Փաստ ինֆո

Երեկ ժողովրդի նկատմամբ օգտագործվել են նռնակներ, կիրառվել խայտառակ անհամաչափ ոստիկանական ուժ՝ ինչը, կարծում եմ, լավ եք պատկերացնում, որ առանց Նիկոլ Փաշինյանի ուղիղ հրահանգի չէր կարող իրականացվել։ Անդրադառնալով երեկվա դեպքերին՝ այդ մասին Ֆրանսիայի հրապարակում ասաց ԱԺ «Հայաստան» խմբակցության պատգամավոր Արամ Վարդևանյանը։

«Ոստիկանական խմբերը՝ 7-8 ոստիկաններով, շրջապատում էին 1-2 քաղաքացու և ծեծում էին, բառացիորեն ծեծում էին։ Ասում են, թե ոստիկանները ևս մարմնական վնասվածքներ են ստացել։ Պատկերացրեք՝ տեսնում եք, թե ինչպես են 7-8 հոգով 1-2 հոգու ծեծում․ ի՞նչ կանեք դուք։ Ես շատ դեմ եմ բռնությանը, բայց մի պահ պատկերացրեք այդ իրավիճակը։ Կնոջ են ծեծել 7-8 ոստիկանով, գլխին հարվածել՝ գցել են գետնին։ Կողքից տեսնողն ի՞նչ կանի։ Ոստիկանության ծառայության մասին ոչ մի օրենք կամ նորմ ծեծելու իրավունք չի տալիս․ ոստիկանը կարող է բերման ենթարկել, բայց ոչ ծեծել քաղաքացուն»,-ասաց պատգամավորը։

Ոստիկանների՝ երեկ ցուցաբերած վարքագծի պատճառը, Վարդևանյանի համոզմամբ, իշխանության պրկված նյարդերն են, երբ ՀՀ-ի և Արցախի հարցում ժողովրդին խաբելու տեղ այլևս չունի։

«Քաղաքացիներին վահաններով ծեծում էին․ ինքս եմ ականատես եղել։ Ինձ ևս փորձել են վահանով խփել։ Մարդիկ են եղել, որոնց ատամներն են ջարդել, քիթն են ջադել։ Մարմնական վնասվածքներ են ստացել հարյուրավոր քաղաքացիներ։ Պատգամավորներից մի քանիսը ևս վնասվածքներ են ստացել, մասնավորապես՝ կողոսկրի վնասվածք, սալջարդեր։ Պատկերացնո՞ւմ եք՝ մարդուն վնասազերծած՝ ձեռքերը ոլորած տանում էին, երեք ոստիկանով մոտեցան ու սկսեցին ծեծել։ Օպերատորին գետնին տապալելով՝ ոստիկանը ձեռքից վերցրել է շտատիվը և սկսել դրանով ծեծել քաղաքացիներին։ Դա ոստիկանի վարքագի՞ծ է»,-ասաց պատգամավորն ու զգուշացրեց, որ թեկուզ իր համար շատ անցանկալի կլինի դա, բայց ոստիկանները պետք է գիտակցեն, որ այսուհետ նման վարքագիծ դրսևորելու դեպքում իրենց նկատմամբ բռնությունը դառնալու է անհրաժեշտ պաշտպանության վիճակ։

Աղբյուր` Փաստինֆո