Փաստ ինֆո

Արցախում երեկ տեղացած կարկուտն առանձնապես մեծ վնասներ է հասցրել Մարտակերտի և Ասկերանի շրջանների դաշտերին ու այգիներին։ Կարկուտից ամենաշատը տուժել է Մարտակերտի վերին ենթաշրջանը. վնասի չափը տեղում գնահատելու համար երկու աշխատանքային խումբ է ուղարկվել՝ մեկը Հաթերքի, մյուսը՝ Վանքի ձորակ։ Այդ մասին «Փաստինֆո»-ի հետ զրույցում ասաց Մարտակերտի վարչակազմի աշխատակազմի ղեկավար Սերգեյ Հարությունյանը։

«Վարչակազմի ղեկավարի հանձնարարությամբ երկու խումբ է աշխատում տեղում։ Երեկոյան մոտ արդեն կունենանք արդյունքները, կիմանանք, թե որքան է վնասի չափը։ Նախնական տեղեկություններով՝ նաև տանիքներ են վնասվել»,-նշեց Հարությունյանը։

«Փաստինֆո»-ն կապ է հաստատել նաև Հաթերքի գյուղապետ Վարդան Գրիգորյանի հետ։ Վերջինիս փոխանցմամբ՝ ավելի շատ վնաս են հասցրել սելավն ու ուժեղ քամին, իսկ կարկուտը 3-4 օր առաջ է մեծ վնասներ պատճառել։

«Կարկուտ մեզ մոտ քիչ է տեղացել երեկ, բայց ուժեղ քամի ու սելավ է եղել, որից տանիքներ էլ են վնասվել, ճանապարհներն էլ։ Ջրահեռացման խողովակները փակվել են, հողի հոսքի տակ ասֆալտն էլ է տեղ-տեղ քանդվել։ Մի 3-4 օր առաջ էլ ահագին կարկուտ է տեղացել։ Էդ ժամանակ էլ բավականին շատ վնասներ են եղել․ օրինակ՝ 1 հա մակերեսով մի խնձորի այգի ունենք, որը լրիվությամբ ոչնչացվել է։ Հենց հիմա վարչակազմի ուղարկած խմբով գնում ենք դաշտերով, որ գնահատենք վնասի չափը»,-ասաց Հաթերքի գյուղապետը։

Ասկերանում վնասի չափը գնահատելու համար դեռ 2-3 օր կպահանջվի։ Վարչակազմի ղեկավարի տեղակալ Կարեն Աղաջանյանը «Փաստինֆո»-ին հայտնել է, որ առայժմ տարածքներն են ճշտում, որտեղ կարկուտը վնասներ է հասցրել։

«Նախնական տեղեկություններով՝ վնասը մեծ է Նախիջևանիկ, Իվանյան, Ասկերան, Խրամորթ, Խնապատ համայնքներում։ Քանի որ ցորենն ու գարին արդեն հասունացման փուլում են, ծառերն էլ արդեն պտուղ բռնած, բնականաբար, վնասը զգալի է լինելու։ Ջերմատներ էլ կան այդ տարածքներում․ հավանական է, որ դրանց ծածկերն էլ կլինեն վնասված։ Եթե բանջարաբոստանային կուլտուրաների մի մասը դեռ կարելի է վերականգնել, ապա ձմերուկի դաշտերը վերականգնելու տարբերակ չկա»,-«Փաստինֆո»-ի հետ զրույցում ասաց Աղաջանյանը։

Նախիջևանիկում հացահատիկի դաշտերը չեն վնասվել․ գյուղից դեպի Ասկերան քաղաք ընկած հատվածն էր բռնել կարկուտը, որտեղ միրգ ու բանջարեղեն են աճեցնում գյուղացիները։ Ինչպես «Փաստինֆո»-ի հետ զրույցում նշեց Նախիջևանիկի գյուղապետ Սևակ Պետրոսյանը, մոտ 15-20 րոպե ինտենսիվ տեղացած կարկուտը վնասել է հատկապես նռան և խաղողի այգիները։

Աղբյուր` Փաստինֆո