Փաստ ինֆո

Մենք դուրս ենք եկել գաղափարի համար: Այսօր մի շարք մեր մեր ընկերներ բանտարկված են: Մարդկանց կարելի է բանտարկել, բայց ոչ երբեք գաղափարները: Մարդու տեղաշարժը կարող են սահմանափակել, բայց ոչ երբեք իրենց մտքերը, իղձերը, երազանքները: Գաղափարը, երազանքը՝ ունենալ ազատ և անկախ Արցախ, ինքնիշխան Հայաստան, որևէ կերպ հնարավոր չէ կասեցնել՝ ոչ քրեական գործերով, ոչ դատախազի միջնորդությամբ, ոչ էլ՝ ցանկացած այլ գործընթացով: Այս մասին գլխավոր դատախազության շենքի մոտ ակցիայի ընթացքում հայտարարեց երիտասարդներից մեկը:

Նա հայտարարեց, որ իրենց կռիվը ոստիկանների դեմ չէ, շենքերի դեմ չէ, այլ՝ այն իշխանության դեմ է, որը փորձում է վերջնականապես ոչնչացնել մեր պետությունը: Նրա խոսքով՝ մեր երկրում կան բազմաթիվ խնդիրներ, բայց դրանք կարգավորելու, լուծելու և ամուր պետություն ունենալու համար անհրաժեշտ է ներքին խաղաղություն, բայց ոչ նրա հետ, որ ցանկանում է վերջնականապես քեզ կոտորել, մեզ անհրաժեշտ է ներքին միասնություն, պետք է հեռացնել այն իշխանությանը, որը բաժանեց մարդկանց սևերի և սպիտակների, հեղափոխականների և հակահեղափոխականների:

Ակցիայի մասնակիցներից մեկն էլ նշեց, որ երթով եկել են այստեղ շատ հստակ ասելիքով. «Հայաստանում շուրջ 5 տասնյակ քաղաքական բանտարկյալներ կան, հարյուրավոր քաղաքական հալածյալներ, բազմաթիվ քրեական գործերով այս իշխանությունները փորձում են լռեցնել նրանց, թույլ չտալ, որպեսզի քաղաքական տարակարծություն լինի Հայաստանում»։

Նա հիշեցրեց, թե ինչ կարգախոսներ էին այս այսօրվա իշխանությունները բարձրաձայնում՝ հավասարություն, ժողովրդավարություն, արդարադատություն, սակայն հիմա ամբողջությամբ հակառակն է տեղի ունենում։

«Հայաստանում ընտրովի ժողովրդավարություն է։ Մարդիկ, ովքեր խոսում են այս իշխանությանը կողմ, իրենց ամեն ինչ թույլատրելի է, մարդիկ ովքեր դեմ են այս իշխանությանը, նրանց դեմ գործեր են հարուցվում։ Սա է մեր երկրի իրական պատկերը, մենք այս իրականությանը, պատկերին ասում ենք ոչ»,- ասաց նա։

Աղբյուր` Փաստինֆո