Փաստ ինֆո

Մեր տարածաշրջանում և, մասնավորապես, Արցախի հարցում որոշիչ դերակատարում իրեն վերապահել է Ռուսաստանը, նա չի զիջի իր դիրքերը որևէ պարագայում։ Եթե մարտավարական առումով որոշակի զիջումների գնա Ուկրաինայում ռազմական գործողությունների ավարտից հետո, ապա Ռուսաստանի կեցվածքը Հարավային Կովկասում որակապես կտրուկ փոփոխությունների կենթարկվի: «Փաստինֆո»-ի հետ զրույցում նման տեսակետ է հայտնել ռազմական փորձագետ Հայկ Նահապետյանը:

Նշենք, որ այսօր Անկարայում կայացել է ՌԴ ԱԳ նախարար Սերգեյ Լավրովի հանդիպումը թուրք գործընկերոջ՝ Չավուշօղլուի հետ, ըստ պաշտոնական տեղեկատվության՝ Չավուշօղլուն և Լավրովը, ի թիվս այլ հարցերի, քննարկել են հայ-ադրբեջանական հարաբերությունների կարգավորման հարցը:

Ամփոփելով հանդիպման արդյունքները՝ Հայկ Նահապետյանը նկատում է՝ Լավրովը և Չավուշօղլուն քննարկել են միայն Հայաստան-Ռուսաստան-Ադրբեջան եռակողմ համաձայնագրերի կատարման ընթացքը ու համոզմունք հայտնել, որ Ռուսաստանը որևէ մեկին թույլ չի տա, որպեսզի դրանից դուրս որևէ պայմանավորվածություններ և քննարկումներ լինեն.

«Այս դեպքում մենք լուրջ հնարավորություններ ունենք, եթե ճիշտ դիվանագիտություն իրականացվի, չնայած ես նման հույս չունեմ իշխանություններից, կամ եթե նոր իշխանություն գա, ապա անգամ այդ կետերի իրագործման դեպքում Հայաստանը և Արցախը կարող են շահեկան դուրս գալ»,-ասաց Նահապետյանը:

Ռազմական փորձագետի արձանագրմամբ՝ Թուրքիան շատ լավ հասկանում է, որ արցախյան հիմնախնդրի հետ կապված իր դիրքորոշումը և Ադրբեջանի շահերի սպասարկումը կարող է իր ազգային և պետական շահերին դեմ լինել.

«Առաջինը հենց Թուրքիան է համաձայնություն տվել, որ Ադրբեջան պետությունը դառնա Խորհրդային միության մաս, այսինքն՝ ինքն աճուրդի է հանել Ադրբեջան պետությունը, թվում է, թե թուրք-ադրբեջանական ռազմաքաղաքական դաշինքը պայմանավորվածություններ ունի, հարաբերությունները շատ ամուր են, բայց Թուրքիան, իր շահերի սպասարկման համար եթե պետք լինի հրաժարվել Ադրբեջանից, առանց իսկ ակնթարթ մտածելու կհրաժարվի, այո՛, անհրաժեշտության դեպքում Թուրքիան ինքն է աճուրդի հանելու Ադրբեջանի շահերը, կասկա՛ծ չունենաք »,-ասաց Նահապետյանը:

Հայկ Նահապետյանը վստահեցնում է, այս պահին Թուրքիան չի համարձակվի առճակատման դուրս գալ Ռուսաստանի հետ, քանի որ դա իր համար կարող է լինել չգոյության սկիզբը.

«Թուրքիա պետությունն այսօր բավականին ծանր վիճակում է այսօր, ճիշտ է, հռետորաբանությամբ դա չի երևում, իր երկրի նախագահը շատ վստահ է խոսում, բայց այն մարտահրավերները, որոնք Թուրքիային նետվել են այն սպառնալիքները, որ իր ներսում կան, այս ամենը Թուրքիային ստիպում է, որպեսզի Ռուսաստանի հետ հարաբերությունները ջերմ պահի, բայց ոչ՝ թելադրողի դիրքերից:Թուրքիան ունի բազմաթիվ խնդիրներ՝ ներսում քրդական, տնտեսական , դրամի արժեզրկումը, ընտրությունները, իսկ դրսում կան մի շարք պետություններ, որոնք իրավունքի տեսանկյունից պահանջատեր են Թուրքիայից, ուստի Թուրքիան փորձում է Ռուսաստանի հետ որոշակի տնտեսական, քաղաքական և դիվանագիտական հարաբերություններ ստեղծել, լուրջ խնդիրներ չլինեն»,-ասաց նա:

Նշենք նաև, որ Սերգեյ Լավրովն այսօր էլ աշխատանքային այցով եկել է Երևան, որտեղ հանդիպումներ է ունենալու վարչապետ Նիկոլ Փաշինյանի և ԱԳ նախարար Արարատ Միրզոյանի հետ:

Փորձագետը կարծում է, որ Երևանում էլ քննարկվելու են բացառապես եռակողմ համաձայնագրերի կետերի իրականացնումը:

Ընդդիմությունն էլ իր հերթի հայտարարել է, որ վաղն ակցիա է անելու, որպեսզի ՌԴ ԱԳ նախարարին տեղեկացնի, որ «իրենց հետ փակ դռների հետևում պարտվածի դիրքերից բանակցողը չի արտահայտում հայ ժողովրդի կամքը, ուստի մեր անունից որևէ գործընթաց իրականացնելու մանդատ չունի »:

Անդրադառնալով ընդդիմության ակցիային՝ Հայկ Նահապետյանը նշեց, որ դա նորմալ է, երբ ընդդիմադիրներն իրենց դիրքորոշումն այդկերպ փորձում են հայտնել.

«Մի բան պետք է փաստենք, որ Ռուսաստանն ասել է՝ Հայաստանի ներքաղաքական գործընթացներին չի խառնվելու, քանի որ դա հայ ժողովրդի սուվերեն իրավունքն է, եթե հայ ժողովուրդը գտնում է, որ Նիկոլ Փաշինյանը չպետք է լինի վարչապետ, ապա Ռուսաստանը հաշվի է նստելու և ընդունելու է հայ ժողովրդի ցանկացած որոշում »,-եզրափակեց Հայկ Նահապետյանը:

Աղբյուր` Փաստինֆո