Փաստ ինֆո

Արցախի իշխանությունները բանակցություններ են վարում Երևանի հետ՝ Արցախի անկախության ճանաչման ուղղությամբ, բայց դեռևս որևէ տեղաշարժ չկա։ Այդ մասին РИА новости-ին տված հարցազրույցում հայտարարել է Արցախի պետական նախարար Արտակ Բեգլարյանը։

Պետնախարարի գնահատմամբ՝ Հայաստանը փաստացի ճանաչել է Արցախի անկախությունը, քանի որ երկու հանրապետությունները հարաբերվում են՝ ինչպես հավասարը հավասարի հետ։

Ռուսական լրատվամիջոցի ներկայացուցչի հետ զրույցում Բեգլարյանն անդրադարձել է նաև 44-օրյա պատերազմում ադրբեջանական կողմից Արցախի դեմ նետված ահաբեկչական խմբավորումներին՝ շեշտելով, որ դրանց մի մասը հետագայում տեղափոխվել է Ուկրաինա․
«Արցախի իշխանությունները տեղեկություններ ունեն, որ ադրբեջանական կողմից 5-7 հազար սիրիացի և լիբիացի գրոհային է կռվել Արցախի դեմ։ Մեծ հավանականություն կա, որ Արցախի դեմ սանձազերծված պատերազմին մասնակցած ահաբեկչական խմբավորումներն այսօր կռվում են Ուկրաինայում՝ ընդդեմ Ռուսաստանի։ Արցախի իշխանությունները նաև տեղեկություններ ունեն, որ այդ ահաբեկչական խմբավորումները Սիրիայում ևս կռվել են ռուսական զորքերի դեմ»։

Արցախի պետնախարարը շեշտել է, որ փողի դիմաց Արցախի դեմ կռված ահաբեկչական խմբավորումների մի մասը շարունակում են մնալ Արցախի՝ Ադրբեջանի կողմից բռնազավթված տարածքներում։

Կարևորագույն հարցերից մեկը, որին РИА новости-ին տված հարցազրույցում անդրադարձել է Արտակ Բեգլարյանը, Արցախում ռուս խաղաղապահների ներկայությունն է։

«Քանի դեռ ղարաբաղյան հակամարտությունը կարգավորված չէ, մենք գտնում ենք, որ ռուս խաղաղապահները պետք է Արցախում մնան անժամկետ։ Ներկա դրությամբ առավելևս նրանց ներկայությունը խիստ անհրաժեշտություն է»,-նշել է Բեգլարյանը և պարզաբանել, որ դրա անհրաժեշտությունը պայմանավորված է նրանով, որ Ադրբեջանը պատրաստ չէ բանակցել հետևյալ երեք կարևորագույն սկզբունքների հիման վրա՝ տարածքային ամբողջականության, ազգերի ինքնորոշման իրավունքի և ուժի ու դրա սպառնալիքի չկիրառման»,-РИА новости-ի փոխանցմամբ՝ ասել է Բեգլարյանը։

Տեսանելի ապագայում հիմնախնդրի կարգավորման որևէ հնարավորություն, ըստ Բեգլարյանի, չկա և չի էլ լինի՝ քանի դեռ Ադրբեջանի համար այդ հարցը «պրեստիժի» և աբմիցիաների հարց է, մինչդեռ Արցախի բնակչության համար դա կա ու կլինի կյանքի և մահվան, գոյության և պատմական արդարության հարց։

«Երբ որ ղարաբաղյան հիմնախնդիրը կարգավորվի, այն ժամանակ Լեռնային Ղարաբաղն ու Ռուսաստանը կարող են վերանայել տարածաշրջանում ռուս խաղաղապահների ներկայության հարցը։ Իրավիճակից կախված՝ նրանք կարող են և մնալ՝ որպես անվտանգության երաշխավոր։ Բայց ներկա դրությմաբ ռուս խաղաղապահների ներկայությունն Արցախում խիստ անհրաժեշտություն է»- ընդգծել է Արտակ Բեգլարյանը։

Աղբյուր` Փաստինֆո