Փաստ ինֆո

Պուշկինի 31 հասցեում գտնվող «Դե Անջելո» սրճարանը ճանապարհի երթևեկելի հատվածի հաշվին՝ մեծացրել է իր տարածքը` դժվարություններ ստեղծելով երթևեկության համար:

«Փաստինֆո»-ն դիմեց Երևանի քաղաքապետարան` պարզելու, թե երբ է շինթույլտվությունը տրվել ու արդյոք քաղաքաշինական, ճանապարհաշինարարական նորմերին չի հակասում ճանապարհի հաշվին սրճարանի կառուցումը: Քաղաքապետարանից հաստատեցին «Փաստինֆո»-ի արձանագրած խախտումը:

«Ամառային ամիսներին՝ նկատի ունենալով զբոսաշրջային ակտիվ հոսքը մայրաքաղաք, Երևանի ավագանու թույլտվությամբ՝ մի քանի առևտրային գործունեություն ծավալող սրճարաններին տրվում է ժամանակավոր գործունեություն ծավալելու թույլտվություն, բայց տվյալ սրճարանի դեպքում գործ ունենք մի դեպքի հետ, երբ քաղաքապետարանի կողմից տրված էսքիզային տարբերակը խախտվել է և տնտեսվարող սուբյեկտը նախատեսվածից ավելի է տարածել իր գործունեության շրջանակը՝ ներգրավելով հատվածներ, որոնք էսքիզային տարբերակում չեն եղել հաստատված: Սրանից ելնելով՝ Երևանի քաղաքապետարանի առևտրի և ծառայությունների վարչությունը վարչական վարույթ է հարուցել, որի շրջանակներում տնտեսվարողն առաջիկայում կհրավիրվի քաղաքապետարան՝ բացատրություն տալու: Անկախ ամեն ինչից՝ վարչական վարույթի սահմանված չափը 100.000 դրամ՝ տվյալ տեսակի օրինախախտման համար»,-հայտնեցին քաղաքապետարանից:

Մեզ քաղաքապետարանից վստահեցրին, որ սրճարանը պարտավորվելու է վերականգնել տարածքը՝ ըստ էսքիզային այն տարբերակի, որն իրենց տրվել է և որից պարտավոր էին չշեղվել:

Հետաքրքիր է, որ աշնան ամիսներին իրականացված շինարարությունը «վրիպել է» քաղաքապետարանի աչքից, չեն տեսել, որ Պուշկին-Կողբացի փողոցների խաչմերուկի հատվածում`ճանապարհը նեղացվել է` լայնացնելով մայթեզրը, որը սրճարանն օգտագործում է որպես սրճարանային տարածք: Այստեղ խնդիրը ամենեւին էլ լայնացրած մայթեզրի օգտագործման նպատակը չէ, այլ, որ դա կատարվել է ճանապարհի` երթեւեկելի հատվածի հաշվին, ինչի հետեւանքով այն այնքան է նեղացել, որ դարձել է դժվարանցանելի` դառնալով վթարի աղբյուր:

Քաղաքապետարանը փաստորեն ոչ թե կանխել է ապօրինությունը, այլ սպասել է, թե երբ պետք է շինարարությունն ավարտվի, սրճարանի ամառային հատվածը ծավալի իր ակտիվ սեզոնային գործունեությունը ու միայն լրատվամիջոցի հարցմանն ի պատասխան հայտնեն, թե հարուցել են վարույթ ու պարտավորեցրել վերականգնել էսքիզային տարբերակը: Կարող ենք փաստել, որ մեր հարցումից հետո նկատել ենք, որ արգելվել է ավտոմեքենաների կայանումը` սրճարանի մոտ` Կողբացի փողոցի կողմից, սակայն ճանապարհի նախնական լայնությունը վերականգնելու ուղղությամբ հունիսի 11-ի դրությամբ որեւէ քայլ չի ձեռնարկվել: Իսկ 100 հազար դրամ տուգանքն ուղղակի ծիծաղելի է թվում ու անհաջող փորձ` արդարացնելու քաղաքապետարանի անգործությունը, որը, ըստ էության, չի վերահսկել շինարարությունը, ավելին հաստատել է վարջնական ակտը` հակառակ պարագայում սրճարանը վերջին մեկ ամսում հնարավորություն չէր ունենա ծավալել գործունեությունը:

Հուսանք քաղաքապետարանը հետամուտ կլինի, որ ճանապարհի երթեւեկելի հատվածը վերականգնվի, եթե, իհարկել, ապօրինությունը չի կատարվել քաղաքապետարանի թողտվությամբ, լուռ համաձայնությամբ, եթե չասենք` կոռուպցիոն համաձայնությամբ:

Աղբյուր` Փաստինֆո