքիչ գինն էր առաջարկել, ուստիեւ շահել մրցույթը։

«Դուք վերցրեք-նայեք` մրցույթը քանիսով էր հայտարարված, քանիսով է շահել, և գնացեք շնորհակալություն հայտնեք այդ ընկերությանը»,- ԱԺ-ում ճեպազրույցի ժամանակ ասաց Սանոսյանը պատասխանելով լրագրողների հարցին, թե ինչպես է ստացվում, որ պետական մրցույթում հաղթող է ճանաչվում հենց այն շինարարական ընկերությունը, որի տնօրենը ԱԺ նախագահի եղբայրն է, ընդամենը 500 հազար դրամ ցածր գին առաջարկելով։

«Մեր նախարարությունում կան գեղեցիկ սև աթոռներ, մարդիկ գալիս, նստում են այդտեղ, որը տեսաձայնագրվում է։ Դա կոչվում է մրցույթի բանակցային փուլ։ Ասում ենք, որ այս մրցույթի նախագիծն արժե 1.5 մլրդ դրամ, մասնակցել են 8 ընկերություններ, 8-ի փաստաթղթերն ստուգել ենք, դուք բավարարում եք պայմաններին, ուստի հիմա առաջարկում ենք բանակցել։ Այն ընկերությունը, որ բանակցության արդյունքում ամենացածր գինը կառաջարկի, կհամարվի հաղթող։

Մի ընկերություն ասում է` ես 1.5 մլրդ–ի փոխարեն կառաջարկեմ 1.4, մեկն ասում 1.350, իջնում, դառնում է, որ Ալեն Սիմոնյանի եղբոր ընկերությունն ամենացածր գինն է առաջարկում»,– ասաց Սանոսյանը, ապա սրբագրեց ինքն իրեն ճշտելով, որ Սիմոնյանի եղբայրը ընկերության տնօրենն է, սեփականատերն այլ անձնավորություն է` Արարատի մարզի բնակիչ, ով 2018-ի հեղափոխությունից հետո վերադարձել է Հայաստան ու մեծ ներդրում արել` ստեղծելով, իր բնորոշմամբ, Հայաստանի լավագույն ընկերություններից մեկը` ասֆալտի գործարանը ու պետք է նրան շնորհակալություն հայտնել։

Աղբյուր` Փաստինֆո