Փաստ ինֆո

ՀՀ քննչական կոմիտեն որեւէ նախանձախնդրություն չի ցուցաբերում ՀՀ սուվերեն տարածք, մասնավորապես, Գեղարքունիքի մարզ ադրբեջանցի զինվորականների ներխուժելու և վերջիններիս կողմից հայ զինծառայողների նկատմամբ բռնություն գործադրելու դեպքերին իրավական գնահատական տալու, որպես մեղադրյալ ներգրավելու հարցում։

Հիշեցնենք, որ միջադեպի մասին հայտնի էր դարձել տելեգրամյան ալիքներից՝ 2021թ մայիսի 18-ին։ Տարածված տեսանյութերի համաձայն՝ Գեղարքունիք ներխուժած ադրբեջանցի զինվորականները ծեծի են ենթարկել հայ սահմանապահներին։ ՀՀ ՊՆ-ն հաստատել էր դեպքը՝ նշելով, որ վիճաբանությունն արագ հարթվել է։

«Մեր տարածքում շրջափակման մեջ գտնվող ադրբեջանցի զինվորականների և հայ զինվորականների միջև եղել է վիճաբանություն, որը շատ արագ հարթվել է: Երբ մեր զինվորականներն ասել են, որ ադրբեջանցի զինվորականները պետք է արագ դուրս գան մեր տարածքից, վիճաբանություն է առաջացել, որն էլ արագ հարթվել է»,-հայտնել էր ՊՆ-ից:

Նույն թվականի մայիսի 20-ին ՀՀ գլխավոր դատախազությունը պաշտոնապես տեղեկացրել է, որ մայիսի 12-ին Ադրբեջանի Հանրապետության ԶՈւ հրամանատարների կազմակերպմամբ՝ մի խումբ զինված զինծառայողներ ապօրինի հատել են ՀՀ Գեղարքունիքի մարզի Վարդենիս համայնքի Վերին Շորժա բնակավայրի և Նորաբակ համայնքի սահմանային հատվածներում պահպանվող ՀՀ պետական սահմանը: Ադրբեջանցի զինծառայողները ՀՀ տարածքում առաջացել են 2-ից 3կմ ու դիրքավորվել՝ նրանց մոտեցած ՀՀ ԶՈւ զինծառայողներին սպառնալով ավելի առաջանալու դեպքում կրակ արձակել նրանց ուղղությամբ և հայտարարարել են, որ այդ տարածքը պատկանում է Ադրբեջանին: Նյութերի նախապատրաստման արդյունքում նշված դեպքի առթիվ Սևանի կայազորի զինվորական դատախազությունում դեռևս մայիսի 18-ին ՀՀ քրեական օրենսգրքի 300.2 հոդվածով և 329-րդ հոդվածի 2-րդ մասով հարուցվել է քրեական գործ, որի նախքաննությունը հանձնարարվել է ՀՀ ՔԿ ԶՔԳՎ 5-րդ կայազորային քննչական բաժնին:

Նշված վարույթի շրջանակներում ստուգվել է նաև ադրբեջանցի զինծառայողների կողմից հայ զինծառայողներին ծեծի ենթարկելու մասին տեսանյութը, որի արդյունքում իրավապահները քրեական գործ են հարուցել՝ հայ զինծառայողների կողմից ծառայողական ենթադրյալ խախտումների առնչությամբ. մարտական ծառայության կանոնների խախտման, ծառայության նկատմամբ անփույթ վերաբերմունքի դեպքերի առթիվ ՀՀ քրեական օրենսգրքի 365-րդ հոդվածի 3-րդ մասով և 376-րդ հոդվածի 2-րդ մասով հարուցվել է քրեական գործ։

Դեպքից մեկ տարի անց «Փաստինֆո»-ն գրավոր հարցում է ուղարկել ՀՀ գլխավոր դատախազություն՝ պարզելու, թե ինչ փուլում է գտնվում քրեական գործի քննությունը, արդյո՞ք որևէ անձի նկատմամբ քրեական հետապնդում իրականացվում է, թե՝ ոչ, արդյունքում պարզվեց՝ գործով տեղաշարժ չկա։

«2021թ մայիսի 13-ին ՀՀ ՊՆ Վարդենիսի ռազմական ոստիկանության բաժնում նախապատրաստված նյութերով՝ բռնություն գործադրելու միջոցով ՀՀ տարածքային ամբողջականությունը խախտելու, ապօրինի սահմանահատման, ինչպես նաև՝ ՀՀ ԶՈՒ զինծառայողների կողմից մարտական հերթապահություն կրելու կանոնները խախտելու և ծառայության նկատմամբ անփույթ վերաբերմունք դրսևորելու դեպքերի առթիվ Սևանի կայազորի զինվորական դատախազությունում 2021թ. մայիսի 20-ին հարուցվել է քրեական գործ։ Քրեական գործով նախաքննությունը շարունակվում է, ձեռնարկվում են բոլոր անհրաժեշտ քննչական և այլ դատավարական գործողությունները՝ լրիվ, բազմակողմանի և օբյեկտիվ քննություն ապահովելու նպատակով։ Քրեական գործով որևէ անձի նկատմամբ քրեական հետապնդում հարուցված չէ»,- նշել են ՀՀ գլխավոր դատախազությունից։

Այլ խոսքով, դատախազաքննչական մարմինները զբաղված են միայն քաղաքական ընդդիմախոսների նկատմամբ հետապնդումներ հարուցելով, իսկ ՀՀ տարածքային ամբողջականության դեմ քայլեր իրականացնող, մեր զինվորներին իրենց իսկ հողում ստորացնող թշնամին մնում է անպատիժ.գոնե հիմքեր չեն ստեղծվում միջազգային իրավունքի խախտում թույլտվածներին վաղը միջազգային դատարանի առաջ կանգնեցնելու համար։ Սա է այսօրվա իշխանության հայելին՝ թշնամին ինչ ուզի կարող է անել,նա անձեռնմխելի է։

Հեղինակ՝ Իզաբել Սահակյան

Աղբյուր` Փաստինֆո