Փաստ ինֆո

Ռուսաստանի արտգործնախարար Սերգեյ Լավրովի հայտարարությունն առ այն, որ Փառուխի հարցը Հայաստանի և Ադրբեջանի միջև սպասվող դելիմիտացիայի շրջանակում կքննարկվի և լուծում կստանա, նշանակում է, որ հարցը գտնվում է ամենաբարձր օղակների ուշադրության ներքո։ «Փաստինֆո»-ի հետ զրույցում նման տեսակետ հայտնեց Արցախի արտաքին գործերի նախարար Դավիթ Բաբայանը։

Ինչպես արդեն տեղեկացրել ենք՝ Լավրովը, պատասխանելով Փառուխի շուրջ ստեղծված վիճակի վերաբերյալ լրագրողի հարցին, թե ի՞նչ է արվում ադրբեջանական զորքերը ելման դիրքեր վերադարձնելու ուղղությամբ՝ հայտարարել է «Ռուս զինվորականները և մեր հայ ընկերները խնդիրը պահում են ուշադրության կենտրոնում՝ որպես առաջնահերթություն։ Այնտեղ արդեն որոշակի արդյունքներ կան՝ իրավիճակի հանգուցալուծման հետ կապված։ Եվ մենք փոխըմբռնում ունենք, որ մեկնարկվող սահմանագծման գործընթացի շրջանակում այդ հարցը կքննարկվի և անպայման լուծում կստանա» ։

Արցախի արտաքին գործերի նախարարի դիտարկմամբ՝ Լավրովի հայտարարությունից չի բխում, թե սահմանագծման գործընթացը ներառելու է նաև Արցախը։

«Նա ասել է, որ այդ հարցը քննարկվելու է՝ դրանով իսկ փաստելով, որ հարցն ամենաբարձր օղակների ուշադրության կենտրոնում է գտնվում։ Դա ինքնին շատ կարևոր է և հուսալի հիմքեր է ստեղծում հարցի կարգավորման համար»,-ասաց Բաբայանը։
Արցախի արտաքին գերատեսչության ղեկավարը ևս մեկ անգամ վերահաստատեց, որ Արցախի ապագա կարգավիճակը կապ չունի Հայաստանի և Ադրբեջանի միջև սպասվող սահմանագծման և սահմանազատման հետ։
«Արցախի կարգավիճակի վերաբերյալ ՌԴ ղեկավարությունը ժամանակին խոսել է, իսկ Ռուսաստանը կայացած երկիր է․ այնպես չէ, որ այսօր մի բան է ասում, վաղը մեկ այլ բան կասի»,-նկատեց Արցախի արտաքին գերատեսչության ղեկավարը։
Փառուխի հարցի հետ կքննարկվի՞, արդյոք,Հադրութի և Շուշիի հարցը, թե՞ ոչ, Բաբայանը նախընտրեց կանխատեսումներ չանել։ Միայն շեշտեց՝ առայժմ պետք է անել ամեն ինչ՝ Արցախի մնացյալ մասը փրկելու համար։

Աղբյուր` Փաստինֆո