Փաստ ինֆո

«Երկիր Մեդիա» հեռուստաընկերություն ներխուժելը մեկ անգամ ևս հաստատում է հենց հեռուստաընկերությանը նվաստացնելու ԱԱԾ-ի ընդգծված միտումը։ Այս մասին «Փաստինֆո»-ի հետ զրույցում ասել է «Հայաստանի հելսինկյան կոմիտե» իրավապաշտպան հասարակական կազմակերպության նախագահ Ավետիք Իշխանյանը՝ անդրադառնալով հեռուստաընկերության տնօրեն Բագրատ Եսայանի ձերբակալությանը։ Ավելին, ըստ նրա, Հայաստանում, հիմա արդեն, նմանօրինակ որևէ երևույթի վրա չի կարելի զարմանալ։

Հիշեցնենք, որ այսօր՝ առավոտյան ԱԱԾ-ն ներխուժել է «Երկիր մեդիա» հեռուստաընկերություն ու իր աշխատասենյակից բերման ենթարկել հեռուստաընկերության տնօրեն Բագրատ Եսայանին։ Վերջինիս փաստաբան Վահե Եփրիկյանը հայտնել է, որ Բագրատ Եսայանի նկատմամբ քաղաքական հետապնդում է իրականցվում՝ ՀՀ քրեական օրենսգրքի 38 -225 ֊րդ հոդվածի 2 -րդ մասով և 164-րդ հոդվածի 1 -ին մասով։ Քննիչը ներկայացրել է նրան կալանավորելու միջնորդություն։

Ավետիք Իշխանյանը նկատում է՝ անօրինականություններն ու կամայականություններն իշխանության կողմից, արդեն, ամենօրյա բնույթ են կրում. վերջին չորսը տարիների ընթացքում լսել և ականատես ենք եղել բազմաթիվ այդպիսի դեպքերի։ «Ինչպես նախորդ բոլոր քաղաքական գործերը, սա, նույնպես, հրահանգով կատարված գործ է, այս առնչությամբ ես կասկածներ չունեմ, իսկ հրահանգը գալիս է վերևից՝ անձամբ վարչապետի կողմից»։

Խոսելով Բագրատ Եսայանի ձերբակալման պատճառների մասին՝ իրավապաշտպան Ավետիք Իշխանյանը մի քանի վարկած է առաջ քաշում. «Առաջին պատճառն այն է, որ Բագրատ Եսայանը հանդիսանում է «Երկիր մեդիա» հեռուստաընկերության ղեկավարը, իսկ այդ հեռուստաընկերությունն, իր որդեգրած հստակ քաղաքականությամբ, ցույց է տալիս ընդդիմության ողջ գործունեությունն, ինչպես նաև՝ իշխանությունների անօրինականությունները։ Սրան գումարվում է նաև այն, որ Բագրատ Եսայանը Դաշնակցության անդամ է, իսկ Դաշնակցությունը հիմնական ընդդիմադիր կուսակցություններից մեկն է այսօր։ Հաշվի առնելով նաև այն հանգամանքը, որ ընդդիմությունն, արդեն մեկ ամսից ավելի, բողոքի ակցիաներ է իրականացնում, ուրեմն, այս ամենը համատեղելով, կարող ենք եզրակացնել՝ հրահանգը է տրված ՝ մի կողմից՝ ընդդիմադիր քաղաքական գործիչներին և քաղաքացիներին ահաբեկելու, մյուս կողմից՝ ընդդիմադիր լրատվամիջոցներին, ինչպես նաև՝ ընդդիմադիր քաղաքական գործիչներին այս կերպ մեկուսացնելով, սաստելու համար։ Փնտրել այս գործերում իրավական որևէ հիմնավորումներ, ուղղակի անիմաստ է»։

Նկատառմանը, թե, բառացիորեն օրեր առաջ, ՀՌՀ նախագահ Տիգրան Հակոբյանն իր խոսքում անդրադարձել էր ԶԼՄ-ների՝ վերջին շրջանի գործունեությանը՝ մասնավորապես նշել էր, թե երկու հեռուստաընկերության՝ այդ թվում նաեւ՝ «Երկիր մեդիայի» աշխատանքը պետք է հավելյալ ուշադրության արժանանա՝ իրավապաշտպան Ավետիք Իշխանյանը պատասխանում է՝ իհարկե, Բագրատ Եսայանի ձերբակալությունը չի կարող բխել Տիգրան Հակոբյանի ելույթից, սակայն, Տիգրան Հակոբյանը կամ հանձնարարություն է կատարում, կամ, լինելով այնպիսի անձնավորություն, ով շատ լավ զգալով ի՞նչ է ցանկանում իշխանությունը, պարզապես, սեփական նախաձեռնությամբ, քծնանքի հատուկ ժեստ է կատարել։

Հարցին՝ ի՞նչ միտում կամ հաղորդագրություն է ցանկանում փոխանցել ԱԱԾ-ն՝ լրատվամիջոցի ղեկավարին, առանց նախնական ծանուցման, բերման ենթարկելով հենց աշխատավայրից, այն է՝ լրատվամիջոցի իր աշխատասենյակից, այն պարագայում, երբ քրեական գործը, որով Բագրատ Եսայանին բերման են ենթարկել, բացարձակապես ոչ մի առնչություն չունի նրա հեռուստատեսային գործունեության հետ՝ Ավետիք Իշխանյանը պատասխանում է՝ սա հերթական ցուցադրական ահաբեկումն է. «Այս ամենը հատուկ ցուցադրական նվաստացման նպատակով է արվում։ Այո, Բագրատ Եսայանին ծանուցագիր չեն ուղարկել։ Ներխուժել հեռուստատեսություն, որի նկատմամբ իրենք հատուկ ատելությամբ են լցված, սա մեկ անգամ ևս հաստատում է հենց հեռուստաընկերությանը նվաստացնելու նրանց ընդգծված միտումը։ Միաժամանակ, Բագրատ Եսայանին նվաստացնելու համար սա ցուցադրական շոու էր։ Դեռ լավ է, որ նրան բերման ենթարկելուց, գոնե, չեն փռել ասֆալտին՝ հենց «Երկիր մեդիա» հեռուստաընկերության առջև, պետք է գոհ լինենք սրա համար»,- կիսահեգնական տոնով հավելում է իրավապաշտպանը։

Պատասխանելով հարցին՝ վերոշարադրյալ դեպքերն իրավապաշտպանին չե՞ն հիշեցնում արդյո՞ք 90-ականների տխուր դեպքերը, երբ Դաշնակցություն կուսակցությունը կրկին տարատեսակ հալածանքների և զրկանքների էր ենթարկվում օրվա իշխանության կողմից, Ավետիք Իշխանյանը նկատում է՝ իհարկե, կարելի է զուգահեռներ տանել, սակայն, ինքը համոզմունք ունի, որ այսօրվա իշխանությունները գերազանցել են նույնիսկ 90- ականների կատարված վայրագությունները։

Աղբյուր` Փաստինֆո