Փաստ ինֆո

Ասօրվա ելույթս վերնագրել եմ այսպես. «Ինչ-որ մեկը կամ ոչ մեկը»։ «Քաղաքացիական պայմանագիր» խմբակցության պատգամավոր Նարեկ Գրիգորյանն ապօրինի գույքի բռնագանձման  օրենքի նախագծի քննարկման ժամանակ իր  ելույթը նվիրեց մասնավորապես ԱԺ փոխնախագահ Իշխան Սաղաթելյանին։

Նարեկ Գրիգորյանի կարծիքով՝ փողոց դուրս եկած մարդիկ պայքարում են ոչ թե Արցախի և Հայաստանի համար, այլ՝  իրենց ունեցվածքի:

«Ինչ-որ «մալյոկ» հայտարարում է, թե իբր «Քաղաքացիական պայմանագիր» կուսակցությունը չունի իշխանություն։  Մենք ամեն օր մարզերում, գյուղերում, քաղաքներում շրջում ենք, խոսում ենք, բայց եկեք տեսեք այդ «մալյոկին» չեն հասցրել, որ ինքը նույնիսկ ընդդիմության լիդեր չի կարող լինել, որովհետեւ իրեն ժողովուրդն ուղղակի չի ընդունում։ Նա հայտարարում է, թե իբր 44-օրյա պատերազմում արել է այն, ինչ չեն արել ՔՊ բոլոր անդամները»,-ասաց Գրիգորյանն ու  որոշեց իր տեղեկություններով կիսվել հանրության հետ՝ պատմելով Սաղաթելյանների մասին իրեն հայտնի  մի պատմություն։

«44-օրյա պատերազմի ժամանակ՝ նոյեմբերի 20-ին, երբ մի Սաղաթելյան ազգանունով մեկին բերեցին իմ ջոկատ՝ «Գեղաքունիք» ջոկատ, անունն էր Վաչիկ Սաղաթելյան, Իշխան Սաղաթելյանի հայրն էր։ Ջոկատի բոլոր մասնակիցները կհիշեն, երբ նա խնդրում էր, որ թողնեմ տուն գնա, քանի որ հիվանդ է, իր տղաները կգան, կմասնակցեն։ Նա գնաց ու տղաներից ոչ մեկն էլ չեկավ ու, չեմ էլ կարծում, որ գոնե մեկ օր մասնակցել են այդ պատերազմին»,-հայտարարեց ՔՊ-ական պատգամավորը։

Գրիգորյանի բնորոշմամբ՝ ընդդիմությունը ժողովրդավարությունը շփոթում է դիկտատուրայի հետ։ ՔՊ-ական պատգամավորը հիշեցնելով 2008 թվականի Մարտի 1-ը, նշեց, թե ինքն այն ժամանակ անչափահաս էր՝ 17 տարեկան, մասնակցում էր ցույցերին և իրեն ծեծելով տարել են ոստիկանական բաժանմունք։

Անդրադառնալով կրկին Սաղաթելյանին, իշխանական պատգամավորը հայտնեց, որ Իշխան Սաղաթելյանին ճանաչում է դեռ մարզպետ աշխատած տարիներից։

«Էդ Իշխանիկը ոստիկանին ասում է՝ «մատներդ կջարդեմ»։ Իրեն դեռ մարզպետարանից գիտեմ, երբ մտնում էի իր սենյակ, ոտքերն ու ձեռքերը դողում էին, իմ դուրս գալուց հետո էլ զանգահարում էր տարածքային կառավարման նախարարություն եւ բողոքում, թե Գրիգորյան Նարեկն ինձ հետ բարձր է խոսում, ու այսօր էդ տղեն խոսում է դուխից։ Իմ զորակցությունն եմ հայտնում այն ոստիկաններին,  որոնք վիրավորվեցին ինչ-որ խուլիգանների կողմից եւ այն քաղաքացիներին, որոնք այս պայհին մոլորված են ու չգիտեն, թե ինչ են անում»,-եզրափակեց պատգամավորը։

Աղբյուր` Փաստինֆո