Փաստ ինֆո

«Կարծում եմ ռուսական կողմի լրագրողն Արարատ Միրզոյանի համար չափազանց անսպասելի հարց ուղղեց՝ փորձելով նրանից հետաքրքրվել՝ արդյո՞ք Հայաստանում քաղաքական ճգնաժամ առկա է։ Իհարկե, Միրզոյանը միանգամից հասկացավ, որ դա ռուսական կողմից նախապես պլանավորված ակցիա էր, որով ռուս լրագրողը հարցադրման միջոցով բարձրաձայնեց՝ իրենք տեղյակ են, որ հայաստանյան ներքաղաքական կյանքում լուրջ ճգնաժամ կա»,- «Փաստինֆո» -ի հետ զրույցում ասում է քաղտեխնոլոգ Վիգեն Հակոբյանը՝ անդրադառնալով ՌԴ ԱԳ նախարար Լավրովի հետ համատեղ ասուլիսի ժամանակ ռուս լրագրողի կողմից ՀՀ ներքաղաքական ճգնաժամի վերաբերյալ Արարատ Միրզոյանին հղված հարցին։ Հիշեցնենք, որ Ա.Միրզոյանն ի պատասխան հայտարարել էր, որ Հայաստանում, իբր, քաղաքական ճգնաժամ չկա։

Քաղտեխնոլոգի դիտարկմամբ՝ իր պատասխանով Արարատ Միրզոյանն, իհարկե, ապացուցեց, որ փաշինյանական քաղաքական թիմի անդամ է, որովհետև Հայաստանի ներքաղաքական կյանքում առկա ճգնաժամն, ավելի քան ակնառու է։ Միաժամանակ, հերքելով սա ու, հավատարիմ մնալով պաշտոնական դիրքորոշմանը, Միրզոյանը նաև մի շատ կարևոր դիտարկում կատարեց. «Նա փորձեց էլ ավելի խորանալ պատասխանի մեջ, և հայտարարեց, թե իր սեփական դիտարկմամբ, փողոցային պայքարի ելած ընդդիմությունը, որևէ այլընտրանքային կարծիք չի ներկայացնում՝ նոյեմբերի 9-ին ստորագրված փաստաթղթի դրույթների վերաբերյալ։ Սրանով, Միրզոյանը թե՛ ներքին, թե՛ արտաքին լսարանին յուրահատուկ հաղորդագրություն է ուղարկում։ Ներքին լսարանին նա հասկացնում է, որ թե՛ ընդդիմությունը, թե՛ իշխանությունը նույն բանն են, իսկ արտաքին լսարանի համար նա ասում է՝ Հայաստանում, ըստ էության, ռևանշիստներ չկան։ Ըստ նրա, եթե, նույնիսկ, այսօրվա իշխանությունը հրաժարական ներկայացնի, ապա ընդդիմությունը, նույնպես, առանձնապես նոր դիրքորոշում առաջ չի քաշելու՝ ո՛չ ներքաղաքական հարցերում, ո՛չ արտաքին աշխարհի հետ հարաբերություններում։ Արտաքին լսարանի պարագայում, այս մեսիջն ուղղված էր՝ ինչպես Թուրքիային և Ադրբեջանին, այնպես նաև՝ Եվրոմիությանն ու Ռուսաստանի Դաշնությանը»,- ասում է քաղտեխնոլոգը։

Խոսելով այն մասին, թե ներքաղաքական լարված զարգացումներին զուգահեռ, իշխող՝ «Քաղաքացիական պայմանագիր» կուսակցության ներսում, կարծես թե, նույնպես, ճգնաժամ է հասունանում, քաղտեխնոլոգ Վիգեն Հակոբյանը նկատում է՝ այն, որ երկրի ներքաղաքական կյանքում առկա է, նույնիսկ բավականին խորը ճգնաժամ, սա փաստ է, որը արդեն իսկ, ֆիքսել են և՛ ԱՄՆ Պետդեպարտամենտը, և՛ Ռուսաստանի Դաշնության Արտաքին գործերի նախարարությունը։ Իսկ ՔՊ-ում նկատելի են խմորումները։

«Այնտեղ կան որոշակի խմորումներ։ Իհարկե, ՔՊ-ում, համեմետական առումով, նաև ավելի մեծ քաղաքական կենսափորձ ունեցող գործիչներ կան, ովքեր, այս պահին լուռ են, սակայն, սա ոչ թե ներկուսակցական ճգնաժամի, այլ, ավելի շատ, զգուշավորության արդյունք է։ Նրանք հասկանում են, որ երկրի ներսում ստեղծված ներքաղաքական լարվածության հետևանքով, հնարավոր են որոշակի փոփոխություններ տեղի ունենան, որի արդյունքում, իրենք պատասխանատվության առաջ կարող են կանգնել, ինչպես նաև՝ անախորժություններ և խնդիրներ ունենալ, հետևաբար, նրանք փորձում են, հնարավորինս, զգուշորեն մոտենալ իրավիճակին՝ անկախ նրանից, թե ինչպես կարձագանքեն երկրում տեղի ունեցող զարգացումներին։ Ոմանք, իբր, փորձում են անտեսել ներքաղաքական ակնհայտ ճգնաժամը, ոմանք՝ ծաղրի են ենթարկում փողոցային պայքարի որոշ դրվագները, սակայն, զգուշավորությունն, անգամ այն գործիչների կողմից, ովքեր չունեն ո՛չ քաղաքական, ո՛չ նույնիսկ աշխատանքային անցյալ, առկա է»։

Ամփոփելով զրույցը, քաղտեխնոլոգը հավելում է՝ երկրում այնպիսի մի իրավիճակ է ստեղծվել, որի արդյունքում, որևէ բան բացառել, պարզապես, պետք չէ։ Հետևաբար, այսպես կոչված, թավշյա հեղափոխություն հենց ՔՊ-ի ներսում, նույնպես, չի բացառվում, հատկապես որ ներկուսակցական կյանքում որոշակի խմորումներ, այնուամենայնիվ, նկատելի են, որոնք, հատկապես, ակներև դարձան ՔՊ-ի նախահամագումարյան վերջին կրքերից և այն ցուցակներից, որոնք հրապարակվեցին։ Այդ խմորումներում, ըստ քաղտեխնոլոգ Վիգեն Հակոբյանի, իհարկե, կատալիզատորի դեր կարող է խաղալ հենց երկրում առկա ներքաղաքական ճգնաժամը։

Աղբյուր` Փաստինֆո