Փաստ ինֆո

Երևանում իրականացվող ակցիաների ընթացքում ոստիկանության և ԱԱԾ ծառայողների կողմից առերևույթ ոչ իրավաչափ գործողություններ կատարելու, քաղաքացիների նկատմամբ բռնություն գործադրելու դեպքերի առթիվ հարուցվել է շուրջ չորս տասնյակ քրեական գործ, սակայն դրանց շրջանակներում որևէ անձի դեռևս մեղադրանք չի առաջադրվել։ Այս մասին «Փաստինֆո»-ի գրավոր հարցմանն ի պատասխան հայտնել են ՀՀ գլխավոր դատախազությունից։

Մասնավորապես, գրավոր հարցում էինք ուղարկել ՀՀ գլխավոր դատախազություն՝ պարզելու, թե Երևանում իրականացվող ակցիաների ընթացքում ոստիկանության ծառայողների կողմից առերևույթ ոչ իրավաչափ գործողություններ կատարելու, քաղաքացիների նկատմամբ բռնություն գործադրելու, պաշտոնեական լիազորություններն առերևույթ անցնելու դեպքերի առթիվ քանի քրեական գործ է հարուցվել, քանի ոստիկանի է մեղադրանք առաջադրվել և ինչ հատկանիշներով, ինչ խափանման միջոց է կիրառվել նրանց նկատմամբ, քանի ծառայողի լիազորություն է կասեցվել, արդյունքում պարզվեց՝ քրեական գործերով որևէ ոստիկան դեռևս մեղադրյալի կարգավիճակ չունի, նրանցից որևէ մեկի լիազորությունները կասեցված չեն։

Այսպես, ՀՀ գլխավոր դատախազությունից ստացված պատասխանի համաձայն՝ զանգվածային անհնազանդության ակցիաների մեկնարկից ի վեր (25.04.22թ.) ՀՀ ոստիկանության և ՀՀ ազգային անվտանգության ծառայության համապատասխան աշխատակիցների՝ առերևույթ հանցագործության հատկանիշներ պարունակող ենթադրյալ ոչ իրավաչափ գործողությունների փաստերով ՀՀ հակակոռուպցիոն կոմիտեում, ՀՀ ԱԱԾ քննչական դեպարտամենտում և ՀՀ քննչական կոմիտեում ստացվել է 74 հաղորդում, որոնցից 64-ը՝ Հակակոռուպցիոն կոմիտեում, 9-ը՝ ԱԱԾ-ում, 1-ը՝ ՔԿ-ում։ Ներկայացված հաղորդումներից 39-ով որոշում է կայացվել քրեական գործ հարուցելու մասին, որոնցից 34-ը՝ Հակակոռուպցիոն կոմիտեում, 5-ը՝ ԱԱԾ-ում։ Հաղորդումներից 21-ով (ՀՀ ՀԿԿ՝ 16, ՀՀ ԱԱԾ՝ 4, ՀՀ ՔԿ՝ 1) որոշում է կայացվել քրեական գործի հարուցումը մերժելու մասին, իսկ 14 հաղորդումների հիման վրա Հակակոռուպցիոն կոմիտեում դեռևս նյութեր են նախապատրաստվում, որոնցից 5-ը վերաբերում են 2022թ հունիսի 3-ին զանգվածային անհնազանդության ակցիայի ընթացքում տեղի ունեցած դեպքերին։

Նույն աղբյուրի փոխանցմամբ՝ քրեական գործերից 1-ը հարուցվել է ՀՀ քրեական օրենսգրքի 121-րդ հոդվածի 1-ին մասով (Անզգուշությամբ մեկ ուրիշի առողջությանը միջին ծանրության վնաս պատճառելը), 4-ը՝ ՀՀ քրեական օրենսգրքի 308-րդ հոդվածի 1-ին մասով (պաշտոնեական լիազորությունները չարաշահելը) և 309-րդ հոդվածի 2-րդ մասով (Պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով), 20-ը՝ ՀՀ ՔՕ 309-րդ հոդվածի 2-րդ մասով (Պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով), 2-ը՝ ՀՀ ՔՕ 309.1-րդ հոդվածի 1-ին մասով (խոշտանգումը), 2-ը՝ ՀՀ քրեական օրենսգրքի 309.1-րդ հոդվածի 2-րդ մասի 1-ին կետով (երկու կամ ավելի անձանց նկատմամբ խոշտանգման), 9-ը՝ ՀՀ ՔՕ 309.1-րդ հոդվածի 2-րդ մասի 4-րդ կետով (մի խումբ անձանց կամ կազմակերպված խմբի կողմից խոշտանգման), 1-ը՝ ՀՀ ՔՕ 332.3-րդ հոդվածի 3-րդ մասով (պաշտոնեական դիրքն օգտագործելով փաստաբանի գործունեությանը միջամտելը):

«Կասկածյալի կամ մեղադրյալի դատավարական կարգավիճակ ունեցող անձինք նախաքննության ներկա փուլում դեռևս առյա չեն, հետևաբար նաև որևէ անձի նկատմամբ խափանման միջոց չի ընտրվել։

Նկատի ունենալով, որ ՀՀ քրեական դատավարության օրենսգրքի 152-րդ հոդվածի (լիազորությունների կասեցումը հեղ.) կարգով նշված հարկադրանքի միջոցը կարող է կիրառվել միայն կասկածյալի կամ մեղադրյալի նկատմամբ, մինչդեռ հիշյալ քրեական գործերով դեռևս այդպիսի կարգավիճակ ունեցող անձինք առկա չեն, ուստի, նշված դատավարական հարկադրանքի միջոցը չի կիրառվել։

Հարկ է նշել նաև, որ քրեական վարույթ նախաձեռնելու առիթ են հանդիսացել զանգվածային լրատվության միջոցներում տեղ գտած հրապարակումները, քաղաքացիների, ԱԺ պատգամավորների, ՀՀ մարդու իրավունքների պաշտպանի և փաստաբանների հաղորդումները և պաշտոնական գրությունները»,- հայտնել են դատախազությունից։

Հեղինակ՝ Իզաբել Սահակյան

Աղբյուր` Փաստինֆո