Փաստ ինֆո

Այսօր մի քանի սանձարձակ անձինք, սողոսկելով անվտանգության պատնեշների տակից, տարրական դաստիարակության կանոնները չպահպանելով` ներխուժեցին աշխատասենյակ, ճվճվացին, ձեռքերով թափահարեցին, նկարվեցին և իրենց գռեհիկ վարքագծից շատ գոհ գնացին։ Այս մասին ՀՀ առողջապահության նախարար Անահիտ Ավանեսյանն արտահայտվել է ընդդիմադիր պատգամավորներ Քրիստինե Վարդանյանի, Աննա Մկրտչյանի ու Ասպրամ Կրպեյանի մասին, գրառում կատարելով իր ֆեյսբուքյան էջում։

«Պատգամավորական մանդատը խուլիգանի վարք դրսևորելու ինդուլգենցիա չէ, այլ օրենքով սահմանված հնարավորություն՝ հանդիպում նշանակել, նորմալ մարդու պես պայմանավորված ժամին գալ, անցագիրը ցույց տալ և ներս մտնել։

Նորից եմ կրկնում երեկվա ասածս՝ խուլիգանական դրսևորումները պետք է ոստիկանության և այլ ուժային կառույցների կողմից օրենքով սահմանված կարգով խստորեն կասեցվեն և պատժվեն՝ Հայաստանը օրենքի երկիր է»,- գրել է նա։

Ինչպես արդեն տեղեկացրել ենք՝ Ազգային Ժողովի ընդդիմադիր՝ «Հայաստան» դաշինքի պատգամավորներ Քրիստինե Վարդանյանն ու Ասպրամ Կրպեյանը, ինչպես նաև «Պատիվ ունեմ» դաշինքի պատգամավոր Աննա Մկրտչյանն այցելել են Կառավարության երրորդ մասնաշենքում տեղակայված Առողջապահության նախարարություն ՝ հանդիպելու նախարար Անահիտ Ավանեսյանի հետ։ Պատգամավորներին, ի վերջո, հաջողվել է գտնել Ավանեսյանին ու նրան ամոթանք տվել քաղաքացիների նկատմամբ ոստիկանության բռնություններն արդարացնելու համար։

«Տիկին Ավանեսյան, դուք, հերիք չէ, այսքանից հետո դեռ խոսում եք, մի հատ էլ Ազգային Ժողովում պաշտպանում եք Ոստիկանությանը։ Եթե մարդ ամոթ ունենար, ձեր փոխարեն, աչքերը չէր կարողանա թարթել։ Այս տղաների նկարները պետք է ամեն երեկո ձեր երազին գան։ Ես չգիտեմ, թե դուք այսքանից հետո ո՞նց եք ապրում։ Ամո՛թ ձեզ».- Ավանեսյանին դեմ առ դեմ հայտարարել է ԱԺ պատգամավոր Քրիստինե Վարդանյանը, ինչին այդ ժամանակ Ավանեսյանը ոչինչ չէր պատասխանել։

Աղբյուր` Փաստինֆո