Փաստ ինֆո

Ուզում եմ հասկանալ ԵԽ կամ ԵՄ դեսպանը որտեղի՞ց են իմացել, որ Արման Դիլանյանը ՍԴ նախագահ է, եթե չի եղել համապատասխան որոշում։ Հայաստանի պատմության մեջ կա ընդամենը երկու ՍԴ նախագահ՝ Գագիկ Հարությունյանը եւ Հրայր Թովմասյանը, որոնց ՍԴ նախագահ լինելու համար կա ԱԺ որոշում։ Մարիոթ հյուրանոցի մոտ հայտարարել է Լեհաստանում ՀՀ նախկին դեսպան, ՍԴ աշխատակազմի նախկին ղեկավար Էդգար Ղազարյանը՝ նշելով, որ Արման Դիլանյանի՝ ՍԴ նախագահ լինելու մասին որոշում բնության մեջ գոյություն չունի։

«Փաստինֆո»-ի հաղորդմամբ՝ Երեւանում՝ «Մարիոթ» հյուրանոցում այսօր տեղի է ունեցել «Դատական իշխանությունը՝ որպես ժողովրդավարության երաշխավոր» խորհրդաժողովը, որին ընդդիմադիր գործիչներին թույլ չեն տվել մասնակցել։

Հյուրանոցի մոտ տեղի ունեցած ակցիայի ժամանակ Էդգար Ղազարյանն արձանագրել է, որ կոնֆերանսին որպես զեկուցող մասնակցում է ՍԴ դատավոր Վահե Գրիգորյանը, ինչպես նաեւ նրա սանիկները՝ Լուսինե Հակոբյանն ու Տիգրան Եգորյանը։

«Փաստորեն այս կոնֆերանսին չեն մասնակցում նրանց հարսանիքի հարսնաքույրը եւ «ազաբ բաշին»,- նշել է գործիչն ու ավելացրել. «այստեղ է եկել ԵԽ Վենետիկի հանձնաժողովի նոր ընտրված նախագահը, որը, ինչպես նաեւ Եվրոպայի Խորհուրդը, հուսով եմ, տեղյակ են, որ իրենք հիմա միջոցառում են կազմակերպել մի Սահմանադրական դատարանի հետ, որը ձեւավորվել է սահմանադրական փոփոխությունների արդյունքում, որը Վենետիկի հանձնաժողովի հետ ոչ միայն չի քննարկվել, այլ ընդունվել է ընդամենը պառլամենտի ՔՊ-ական խմբակցության կողմից՝ չորս ժամվա ընթացքում՝ շրջանցելով Սահմանադրական դատարան դիմելու իմպերատիվ պահանջը։ Սա բացարձակ ապօրինություն է»։

Գործիչը նաեւ նշել է, որ խորհրդաժողովում քննարկում են դատական համակարգի ժողովրդավարական ինստիտուտներին վերաբերող հարցեր՝ չհրավիրելով անգամ Դատավորների միության նախագահին, փաստաբանական համայնքի որեւէ ներկայացուցչի, որ իրենց ներկայացնի, թե ինչ իրավիճակ է տիրում դատական համակարգում»։

«Այսինքն՝ այն, ինչ հիմա տեղի է ունենում, զավեշտ է»,- նշել է Էդգար Ղազարյանը։

Աղբյուր` Փաստինֆո