Փաստ ինֆո

Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, հետաձգեց ԱԺ «Հայաստան» խմբակցության պատգամավոր, «Իզմիրլյան» ԲԿ նախկին տնօրեն Արմեն Չարչյանի գործով ապացույցներն անթույլատրելի ճանաչելու մասին միջնորդության լուծումը։ Ինչպես արդեն տեղեկացրել ենք՝ պաշտպան Էրիկ Ալեքսանյանը միջնորդություն է ներկայացրել՝ պահանջելով քրեական գործով ձեռք բերված բոլոր ապացույցները ճանաչել անթույլատրելի՝ նկատի ունենալով, որ քրեական գործը հարուցվել է անանուն աղբյուր հանդիսացող տելեգրամյան ալիքում հրապարակված տեսանյութի հիման վրա՝ մամուլի զեկուցագրի հիման վրա։ Դատախազ Ազատ Մարգարյանն առարկեց միջնորդության դեմ՝ նշելով, որ միջնորդությունը ենթակա է մերժման։ Լսելով կողմերին՝ դատարանը որոշեց հետաձգել միջնորդության լուծումը՝ նշելով, որ հարցին կանդրադառնա վերջնական դատական ակտում։

Գործում առկա տեսագրությունները հետազոտելու համար տեխնիկական միջոցներ առկա չէին, տեսագրությունները կհետազոտվեն հաջորդ դատական նիստին՝ հուլիսի 8-ին, ժամը՝ 15։00-ին։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։ Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։

Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։ Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ֊ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը մասամբ բավարարվել էր դատավոր Արմինե Մելիքսեթյանի կողմից։ Քրեական գործն այժմ գտնվում է դատավոր Վահե Միսակյանի վարույթում։

Հեղինակ՝ Իզաբել Սահակյան

Աղբյուր` Փաստինֆո