Փաստ ինֆո

«Եկավ մի պահ, ու ինքն իրեն վարչապետ հռչակած անձի նյարդերը չդիմացան և նա համապատասխան հրահանգներ իջեցրեց։ Արդյունքում, երևաց իրեն ծառայող Ոստիկանության ողջ ոչ պրոֆեսիոնալիզմը»,- «Փաստինֆո» -ի հետ զրույցում ասել է հոգեբան Կարինե Նալչաջյանը՝ վերլուծելով օրեր առաջ Կառավարական ամառանոցի հարևանությամբ խաղաղ ակցիայի մասնակիցների նկատմամբ ոստիկանության կիրառած բռնությունները։

Կարինե Նալչաջյանը պատմում է՝ հունիսի 3-ին, ինքն անձամբ, ընտանիքի անդամների և մանկահասակ թոռնիկի հետ, դեպքի վայրում է եղել. «Մարդիկ սովորական տրամադրությամբ հերթական խաղաղ անհնազանդության ակցիային էին մասնակցում։ Արտառոց որևէ բան չէր պատահել։ Գիտե՞ք, այնտեղ հավաքված է մեր հասարակության այն շերտը, որը խիստ բարեկիրթ է, բարոյական արժեքներ ունի, հետևաբար, չտեսա այնպիսի մի իրավիճակ, որ կարող էր ուժային կառույցներին նման վարքագծին հանգեցնել։ Ինչ խոսք, սադրանքներ հաճախ լինում են, ինքս էլ, երբեմն – երբեմն, դրանց ականատես եմ լինում։ Հաշվարկը նույնն է՝ հասնել նրան, որպեսզի ինչ – որ պահից, մարդկանց նյարդերը չդիմանան, պոռթկումներ լինեն, սակայն, այդ օրը տեղի ունեցավ ճիշտ հակառակը՝ տեղի տվեցին իրեն վարչապետ հռչակած անձի նյարդերը»,- ասում է հոգեբանը։

Փաշինյանն, իհարկե, վախենում է, և դա, ինչ – որ առումով, սպասելի էր, ասում է Կարինե Նալչաջյանն ու հավելում. «Ինչքան էլ մարդիկ փորձեն իրենց հավասարակշիռ և իրավիճակը վերահսկող ձևացնել, գլուխները խորը թաղելով ավազների մեջ, անհնար է, որ այդպիսի ուժը և այն ոգին, որ թևածում է բազմահազարանոց երթերի ընթացքում, այդ կոչերն ու երաժշտությունը, վախի կամ խուճապային տրամադրություններ չարթնացնեն ղեկավարության շրջանակներում։ Ղեկավար մարդիկ, ովքեր պաշտոններ ունեն, վախենում են այդ պաշտոնները կորցնելուց, ու ամեն գնով պատրաստ են պահպանել իրենց աթոռները, որպես կանոն, վախենում են այսօրինակ զանգվածային գործողություններից։ Ինչքան էլ ուզում են ինչ – որ կեցվածք ընդունել, որ կարծես, թե ոչինչ տեղի չի ունենում՝ միևնույն է, նրանց ներսում վախի չափաբաժինն ահռելի մեծ է։ Այս ենթատեքստում, հատկապես, նկատելի են Նիկոլ Փաշինյանի վախերը, առավել եւս, եթե դրանց մասին գիտեն բոլորը. գաղտնիք չէ՝ Փաշինյանն, ակնհայտ, վախկոտ մարդ է։ Իհարկե, որպես անհատ, նա շատ կցանկանար թողներ ամեն ինչ և ընտանիքի հետ միասին, ճողոպրեր ինչ – որ հանգիստ մի տեղ՝ գլուխն ազատելով, վայելելու իր կուտակած հարստությունը, սակայն, դա նրան չի հաջողվելու։ Հայի ձեռքը, երկրագնդի որ անկյունում էլ լինի, կհասնի դավաճաններին։ Միշտ է այդպես եղել, Փաշինյանը, նույնպես, բացառություն չի լինելու։ Հավանաբար, դա նրան թույլ չեն տալիս, որովհետև, նա դեռ մինչև վերջ չի կատարել իր անգլո – սաքսոնական և թուրք – ադրբեջանական տերերի հրահանգները, սակայն, սա երկար շարունակվել չի կարող և նա շատ լավ հասկանում է այս մասին»։

Վերադառնալով ուժայինների վարքագծի թեմային, հոգեբան Կարինե Նալչաջյանը հետաքրքիր դիպված է պատմում. «Օրեր առաջ Հանրապետության Հրապարակում նստած էի։ Հավանաբար, օտարերկրյա հյուրեր ունեինք, որովհետև ողջ հրապարակը լիքն էր իրավապահ համակարգի ներկայացուցիչներով։ Ակամա, առիթ ունեցա լսելու այնտեղ գտնվող կարմիր բերետավորների զրույցը, որ տեղի էր ունենում իրար մեջ։ Զարմանալի է, բայց այդ երիտասարդները չէին քննարկում երկրում տեղի ունեցող իրադարձությունները, չէին խոսում այն մասին, որ արտասահմանյան ինչ – որ կարևոր հյուրեր են ժամանել, ինչի առիթով, իրենց հրահանգել են խստացված ծառայություն իրականացնել տվյալ վայրում։ Նրանք չէին խոսում, անգամ, ներքաղաքական ամենաքննարկվող թեմայի՝ ընդդիմության գործողությունների մասին, որին այդքան ակտիվ մասնակցություն են ունենում իրենք, հաճախ՝ ոչ դրական իմաստով։ Նրանց զրույցի թեման փողն էր։ Տպավորություն էր, որ նրանց ձեռքը շատ, չափազանց շատ գումար է ընկել, որն էլ իրենք փորձում են հնարավորինս արդյունավետ կերպով տնօրինել։ Օրինակ, նրանցիցի մեկը պատմում էր, թե նախորդ օրը 7 կիլոգրամ միս է առել և նկարագրում էր, թե ինչպիսի հաճույքով է մարինացրել այն, որպեսզի խորովի։ Մեկ ուրիշը պատմում էր, որ, վերջապես, վարկով իր երազած մեքենան է գնել և դա, պարզվում է, մեծ ձեռքբերում է եղել իր կյանքում։ Մեծ իմաստով, տպավորություն էր, որ այդ մարդիկ, ինչպես հարկն է, վճարվում են՝ համապատասխան վայրերում, համապատասխան մարդկանց կողմից, համապատասխան հրահանգներով իրենց հայրենակիցներին ծեծի ենթարկելու համար»,- զարմանքով պատմում է հոգեբանն ու հավելում՝ սա, իհարկե, հոգեբանական վերլուծության տեսակետից, խիստ հետաքրքիր վերլուծության նյութ էր։

Հունիսի 3-ին կիրառված բռնությունից հետո այդպես էլ չկոտրվեց քաղաքացիների այն ուժն ու ոգին, որի համար, ամենայն հավանականությամբ, իրականացվեցին ուժայինների բիրտ գործողությունները՝ հոգեբան Կարինե Նալչաջյանը նկատում է՝ գործ ունենք գաղափարական պայքարի ելած գիտակից ու ազգանվեր մասսայի հետ. «Գիտե՞ք, երբ կա գաղափար, այսինքն` վեհ արժեք, որի շուրջ հավաքված մարդկանց այս մեծ խումբը պայքարի է ելել՝ պահպանելու Մայր Հայրենիքը՝ վերջնականապես կործանվելու վտանգից, ապա որևէ տեսակի բիրտ ուժ կամ խոչընդոտ չի կարող հետ պահել նրանց այս նպատակից։ Ակնհայտ է, որ գործ ունենք հենց այդպիսի դեպքի հետ, որ, ի տարբերություն նախորդ՝ 2018-ի իրադարձությունների, բացառապես ոգեղեն, ազգապահպան և հայանպաստ պայքար է»։

Ամփոփելով զրույցը, Կարինե Նալչաջյանը նշում է, որ օրեր առաջ մասնակից է դարձել սոցիոլոգիական մի հարցման։ Լրատվամիջոցներից մեկը քաղաքացիներին հարցնում էր՝ համաձա՞յն են արդյո՞ք, որպեսզի Արման Թաթոյանը վարչապետ դառնա։ «Եթե, նույնիսկ, լավագույն նպատակներով, այս պահին շատ արժանավոր ինչ - որ մարդու մասին, ինչպիսին, օրինակ, նույն Թաթոյանն է, սկսեն քննարկել նրա վարչապետ դառնալու հեռանկարը, ապա սա չափազանց մեծ վտանգ է պարունակելու իր մեջ։ Այսինքն, միանգամից, ամեն ինչ անձնավորվելու է, պայքարի ոգին կոտրվելու, ինչն էլ, իր հերթին, անխուսափելիորեն, հանգեցնելու է հնարավոր բոլոր բացասական հետևանքների։ Հետևաբար, օգտագործելով ձեզ հետ զրուցելու այս առիթը, ցանկանում եմ հորդորել մարդկանց, այդ թվում նաև պարոն Արման Թաթոյանին, ով իհարկե, որպես Մարդու իրավունքների Պաշտպան, լավագույն արդյունքներ գրանցեց, բոլորս էլ տեսանք ու գնահատեցինք իր աշխատանքը։ Սակայն, հիմա ուզում եմ նրան ասել՝ պարոն Թաթոյան, խնդրում և հորդորում եմ ձեզ, հանդես եկեք հայտարարությամբ, հանրային ելույթ ունեցեք և փակեք այս թեման։ Երբ, նույն հարցման ընթացքում, ինձ հարցին, թե ո՞ւմ եմ ես տեսնում վարչապետի պաշտոնում, ես ասեցի՝ շատերին եմ տեսնում, սակայն այս պահին, այդ թեմային անդրադառնալու նպատակահարմարություն չեմ տեսնում։ Դրա ժամանակը չէ, երկիրը կործանվում է, նախ պետք է փորձենք փրկել մեր Հայրենիքը կործանումից, հետո նոր միայն անցնենք անձերի քննարկմանն ու այս կամ այն նպատակահարմարությանը։ Կարծում եմ, հիմա՝ այս փուլում, պետք է ժամանակավոր հակաճգնաժամային կառավարություն կազմել, որն ունակ կլինի երկիրը հանել այս վիճակից, և, երբ կգա ավելի հարմար և բարենպաստ ժամանակը, կքննարկենք նոր ղեկավարի կամ հավանական թեկնածությունները։ Այնպես որ, լավ կլիներ, եթե պարոն Թաթոյանն իր նախաձեռնությամբ կանգնեցներ այս գործընթացը, որ տեղի է ունենում իր անվան շուրջ»,- ամփոփելով զրույցն, ասում է հոգեբան Կարինե Նալչաջյանը։

Աղբյուր` Փաստինֆո