Փաստ ինֆո

Երևանի ընդհանուր իրավասության դատարանը՝ դատավոր Արմեն Շիրոյանի նախագահությամբ, բավարարել է Վեհափառի եղբորորդու՝ Շենգավիթ վարչական շրջանի դատախազի տեղակալ Կորյուն Ներսիսյանի նկատմամբ կալանավորումը որպես խափանման միջոց ընտրելու մասին միջնորդությունը:

Հիշեցնենք, որ ՀՀ գլխավոր դատախազությունը հայտնել էր, որ Երևան քաղաքի Շենգավիթ վարչական շրջանի դատախազի տեղակալ Կորյուն Ներսիսյանը Արմավիրի մարզի առաջին ատյանի ընդհանուր իրավասության դատարանի վարույթում քննվող քրեական գործով ամբաստանյալ Ն․ Դ-ի նկատմամբ մեղմ պատիժ նշանակելուն նպաստելու համար Գ․ Գ-ի և Ն․ Ա-ի օժանդակությամբ և միջնորդությամբ Ն․ Դ-ից ստացել է առանձնապես խոշոր չափերով՝ 2 միլիոն 500 հազար դրամ կաշառք։ ՀՀ գլխավոր դատախազի պաշտոնակատարի 2022թ․ հունիսի 8-ի որոշմամբ՝ դեպքի առթիվ հարուցվել է քրեական գործ և նախաքննություն կատարելու համար ուղարկվել ՀՀ Հակակոռուպցիոն կոմիտե: ՀԿԿ-ից հայտնել են, որ առանձնապես խոշոր չափերով կաշառք ստանալու համար 10.06.2022 թ.-ին Կ. Ն.-ին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով: Առանձնապես խոշոր չափերով կաշառք տալու համար Ն. Դ.-ին մեղադրանք է առաջադրվել ՀՀ քրեական օրենսգրքի 312-րդ հոդվածի 3-րդ մասի 1-ին կետով, իսկ կաշառք ստանալուն օժանդակելու համար Ն. Ա.-ին և Գ. Գ.-ին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով:

Կորյուն Ներսիսյանի պաշտպան Էմին Խաչատրյանը «Փաստինֆո»-ի հետ զրույցում նշեց, որ մեղադրանքը վերացական է, Ներսիսյանը բնականաբար այն չի ընդունում:

«Ամեն անգամ մտածում եմ, որ էլ չեմ զարմանա մեր երկրում, բայց ևս մեկ անգամ «հաճելիորեն» զարմացրին: Էական դատավարական բազմաթիվ խախտումներով, վերացական որևէ ապացույցով չփաստված մեղադրանք: Բնականաբար, պարոն Ներսիսյանն առաջադրված մեղադրանքը չի ընդունում, որևէ ապացույց քրեական գործով չկա, որը կվկայի, որ պարոն Ներսիսյանը որևէ մեկի հետ խոսել է կաշառքի մասին, պահանջել է կաշառք. Ձեռք է բերվել համաձայնություն կամ անձամբ ստացել է:

Հաղորդագրությունները որևէ կերպ իրականությանը չեն համապատասխանում»,- ընգծեց Խաչատրյանը:

Նշենք, որ Ներսիսյանի նկատմամբ օպերատիվ հետախուզական միջոցառումներ են իրականացվել, սակայն Խաչատրյանի գնահատամամբ, իրականացված օհմ-ներով ձեռք են բերվել ավելի շատ արդարացնող, քան՝ մեղադրող ապացույցներ, իսկ դրանց օրինականության վերաբերյալ կխոսվի հետագայում: Նրա փոխանցմամբ` օհմ-ների վերաբերյալ դատարանի որոշումները կբողոքարկվեն: Փաստաբանը հայտնեց, որ Կորյուն Ներսիսյանի դեմ որևէ ցուցմունք չկա, պաշտպանության կողմը պահանջել է վարույթն իրականացնող մարմնից, որ, եթե այդպիսիք կան, կազմակերպվեն առերեսումներ, սակայն նման բան չի եղել, իսկ կալանավորման միջնորդության հիմքում դրված փաստաթղթերով՝ ևս նման բան չկա:

«Համոզված եմ, որ պարոն Ներսիսյանի դեմ որևէ ցուցմունք լինել չի կարող, որովհետև այդ մեղադրանքի հետ առհասարակ առնչություն չունի»,- նշեց փաստաբանը:

Իսկ թե ինչպես է վարույթն իրականացնող մարմինը մեկնաբանում, պատճառաբանում ձեւակերպումը, թե Կ.Ներսիսյանը «պաշտոնեական դիրքն օգտագործել է՝ բարենպաստ պայմաններ ստեղծելու համար ամբաստանյալի համար»՝ Խաչատրյանը նշեց, որ խնդիրն այն է, որ որևէ կերպ չեն մեկնաբանում, ինչ-որ պատմվածք են հորինել և փորձում են կպցնել Ներսիսյանին:

«Պարոն Ներսիսյանը հիշյալ գործով որևէ լիազորություն չի ունեցել, մեղադրող չի եղել, մեկ տարուց ավելի է, ինչ դատախազության այլ ստորաբաժանումում էր աշխատում»,- նշեց Խաչատրյանը:

Հեղինակ՝ Իզաբել Սահակյան

Աղբյուր` Փաստինֆո