Փաստ ինֆո

Իգոր Խաչատուրովը, եւ առհասարակ Խաչատուրովների ընտանիքը, շատ խանգարում են Ադրբեջանին։ Ադրբեջանը վախենում է, նույնիսկ իրենց դասագրքերում են գրում, որ այսպիսի վտանգավոր հայ գեներալներ են եղել, որոնք թուրքերին սպանել են, ահաբեկել են, իսկ օրվա իշխանությունները ինչու են վախենում։ Վերաքննիչ քրեական դատարանի մոտ հայտարարել է «Հայաստան» խմբակցության պատգամավոր Արամ Վարդեւանյանը՝ չբացառելով, որ Իգոր Խաչատուրովի ապօրինի կալանավորումը եղել է ադրբեջանական պատվեր։

Պատգամավորի արձանագրմամբ՝ Խաչատուրովը մեղադրվում է բացառապես ոստիկանի ցուցմունքի հիման վրա։
«Բարձրագույն դատական խորհրդի նախագահի պաշտոնակատար Գագիկ Ջհանգիրյան եւս նախկինում դատապարտվել էր կարծես հենց 316-րդ հոդվածով (ոստիկանի նկատմամբ բռնություն գործադրելու համար-խմբ.)՝ բացառապես ոստիկանների տված ցուցմունքի հիման վրա։ Դա եղե՞լ է արդար։ Ո՛չ։ Դա եղել իրավունքի խախտում։ Այո՛։ Գ.Ջհանգիրյանը հենց իր մաշկի վրա է զգացել դա եւ վերջերս էլ Վճռաբեկ դատարանի կողմից արդարացվել է։ Հիմա ինքը լինելով դատական համակարգի պատասխանատու, տեսնում է, որ, օրինակ, 44-օրյա պատերազմի մասնակից, հայրենասեր, բանակի պատիվը բարձր պահած Խաչատուրովների ընտանիքի ներկայացուցիչը, որի հարազատ եղբայրը՝ Գրիգորի Խաչատուրովը , որի մասին այս իշխանությունները խոսում էին հուլիսյան փառապանծ մարտերի մասին, ձերբակալված է նույն գործելաոճով՝ ոստիկանի ցուցմունքի հիման վրա։ Արդյոք լա՞վ է զգում Գ.Ջհանգիրյանը, որը ինքը լինելով այդ դատական համակարգի ղեկավարը, այդ գործելաոճը ծաղկում է»,- հայտարարել է Վարդեւանյանը ու նշել, որ մի քանի տարի առաջ նման բան չէիք տեսնի, որ զուտ ոստիկանի ցուցմունքի վրա մարդ ձերբակալվեր եւ կալանավորվեր։

Ընդ որում, Վարդեւանյանի փոխանցմամբ, ցուցմունքն այն մասին է, որ Իգոր Խաչատուրովը նրան հարվածել է։ «Կարծում եմ, եթե Իգոր Խաչատուրովը հարվածեր կոնկրետ այդ ոստիկանին, ապա նա կունենար միջին մարմնական վնասվածք, իսկ նա չունի։ Այլ կերպ ասած՝ ապացույց էլ չկա, տեսանյութ էլ չկա»,- նշել է Վարդեւանյանը։

Այդուհանդերձ, Իգոր Խաչատուրովին Սարյան փողոցից, ուժի կիրառմամբ բերման են ենթարկել, ինչի մասին, նրա կարծիքով, Գ.Ջհանգիրյանը տեղյակ է եղել։ Գործն էլ մակագրվել է Շրջակա միջավայրի նախկին նախարարի նախկին տեղակալ Տիգրան Սիմոնյանին, որը հիմա դատավոր է։

«Նա ունի շատ պարզ պարտականություն։ Պետք է եռօրյա ժամկետում մտնի Վերաքննիչ դատարան, այնտեղ տեղակայված նիստերի դահլիճներից մեկում՝ դրոշի ու զինանշանի ներքո, նիստը բացի։ Այսօր փաստաբան Միհրան Պողոսյանը մտել է նիստերի դահլիճ, սակայն Տիգրան Սիմոնյանը չի ներկայացել»,- մանրամասնել է Վարդեւանյանը։

Լրագրողին հարցին, թե իրականում Իգոր Խաչատրյանը ինչո՞վ է խանգարում իշխանություններին, քանզի ամեն կերպ փորձում են կալանքը երկարաձգել, Արամ Վարդեւանյանը պատասխանել է.

«Կարող եմ ասել, որ Իգոր Խաչատուրովը, եւ առհասարակ Խաչատուրովների ընտանիքը շատ խանգարում են Ադրբեջանին։ Ինչպես է ստացվում, որ Ադրբեջանը վախենում է, նույնիսկ իրենց դասագրքերում են գրում, որ այսպիսի վտանգավոր հայ գեներալներ են եղել, որոնք թուրքերին սպանել են, ահաբեկել են, իսկ օրվա իշխանությունները ինչու են վախենում։ Չեմ բացառում, որ դա լինի ադրբեջանական պատվեր։

Ես հիշում եմ, թե ինչպես Գ.Ջհանգիրյանը ԱԺ-ում ակնածանքով խոսում Մանվել Գրիգորյանի մասին որպես պատերազմի մասնակցի, որպես հաղթանակներ արձանագրածի։ Ի դեպ, նաեւ հենց ցավով էլ նշում էր նրա մահվան մասին»,- հայտարարել է Վարդեւանյանն ու ավելացրել. «հիմա ուզում եմ դիմել Գագիկ Ջհանգիրյանին՝ նորմա՞լ է, որ դատավորը փախչի դատարանից։ Երևի թե, ինչ-որ բարդույթներ ունի։ Ինքը երեւի գիտակցում է, որ Իգոր Խաչատուրովը չի կարող երկար մնալ կալանքի տակ, բայց մյուս կողմից՝ ինքն էլ է տեղյակ, որ Ադրբեջանը շատ կուզենար, որ Իգորը մնար կալանքի տակ։ Այսպիսի խնդիրներ կան։ Բայց դա ինչ կապ ունի իրավունքի հետ։ Գրված է վերաքննիչ քրեական դատարան, օրինակ, եթե գրված լիներ քաղաքական հարցերի քննության դիտարկման կամ կալանքի տակ քաղաքական հարցերով պահելու վայր, կհասկանայինք, չէինք գա այստեղ»։

Աղբյուր` Փաստինֆո