Փաստ ինֆո

Թուրքիայի ներկայիս իշխանությունների վարած քաղաքականության մեջ բավականին հակասություններ կան․ Էրդողանը մեկ ռուսներից Ս-400-ներ է ձեռք բերում, հետո Ռուսաստանի հետ խորհրդակցություններ անցկացնում՝ Արցախի հետ կապված, մեկ էլ փորձում է այնպիսի դիրք բռնել, որը ձեռնտու է ՆԱՏՕ-ին։ Էրդողանի վարած նման հակասական քաղաքականությունը դուր չի գալիս ո՛չ ՆԱՏՕ-ին, ո՛չ Ռուսաստանին։ Այդ մասին «Փաստինֆո»-ի հետ զրույցում ասաց թուրքագետ Մուշեղ Խուդավերդյանը՝ անդրադառնալով Թուրքիայի արտգործնախարար Չավուշօղլուի՝ օրերս արած հետևյալ հայտարարությունը, թե Ռուսաստանն ու ահաբեկչությունը հանդիսանում են ՆԱՏՕ-ի երկու գլխավոր սպառնալիքները»։

«Նման քաղաքականությունը բերելու է նրան, որ Էրդողանն իր ընտրազանգվածի մոտ կորցնելու է այն վստահությունը, որն ուներ առաջ։ Ի վերջո, Թուրքիան հանդիսանում է ՆԱՏՕ-ի անդամ երկիր և իր քաղաքականության շատ ասպեկտներ պետք է համաձայնեցնի ՆԱՏՕ-ի շահերին, բայց վերջերս Էրդողանը հայտարարեց, որ վետո է դնելու Շվեդիայի և Ֆինլանդիայի՝ ՆԱՏՕ-ի անդամակցության վրա։ Այս ամենն ավելի է թեժացնելու էրդողանի թիմակիցների և գյուլենականների միջև պայքարը, և Թուրքիայում սպասվող ընտրությունները ցույց կտան, թե ինչքանով է ընկել Էրդողանի վարկանիշը։ Այն, որ բավականին անկում է գրանցվել, ակնառու է»,-ասաց Խուդավերդյանը։

Թուրքագետի դիտարկմամբ՝ վերջին տարիներին Էրդողանը փորձում է քաղաքական հավասարակշռություն ստեղծել Թուրքիայի վարած քաղաքականության մեջ՝ մասնավորապես Ռուսաստանի հետ հարաբերություններում։ Ստեղծված աշխարհաքաղաքական իրավիճակում Թուրքիայի երկակի խաղը, Խուդավերդյանի համոզմամբ, երկար չի կարող հանդուրժվել։

«Վերջին տարիներին Էրդողանն այնպիսի քաղաքականություն է վարում, որ Ռուսաստանի դեմ բացահայտ թշնամանքը չնկատվի։ 2011-ին, երբ Էրդողանին հանձնարարվեց մտնել Սիրիա, Պուտինը հայտարարեց, որ եթե թուրքական զորքերը մտնեն Սիրիա, ապա ռուսները կհամարեն, որ նրանք մտել են Մոսկվա։ Դրանից հետո Էրդողանն այլևս ակնհայտ հակառուսական քայլեր չարեց և փորձում էր վարել այնպիսի քաղաքականություն, որ ՌԴ-ին բացահայտ չհակասի։ Բայց այդ երկակի քաղաքականությունը երկար չի կարող տևել․ նրանից պահանջելու են հստակ դիրք բռնել»,-նշեց թուրքագետը։

Խուդավերդյանի համոզմամբ՝ Էրդողանի վարչակարգը ներկայումս փորձում է Ռուսաստանի հետ միասին Հարավային Կովկասում վարել այնպիսի քաղաքականություն, որը կշրջանցի Արևմուտքին։ Տարածաշրջանային հարցերն առանձին լուծելու Էրդողանի մտադրությունը, թուրքագետի կանխատեսմամբ, միայն կարագացնեն Թուրքիայում իշխանությունը փոխելու՝ Արևմուտքի գործողությունները։
«Չմոռանանք 2016-ի Թուրքիայում տեղի ունեցած հեղափոխության փորձը, որը թեկուզ չստացվեց, սակայն, ինչպես գյուլենականներ են ասել՝ եթե 2016-ին չի ստացվել, դա դեռ չի նշանակում, թե նոր հեղափոխության փորձ չի լինելու։ Արևմուտքն ամեն ինչ անելու է, որ Թուրքիայում հնարավորինս շուտ տեղի ունենա իշխանափոխություն»,-եզրափակեց թուրքագետը։

Աղբյուր` Փաստինֆո