Փաստ ինֆո

Արտակարգ դեպք է գրանցվել Երեւանում. բռնություն է գործադրվել կանչի հիման մեկնած շտապօգնության բժշկի նկատմամբ։

«Հունիսի 6-ին հերթական կանչը գրանցվեց, Զեյթուն համայնքից էր՝ Մինաս Ավետիսյան փողոցից։ Տեղ հասանք, մտանք բնակարան, մեզ տեղեկացրին, որ հիվանդը գանգատվում է ճնշման բարձրացումից: Ինչպես սովորաբար լինում է՝ չափում եմ հիվանդի ճնշումը ու բուժքրոջս խնդրում եմ հավաքի համապատասխան դեղորայքը: Նույն սենյակում՝ անմիջապես հարևան մահճակալին, մի տղամարդ էր նստած (Վարդան Պետրոսյան), լուռ էր։ Երբ արդեն պատրաստվում էի ներերակային ներարկում կատարել, այդ մարդը եկավ, կանգնեց լուսամուտի առաջ, փակեց լույսը։ Հարցրեցի՝ հայրիկ ջան, ինչո՞ւ եք կանգնել այստեղ, ասաց՝ պետք է հետևի ողջ ընթացին։ Ասեցի՝ բժի՞շկ եք, պատասխանեց՝ ոչ, բայց ինձանից շատ բան գիտի։ Խնդրեցի, գոնե, մյուս կողմից կանգնի և հետևի, որովհետև լույսի աղբյուրը փակվում էր։

Այս անգամ գնաց, մտավ հիվանդի ու բուժքրոջ արանքը և փորձեց խանգարել նրա աշխատանքին»,- «Փաստինֆո» լրատվականի հետ զրույցում պատմում է հունիսի 6-ին ծեծի ենթարկված Շտապօգնության 1-ին ենթակայանի Արաբկիրի գծային բաժնի աշխատակից Լևոն Կարապետյանը՝ ավելացվելով, որ նշված հասցեից կրկնակի կանչ է եղել, դրանից մեկ ժամ առաջ մեկ այլ բրիգադ կրկին մոտեցել է նշված հասցեով, սպասարկել, իսկ հեռանալուց, կրկին, միջադեպ է գրանցվել։

Բժիշկը պատմում է՝ հիվանդը, ողջ սպասարկման ընթացքում, ագրեսիվ վարք չի ցուցաբերել, սակայն, ինչ – որ պահից սկսած, անպարկեշտ պահվածով է աչքի ընկել ամեն ինչ տեսնել ցանկացող քաղաքացին, որը փորձել է խանգարել բուժքրոջը, սկսել փնովել բուժանձնակազմի կատարած աշխատանքը, բուժաշխատակիցներին և համակարգը։ Բժշկական պատշաճ օգնություն ցուցաբերելուց հետ, բուժանձնակազմը պատրաստվել է հեռանալ, սակայն, իրադարձությունները անցանկալի զարգացում են գրանցել։

«Ննջասենյակում ներկա գտնվող տղամարդը, որը կլիներ մոտ 60 տարեկան, ալկոհոլի ազդեցության տակ, մոտենում է ինձ, նախ՝ ձեռքով անկանոն շարժումներ է կատարում, հետո հարվածում դեմքիս։ Հասցնում եմ մի կողմ հրել բուժքրոջը, որ, հանկարծ, հարվածները նրան ևս չդիպչեն։ Դուրս եկանք տանից, ու զանգահարեցի ոստիկանություն,ինչպես նաև՝ դեպքի վերաբերյալ տեղյակ պահեցի վերադասիս»,- ասել է բժիշկ Լևոն Կարապետյանը և հավելել՝ Ոստիկանությունն արագ և օպերատիվ արձագանքել է զանգին, բռնություն գործադրած անձը բերման է ենթարկվել Ոստիկանական բաժանմունք և բացատրություն տվել։

Նշանակվել է նաև դատաբժշկական փորձաքննություն։

Աղբյուր` Փաստինֆո