Փաստ ինֆո

Երեկ գիշեր Արթիկի Վետերանների շենքի լուսամուտը կոտրելով, ինչ – որ մարդիկ մտել են ներս, ավիրել են գույքը, ինչպես նաև՝ այրել այն պատը, որի վրա ամրացված են եղել 44 օրյա պատերազմի հերոսների լուսանկարները։ Հատկանշական է, որ տվյալ տարածքից իրեր չեն տարել, այսինքն, գողություն չի կատարվել։ Այսքանով հանդերձ, հստակ է, որ տարածք մուտք գործողները գողության նպատակ չեն ունեցել։ «Փաստինֆո»-ի հետ զրուցում հայտնել է հասարակական գործիչ, իրավապաշտպան Կարապետ Պողոսյանը՝ խոսելով նախօրեին Արթիկ քաղաքի Վետերանների շենքում բռնկված հրդեհի մասին ընթացքում այրվել է 44 օրյա պատերազմում նահատակված զինծառայողների նկարներով պատը։

Կարապետ Պողոսյանի փոխանցմամբ՝ միջադեպի մասին տեղեկանալուց անմիջապես հետո, գյումրեցի մի քանի լրագրողների և թիմակից ընկերների հետ այցելել են դեպքի վայր, սակայն, տարածք ներս մտնել չի հաջողվել, իրավապահ մարմինները թույլ չեն տվել՝ պատճառաբանելով, թե տեղում զննություն դեռևս կատարված չէ. «Առաջին վարկածը, որ առաջ քաշեց մեր այցելության պահին տեղում գտնվող ոստիկանը, այն էր, որ շինության ներսում հրդեհ է բռնկվել, սակայն դա, ուղղակի անհնար էր, որովհետև մենք հենց տեղում պարզեցինք, որ շենքը երկար ժամանակ պարտքի պատճառով հոսանքազրկված է եղել, այնտեղ, նույնիսկ, էլեկտրական հաշվիչ չի եղել։ Հետևաբար, հրդեհի վարկածն, ուղղակի, անհնար է դառնում։ Հետո ասեցին, թե հնարավոր է կայծակի հարվածից է եղել, բայց զարմանալին այն էր, որ սենյակի հենց կից հարևանությամբ գործող հատվածում, որը ծառայում է որպես երիտասարդական հավաքատեղի, կոտրված էր։ Ամենազարմանալին, սակայն, այն էր, որ այրված սենյակի պատին լատինատառ և անգրագետ հայերենով գրություն ու հայհոյանք կար։ Շատ զարմանալի էր՝ իսկ ինչո՞ւ հենց լատինատառ հայերենով և ոչ հայատառ։ Պատին գրված էր. «Ով դատի տա… շարունակությունը հայհոյանք էր»,- պատմում է Պողոսյանը։

Վերջինս մեղմ ասած, տարօրինակ է համարում պատին հայտնված լատինատառ գրության փաստը և հավելում՝ հաճախ համակարգչով մարդիկ լատինատառ են գրում, որովհետև հայատառը բացակայում է, բայց, երբ ձեռագրով պատին գրություն են անում, այն էլ՝ կիսագրագետ հայերենով և լատինատառ, ու այսպիսի հանգամանքներում, ապա, մեղմ ասած, կասկածներ է հարուցում. «Չի բացառվում, որ շենք ներխուժածներն ու հերոսների նկարներով պատն այրած մարդիկ ազգությամբ հայ չեն եղել, այլ թուրքեր կամ ադրբեջանցիներ, մանավանդ, որ արդեն հայտնի փաստ է՝ Արթիկում մեծ թվով թուրքեր, տեղի հայերի միջնորդությամբ հողատարածքներ և հանքեր են ձեռք բերել՝ ձեռ գցելով խիստ շահութաբեր համարվող հանքարդյունաբերության բիզնեսին։ Այսինքն, մեր այլազգի հարևանները, արդեն տևական ժամանակ է, ոչ միայն անարգելք մուտք ու ելք ունեն Արթիկ քաղաք, այլև անշարժ գույք են ձեռք բերում այնտեղ։ Բացի դրանից, վերջերս մի տարօրինակ դեպքի էլ ականատես եղանք, երբ Գյումրիում, հանկարծ, չգիտես ինչպես, սկսեց ադրբեջանական ռադիոհաճախականություն միանալ և ադրբեջաներեն լեզվով ռադիոալիք հայտնվեց։ Ես հրապարակային կերպով դիմեցի ԱԱԾ-ին, հորդորելով նախ՝ ուսումնասիրել ու պարզել՝ ինչպե՞ս դա կարող էր տեղի ունենալ, ինչպես նաև միջոցներ ձեռնարկեր, բայց, այդպես էլ ոչ մի արձագանք այդ կառույցից չստացա, միջոցներ ձեռք չառնվեցին»,- ասում է գյումրեցի հասարակական գործիչը։

Կարապետ Պողոսյանը նկատում է՝ Արթիկում, ինչպես նաև՝ Գյումրիում թուրքերի կամ ադրբեջանցիների ներկայության փաստն, ինչ խոսք, մտահոգիչ իրողություն է, որի հանգամանքները պետք է պարզել, ինչպես որ պետք է մինչև վերջ և փաստարկված կերպով պարզաբանել և հանրությանը տեղեկացնել, թե իրականում ի՞նչ հանգամանքներում և ինչպե՞ս է այրվել Արթիկի Վետերանների տան հենց այն պատը, որի վրա փակցված են եղել 44 օրյա պատերազմի զոհերի նկարները։

«Եթե սրան էլ հավելենք այն իրողությունը, որ, հատկապես, վերջին տարիներին մեր երկրում, չգիտես ում ձեռքով և ինչպես, պարբերաբար, պղծվում են մեր ազգային արժեքները՝ հերոսների հիշատակներն ու Եռաբլուրի շիրմաքարերը, ծեծվում են հայրենիքի պաշտպանության համար նահատակված հերոս տղաների ծնողները և այլն, ապա երևույթն, ինքնին, ավելի ու ավելի լուրջ քննարկման թեմա է դառնում, այն առումով, որ այստեղ ակնհայտ կերպով պարզ է դառնում՝ գործ ունենք սրբապիղծների և սրբապղծության համատարած դարձող երևույթի հետ»,- նշել է մեր զրուցակիցը։

Հարցին, ինչպե՞ս են հրդեհի միջադեպին արձագանքել տեղի իշխանությունները՝ Արթիկի քաղաքապետը, Շիրակի մարզպետարանը։ Կարապետ Պողոսյանի փոխանցմամբ՝ դեպքի վայրում հանդիպել է Արթիկի փոխքաղաքապետին, ով, կարծես, շահագրգռված էր բացահայտել միջադեպի իսկությունը։

Ինչ վերաբերում է մարզպետին, ապա՝ գործիչը հավելել է՝ առհասարակ այնքան անտարբեր է այդ անձի նկատմամբ, որ նույնիսկ, չի էլ հետաքրքրվել՝ արդյո՞ք տիկին Բաղդասարյանը որևէ կերպ արձագանքե՞լ է 44 օրյա հերոսների նկարներով այրված պատի միջադեպի առթիվ, թե՞ ոչ։ Ասում է՝ մարզպետարանի արձագանքներին ոճին էլ իրենք, ըստ էության, արդեն ծանոթ են, զորօրինակ՝ ամիսներ առաջ սեփական ձեռքի կոտրվածքի փաստը, որ, նույնպես, ինչ -որ միջադեպի առնչությամբ ի հայտ եկած խիստ յուրատիպ արձագանքի արդյունք էր։

Աղբյուր` Փաստինֆո