Փաստ ինֆո

«Ինձ համար անսպասելի էր, որ քննիչը կալանքի միջնորդությամբ, 10 ժամ հետո դատարան մտավ, ու մինչև գիշերվա ժամը 3-4-ը դատավարություն էր ընթանում»,- արգելանքից ազատ արձակվելուց հետո լրագրողների հետ ճեպազրույցում այսօր ասել է «Երկիր մեդիա» հեռուստաընկերության տնօրեն Բագրատ Եսայանը։

Աբսուրդի ժանրից էր այն, ինչ ներկայացվել էր դատարան, ասում է Եսայանն ու հավելում. «Մնում էր միայն, որ Քենեդու սպանության և Շուշիի հանձնման մեջ ինձ մեղադրեին և, այդ հիմքով, կալանքի միջնորդություն կատարեին, այնինչ, քրեական գործն, ընդամենը, մի էպիզոդի վրա էր հիմնված։ Ապրիլ ամսից սկսած, երբ «Դիմադրության» շարժումն ակտիվացավ ու «Երկիր մեդիա» հեռուստաընկերությունը, որի տնօրենն եմ ես, կտրուկ ակտիվացրեց իր աշխատանքները՝ լուսաբանման ուղղությամբ, նրանք միանգամից ակտիվացրին այս քրեական գործը, որ մոտ 18 ամսի քնած վիճակում էր։ Սկզբում Գերասիմ Վարդանյանին, հետո նաև, այլ մարդկանց սկսեցին ներգրավեցին մի գործում, որից մոտ 20 ամիս է անցել, հետևաբար, փորձեք պատկերացնել, թե ինչ աբսուրդ իրավիճակով են նրանք ուզում ներկայանալ դատարան»։

Հիշեցնենք, որ Բագրատ Եսայանը ձերբակալվել էր ավելի քան 1,5 տարի առաջ հարուցված քրեական գործի շրջանակներում։ Նախաքննական մարմինը նրան մեղադրանք էր առաջադրել ՀՀ քրեական օրենսգրքի երկու հոդվածով՝ 38-225-րդ հոդվածի 2-րդ մասով եւ 164-րդ հոդվածով։ Նա բերման էր ենթարկվել հենց հեռուստաընկերության շենքից, ինչը մեծ արձագանք էր գտել՝ տեղի ունեցածը որակելով որպես ազատ խոսքի դեմ ուղղված քայլ եւ հետապնդում՝ իր քաղաքական հայացքների համար։ Փաստացի, դատարանը եւս հաստատել է, որ 44 հոգանոց քննչական խմբի կողմից ավելի քան 1,5 տարի կատարված քննությամբ որեւէ ապացույց ձեռք չի բերվել Եսայանին մեղադրանք մեղսագրելու համար։

Մանրամասները՝ տեսանյութում։

Աղբյուր` Փաստինֆո