Փաստ ինֆո

Հեռուստացույցով հաճախ ենք հետեւել խորհրդարանի աշխատանքներին, սակայն բոլորովին այլ զգացում է Ազգային ժողովի դահլիճի օթյակից հետեւել, թե ինչպես են ընթանում օրենսդիրի աշխատանքները, զրուցել երկրի համար կարեւոր օրինագծեր մշակող պատգամավորների ու Կառավարության ներկայացուցիչների հետ, նրանց հարցեր ուղղել, նրանց հետ լուսանկարվել: Անկեղծացել են «Բաց դաս» ծրագրի շրջանակում խորհրդարան այցելած Արարատի մարզի Վեդի քաղաքի ավագ դպրոցի աշակերտները:

Նրանց հետ հանդիպել են «Քաղաքացիական պայմանագիր» խմբակցության պատգամավորներ Նարեկ Բաբայանը եւ Ծովինար Վարդանյանը:

Նարեկ Բաբայանն աշակերտներին ներկայացրել է խորհրդարանի եւ մշտական հանձնաժողովների կառուցվածքը, դրանց գործունեության ոլորտները, օրինագծերի մշակման ընթացակարգը։ Նա, առանձնացնելով հատկապես խորհրդարանական բարեկամական խմբերի դերակատարությունը, կարեւորվել է միջազգային հարթակներում պատգամավորների իրականացրած աշխատանքը՝ ի նպաստ Հայաստանի դիվանագիտության զարգացման։

Տնտեսական հարցերի մշտական հանձնաժողովի անդամ Ծովինար Վարդանյանն աշակերտների հետ զրուցել է ինքնակրթության մասին։ Պատգամավորի կարծիքով՝ շարունակաբար փոփոխվող տեխնոլոգիաների դարաշրջանում մասնագիտությանը լիարժեք տիրապետելու եւ հմտություններ ձեռք բերելու համար միայն բարձրագույն կրթությունը բավարար չէ: Նա ընդգծել է ինքնակրթության կարեւոր դերակատարությունն ու առկա հնարավորություններից գրագետ օգտվելու կարողությունը։

Նարեկ Բաբայանն էլ կարեւորել է մեդիագրագիտության դերը, ինչը կօգնի կողմնորոշվել տեղեկատվական դաշտում։

Վեդի քաղաքի ավագ դպրոցի աշակերտներին ամենաշատ հուզող հարցերի ոլորտը կրթությունն էր։ Անդրադառնալով կրթության ոլորտի ներկա բարեփոխումներին՝ պատգամավոր Նարեկ Բաբայանը խոսել է նոր դասագրքերի, ուսուցիչների վերապատրաստման եւ ատեստավորման մասին։ Խոսելով երիտասարդության շրջանում տարվող աշխատանքների մասին՝ նա տեղեկացրել է, որ մշակվում է երիտասարդական քաղաքականության հայեցակարգ։

Ծովինար Վարդանյանն էլ աշակերտների հետ խոսել է տնտեսության զարգացման, գնաճի կառավարման, ՀՆԱ-ի ցուցանիշների մասին, պարզաբանումներ տվել նրանց հուզող հարցերին։

Խորհրդարանը հյուրընկալել է նաեւ Երեւանի Գուրգեն Մահարու անվան 176 հիմնական դպրոցի աշակերտներին եւ ուսուցիչներին: Նրանց հետ հանդիպել է ԱԺ «Քաղաքացիական պայմանագիր» խմբակցության պատգամավոր, ռուսական համայնքի ներկայացուցիչ Ալեքսեյ Սանդիկովը։

«Ընտրական օրենսգրքի համաձայն՝ Ազգային ժողովում տեղեր են հատկացվում ազգային փոքրամասնությունների ներկայացուցիչներին»,- հանդիպման ժամանակ նշել է պատգամավորը՝ տեղեկացնելով, որ ութերորդ գումարման խորհրդարանում ներկայացված են նաեւ Հայաստանի 4 ամենամեծ՝ եզդիական, ռուսական, ասորական եւ քրդական համայնքների ներկայացուցիչները:

Նրա խոսքով՝ սա լավ հնարավորություն է օրենսդիր մարմնում ներկայացնելու ազգային համայնքների շահերը, անդրադառնալու կրթական, մշակութային եւ հոգեւոր հարցերի իրավական պաշտպանության ապահովման հարցերին:

Ալեքսեյ Սանդիկովի խոսքով՝ պատգամավոր լինելը պարտավորեցնող է եւ շատ պատասխանատու: Նա մանրամասնել է Ազգային ժողովի հիմնական գործառույթները, օրենքների ընդունման գործընթացը:

Պատգամավորը պատասխանել է հարցերի, որոնք վերաբերել են կրթության ոլորտի բարեփոխումներին, տնտեսության զարգացման խնդիրներին:

Պետության կողմից վարվող արտաքին քաղաքականության հարցերին անդրադառնալով՝ Ալեքսեյ Սանդիկովը նշել է, որ իշխող քաղաքական ուժն ընտրել է տարածաշրջանում խաղաղության հասնելու եւ տնտեսական զարգացման ճանապարհը, որը, ըստ նրա, շատ դժվար է:

Աղբյուր` Փաստինֆո