Փաստ ինֆո

ԶՈՒ ԳՇ պետը մարտական գործողությունների ժամանակ դառնում է գործողությունների ղեկավարը, պատերազմի ժամանակ իրավունք ունի առանձին որոշում կայացնելու, գործելու՝ առանց ՊՆ նախարարի հետ խորհրդակցելու, իսկ ԶՈՒ ԳՇ պետի պաշտոնում ՊՆ նախարարի տեղակալին նշանակելու պատճառը ԳՇ պետին ավելի կախյալ վիճակում դնելն է։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը՝ նշելով, որ ԳՇ պետի վրա ազդել չեն կարող, իսկ ՊՆ նախարարի տեղակալի վրա կարող են։ Նշենք, որ ՀՀ պաշտպանության նախարար Սուրեն Պապիկյանը երեկ Հանրային հեռուստաընկերությանը տված հարցազրույցում հայտարարել է, որ նախատեսվում են կառուցվածքային փոփոխություններ, որի արդյունքում լինելու է նոր մոդել, ըստ որի՝ ԶՈՒ գլխավոր շտաբի պետը կլինի պաշտպանության նախարարի առաջին տեղակալը:

«Հիմա ավելի մեծ կախման մեջ կդնեն Գլխավոր շտաբն ու բանակը»,- արձագանքելով պաշտպանության նախարարի հայտարարությանը՝ նշել է Եղիազարյանը՝ ընդգծելով, որ ԳՇ պետի պաշտոնը քաղաքական պաշտոնի են վերածում՝ հեշտ կառավարելի դարձնելու համար։

Նրա դիտարկմամբ՝ եթե ԳՇ պետը նորմալ մարդ է, կարող է արդյունավետ արդյունք ցույց տալ պատերազմական գործողությունների ժամանակ, չենթարկվել նախարարին, քանի որ նախարարը քաղաքացիական անձ է, իսկ տեղակալի նշանակման պարագայում կարող են ազդել վերջինիս վրա։

«Օրինակ, այս դիրքերը ԳՇ պետը չի հանձնում, ասում է՝ պետք է պաշտպանել, նախարարը չի կարող ասել՝ հանձնիր, որովհետև ամբողջ պատասխանատվությունը ԳՇ պետի վրա է, իսկ տեղակալի նշանակման դեպքում կարող է ազդել, քանի որ ինքը նախարարն է։ Բանակը, սպայական, զինվորական կազմն ավելի մեծ կախվածության մեջ դնելու նպատակ է հետապնդում»,- նշեց Եղիազարյանը։

Ինչ վերաբերում է այն հանգամանքին, որ առ այս պահը ՀՀ ԶՈՒ ԳՇ-ն դեռևս պետ չունի, Եղիազարյանը նշեց՝ ԳՇ պետ մինչ այս պահը չունենք, որովհետև կամակատար ԳՇ պետ չեն կարողանում գտնել։ Բացի այդ՝ պաշտոնը նաև թույլ չի տալիս ԳՇ պետին՝ կամակատար լինելու, քանի որ ԳՇ պետը անմիջականորեն պատասխանատու է, գուցե հրահանգներ լինեն, որոնք չի կատարի, այժմ սահմանազատման աշխատանքներ են իրականացվում, հետևաբար՝ իրենց պետք են կամակատարներ։

Աղբյուր` Փաստինֆո