Փաստ ինֆո

Ի պատիվ ընդդիմադիր մեր որոշ գործընկերների սառնասրտության և իրավապահ մարմինների ճշգրիտ գործունեության, նաև մեր թիմի հետևողական մոտեցման՝ մենք միասնաբար, որպես ազգ, նորից դուրս ենք գալիս ճգնաժամային իրավիճակից: Խորհրդարանում լրագրողների հետ զրույցում ասել է ՔՊ-ական պատգամավոր Հովիկ Աղազարյանը:

Պատգամավորը համաձայն է այն թեզի հետ, որ պարտված ղեկավարը պետք է հեռանա, բայց պնդում է, որ իրենք չեն պարտվել կամ էլ պարտությունը միայն իրանց մեղքով չի եղել, հետևաբար, ըստ պատգամավորի, այդ թեզը չի աշխատում.

«Պետք է ամեն ինչ դատենք արդյունքով: Ընդդիմադիր մեր գործընկերներն անհանգստացած էին իշխանության կողմից վարվող քաղաքականությամբ, այդ անհանգստությամբ դուրս եկան ժողովրդին իրազեկելու, ժողովուրդը չանսաց, դա նշանակում է, որ ժողովուրդը վստահում է իշխանության վարած քաղաքականությանը»,-ասել է ՔՊ-ական պատգամավորը:

Խոսելով Արցախի հարցում իշխանությունների վարած քաղաքականության մասին՝ Աղազարյանն ասաց, թե իշխանությունների վարած քաղաքականության արդյունքում, որի հիմնական թեզն այն էր, որ պետք է տարանջատվի հայ-ադրբեջանական հարաբերությունների հարցը Արցախի ժողովրդի ինքնորոշման իրավունքի իրացման հարցից, այդ խնդիրը հաջողությամբ լուծվում է։

Լրագրողի հարցին՝ ինչո՞ւ Արցախի անկախության ճանաչման հարց չիքննարկվում ԱԺ-ում, Հովիկ Աղազարյան ասաց, այդ հարցը շատ նուրբ հարց է ու դրա պատասխանը տվել է Սերժ Սարգսյանը:

«Տեղյակ եք, անկասկած, այդ հարցի պատասխանին, որ ճանաչել Արցախի անկախությունը՝ նշանակում է պատերազմ հայտարարել Ադրբեջանին, երկրորդ՝ փակել բոլոր բանակցային դռները, միանշանակորեն կիսում եմ այդ տեսակետը», - ասաց նա:

Դիտարկմանը, թե մերժել են Սերժ Սարգսյանին՝ Աղազարյանն արձագանքեց. «Ի՞նչ է նշանակում մերժված Սերժ Սարգսյան, անձամբ ես նույն տեսակետին եմ»:

Աղբյուր` Փաստինֆո