Փաստ ինֆո

Հունիսի 3-ին Կառավարական ամառանոցներին հարող տարածքից հեռանալ պատրաստվող քաղաքացիների նկատմամբ՝ Պռոշյան-Դեմիրճյան փողոցների խաչմերուկում, ոստիկանության ծառայողների կողմից ոչ իրավաչափ գործողությունների, այդ թվում՝ օրենքի խախտմամբ հատուկ միջոցներ կիրառելու դեպքի առթիվ քրեական գործ չի հարուցվել։ ՀՀ գլխավոր դատախազությունից «Փաստինֆո»-ի հարցին ի պատասխան հայտնել են, որ մամուլի մշտադիտարկման արդյունքում առանձնացրել են մի քանի հրապարակում՝ հունիսի 3-ի իրադարձությունների ընթացքում ոստիկանների կողմից հնարավոր ոչ իրավաչափ գործողությունների, բռնություններ գործադրելու վերաբերյալ առերևույթ տվյալներ պարունակող, դրանք դարձվել են ուսումնասիրության առարկա։ Նույն աղբյուրի փոխանցմամբ՝ դրանք ուղարկվել են նախաքննական մարմին՝ դրանցով քննություն իրականացնելու, ընթացքը լուծելու համար։

«Այդ շրջանակներում քննության առարկա կդարձվի նաև ոստիկանության կողմից հատուկ միջոցների կիրառման իրավաչափությունը»,- հայտնեցին դատախազությունից։

Հիշեցնենք, որ հունիսի 3-ին ԱԺ ընդդիմադիր խմբակցությունների կողմից հրավիրվել էր արտահերթ նիստ՝ Արցախի հարցով հայտարարություն ընդունելու օրակարգով, ինչը, սակայն, տապալվել է՝ իշխող ուժի չներկայանալու պատճառով։ Չորս ժամ ժամանակ էր տրվել՝ նույն օրակարգով կրկին նիստ հրավիրելու համար, որը կրկին չի կայացել։ Քաղաքացիները քայլերթով շարժվել են նախ դեպի Կառավարություն, ապա ՝ կառավարական ամառանոցներ, որտեղ նրանց արդեն «դիմավորել» են ոստիկանական մեծաթիվ ուժեր, ավելին, ոստիկանության ծառայողները շրջափակման մեջ էին վերցրել քաղաքացիներին՝ փակելով փողոցները և փաստացի թույլ չտալով, որ վերջիններս շարունակեն քայլերթը ու հեռանան տարածքից։ Ոստիկանության ծառայողների կողմից անհամաչափ ուժի կիրառմանը զուգահեռ կիրառվել են նաև հատուկ միջոցներ՝ լուսաձայնային նռնակներ, ընդ որում՝ առանց նախապես զգուշացնելու։ Շրջանառվող տեղեկությունների համաձայն՝ նշված նռնակները նաև ժամկետանց են եղել։ Դեպքի օրը տուժել է առնվազն 60 քաղաքացի, այդ թվում՝ ոստիկանության ծառայողներ։ Վիրավորների մեծ մասը ստացել են բեկորային վնասվածքներ՝ հատուկ միջոցների կիրառման հետևանքով։

Հեղինակ՝ Իզաբել Սահակյան

Աղբյուր` Փաստինֆո