Փաստ ինֆո

Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, մեկնարկել է ԱԺ «Հայաստան» խմբակցության պատգամավոր Արմեն Չարչյանի գործով դատական նիստը։ «Փաստինֆո»-ի թղթակցի հաղորդմամբ՝ գործը գտնվում է ապացույցների հետազոտման փուլում։ Դատական նիստին ներկայացել են նաև երկու վկա, որոնց հարցաքննությունը նախատեսված է այսօր՝ գործում առկա գրավոր ապացույցների հրապարակումից հետո։ Պաշտպան Էրիկ Ալեքսանյանն ուշադրություն հրավիրեց այն հանգամանքին, որ առաջին ատյանի դատարանը, քննելով Արմեն Չարչյանի ձերբակալման իրավաչափության հարցը, արձանագրել է, որ տելեգրամյան ալիքով տարածված ձայնագրությունը անհայտ աղբյուրից է, իսկ անհայտ աղբյուրից ձեռք բերված տվյալը հիմք չէ անձի ազատության իրավունքը սահմանափակելու համար։ Ընդ որում՝ դատական ակտը չի վիճարկվել քրեական հետապնդման մարմինների կողմից, հետևաբար, ըստ Ալեքսանյանի, քրեական հետապնդման մարմինները ևս համամիտ են, որ տելեգրամյան ալիքում հրապարակված տեսանյութը համարվում է անհայտ աղբյուրից ձեռք բերված։ Բացի այդ՝ փաստաբանը հիշեցրեց, որ քրեական գործի հարուցման համար հիմք է հանդիսացել տելեգրամյան ալիքում հրապարակված տեսանյութը, ընդ որում, ՀՔԾ մամուլի քարտուղարի զեկուցագրի հիման վրա, հետևաբար, դա չէր կարող դիտարկվել որպես օրինական առիթ՝ քրգործ հարուցելու համար։

Նկատի ունենալով, որ անհայտ աղբյուրից ձեռք բերված ապացույցը չի կարող ճանաչվել թույլատրելի՝ պաշտպանը միջնորդություն ներկայացրեց՝ ապացույցն անթույլատրելի ճանաչելու մասին, թեև մեղադրող դատախազն առարկել էր միջնորդություն ներկայացնելուն՝ նշելով, որ մինչդատական վարույթում պաշտպանության կողմը նման միջնորդություն ներկայացվել է, որն ինքը մերժել է, պաշտպանը հակադարձեց՝ նշելով, որ մինչդատական վարույթում ներկայացվել էր քրեական գործ հարուցելու որոշումը վերացնելու մասին, այլ ոչ թե՝ անթույլատրելի ապացույց ճանաչելու մասին։ Պաշտպանը ներկայացրեց միջնորդությունը՝ նշելով, որ ի սկզբանե չի պահպանվել ապացույցի ձեռք բերման պատշաճ սուբյեկտի կանոնը։ Պաշտպանը նկատեց՝ վարույթի հարուցումն ի սկզբանե եղել է ոչ իրավաչափ, հետևաբար, ձեռք բերված ապացույցները չեն կարող դիտվել որպես թույլատրելի։ «Իմ խնդիրը չէ, որ քննիչը զեկուցագրի հիման վրա նյութեր է նախապատրաստել, հետո անհայտ աղբյուրից ձեռք բերված տեսանյութի հիման վրա հարուցել քրեական գործ, հետո նոր միայն դատախազությունն ուղարկել է իրենց այդ նյութերը»,- նշեց Ալեքսանյանը՝ պահանջելով քրեական գործով բոլոր ապացույցները ճանաչել որպես անթույլատրելի։

Դատախազը առարկեց միջնորդության դեմ՝ պահանջելով մերժել այն։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։ Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։ Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։ Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ֊ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը մասամբ բավարարվել էր դատավոր Արմինե Մելիքսեթյանի կողմից։ Քրեական գործն այժմ գտնվում է դատավոր Վահե Միսակյանի վարույթում։

Հեղինակ՝ Իզաբել Սահակյան

Աղբյուր` Փաստինֆո