Փաստ ինֆո

Դեմարկացիայի և դելիմիտացիայի արդյունքում Ադրբեջանին են հանձնվելու Բերձորը ու որոշ գյուղեր, մեծ է հավանականությունը, որ ոչ միայն Արցախից գյուղեր հանձնվեն, այլեւ՝ Հայաստանի երեք անկլավները եւս հանձնվեն, որոնցով ռազմավարական նշանակության կարևոր ճանապարհներ են անցնում: «Փաստինֆո»-ի հետ զրույցում հայտարարել է ռազմական փորձագետ Վան Համբարձումյանը:

Նրա փոխանցմամբ՝ անկլավներից մեկը Տավուշի մարզում է, մյուսը Տիգրանաշենն է, որտեղով ռազմավարական նշանակության կարևոր ճանապարհ է անցնում, Սյունիքից մինչև Մեղրի ու Ագարակ սնուցվում են այդ ճանապարհով, մյուսն էլ՝ Իջևան-Նոյեմբերյան հատվածում։

«Իմ տեղեկություններով՝ ադրբեջանական կողմը հիմա այս անկլավներն է ուզում, քննարկումներ են գնում սրանց շուրջ, բայց չգիտեմ՝ որոշում կա, թե՝ ոչ»,-ասաց փորձագետը:

Ավելի վաղ «Փաստինֆո»-ն գրել էր, որ Ադրբեջանը հայկական կողմի համար այլընտրանքային նոր ճանապարհ է կառուցում՝ Բերձորի ճանապարհի փոխարեն։ Ռազմական փորձագետ Հայկ Նահապետյանն մեզ հետ զրույցում համոզմունք էր հայտնել, նորակառույց, այլընտրանքային ճանապարհի հիմնական նպատակներից մեկը Բերձորի հարակից ստրատեգիկ խիստ կարևոր նշանակություն ունեցող մի քանի գյուղերի հայաթափումն է։

Մեզ հետ զրույցում Վան Համբարձումյանն ընդգծեց՝ Բերձորը Արցախն ու Հայաստանը կապող միակ ճանապարհն է, եթե այն հանձնվի Ադրբեջանին,Հայաստանը կորցնելու է կապն Արցախի հետ

«Կատաստրոֆա կլինի սա, բայց հիմա էլ այնպես չի, որ այդ ճանապարհը ամբողջությամբ հայկական վերահսկողության տակ է, ադրբեջանցինեի վերահսկողության տակ է Լաչին մտնող ճանապարհը, ուղղակի ռուս խաղաղապահներ են կանգնած, եթե ռուսները գնան, կփակեն ճանապարհը ու չեն թողնի անցնենք՝ ինչպես Գորիս-Կապան ճանապարհը»,-հավելեց զրուցակիցը:

Ինչ վերաբերում է Արցախում կառուցվող նոր այլընտրանքային ճանապարհին՝ փորձագետը նկատում է՝ այն գտնվում է ադրբեջանցիների ուղիղ նշանառության տակ, դա նշանակում է, որ ցանկության դեպքում կարող են հայկական մեքենաների վրա կրակել.

«Տաթևում էլ են իբրև այլընտրանքային ճանապարհ կառուցել, բայց բոլորս տեսանք՝ ինչ ճանապարհ էր դա, ընդհանրապես ճանապարհ չէր, դրա համար երբ ասում են այլընտրանքային ճանապարհ, չգիտես՝ այլընտրանքային ճանապարհ է լինելու, թե Տաթևի ճանապարհի նման ցածր անցողունակությամբ ճանապարհ, որտեղով երկու բեռնատար չեն կարողանալու անցնեն, ես չեմ պատկերացնում ոնց են մինչև հուլիսի 1-ը հասցնելու այդ ճանապարհը սարքել »,-ասաց Վան Համբարձումյանը

Փորձագետի արձանագրմամբ՝ անվտանգային շատ բարդ իրավիճակ է, ըստ էության, ոչ Լաչինի ճանապարհն է մերը, ոչ էլ նոր կառուցվելիք այլընտրանքային ճանապարհն ադրբեջանցիները թույլ կտան, որ ամբողջությամբ հայկական կողմի վերահսկողության տակ լինի. «Դա իրատեսական չէ, չեն թողելու ռազմական նշանակության բեռներ տեղափոխել Արցախ: Հիմա զորակոչ և զորացում է տեղի ունենում, վերջին զորացրվածների խումբը, որ եկավ, նոր զորացրվածների խումբ չեն թողնելու մտնի Արցախ, ճանապարհը իրենց վերահսկողության տակ է լինելու»,-ասաց զրուցակիցը:

Աղբյուր` Փաստինֆո