Փաստ ինֆո

Գործող իշխանությունը պետք է հեռանա, նրանք հայտնվել են Հայաստանի Հանրապետության կառավարման տիրույթում՝ հատուկ նպատակով, որն էլ իրականացնում են, նրանք ուղղորդվում են շահագրգիռ ներքին և արտաքին ուժերի կողմից: «Փաստինֆո»-ի հետ զրույցում նման տեսակետ է հայտնել «Ալյանս» կուսակցության նախագահ Տիգրան Ուրիխանյանը՝ նշելով, որ իշխանության օր առաջ հեռացումը restart-ի հնարավորություն կտա Հայաստանի պետականության և Արցախի գոյատևման համար:

Վերջինս, թեև կողմ է իշխանության դեմ պայքարին, բայց կարծում է, որ «այդ պայքարը պետք է իրականացվի ոչ թե նախկինում կառավարած, կառավարումը տապալած, ժողովրդի մոտ դժգոհություն առաջացրած և դրա համար «նիկոլիզմ» բերած ուժերի կողմից, այլ այն ուժերի կողմից, որոնք իրավունք ունեն դժգոհելու այսօրվա իրավիճակից».
«Մեր կուսակցության ձայնը, կարծում եմ, առավել քան արդարացի է, քանի որ մենք հնարավորություն ենք ունեցել համագործակցելու գործող իշխանության հետ, բայց մերժել ենք,այդ թվում այն ժամանակ, երբ ներքաղաքական կյանքը համեմատաբար կայուն էր»,-հավելեց Ուրիխանյանը:
Ըստ քաղաքական գործչի՝ այն, ինչ այսօր տեղի է ունենում փողոցում, ասոցացվում է նախկինների հետ, հետևաբար, զսպաշապիկի դեր է կատարում հասարակության որոշ հատվածի համար, բայց մեր զրուցակիցը կարծում է, որ ժողովուրդը պետք է դուրս գա փողոց՝ անտեսելով նախկինների գործոնը և իշխանությունից հեռացնի գործողներին.
«Հասարակության մեջ կան մարդիկ, որոնք որոշ պատճառներով ՝ինչ-որ դեմքերի, կարգախոսների, օրակարգերի, փողոց դուրս չեն գալիս, շարժման առաջնորդներն էլ են սա գիտակցում, ապա ինչու՞ չեն անում այն բաները, որոնք պետք են՝ հաջողության հասնելու համար և ինչո՞ւ են անում այն բաները, որոնք պետք չեն հաջողության հասնելու համար: Լավ, մենք կոչ ենք անում մարդկանց որ մասնակցեն ակցիաներին, մեր թիմակիցները, Երիտասարդական թևը, մարզային մի քանի կառույցներ մասնակցում են դրանց, բայց մենք դժվարանում ենք մարդկանց բացատրել՝որքա՞ն կարելի է կրիմինալ, ածականավոր մարդկանց հետ ուս-ուսի տված մասնակցեն դրան, տեղի ունեցողը մարդկանց կողմից միանշանակ չի ընկալվում»,-ասաց Տիգրան Ուրիխանյանը:
Անդրադառնալով «Հայաստան» և «Պատիվ» ունեմ խմբակցությունների՝ հայ-ադրբեջանական եւ հայ-թուրքական հարաբերությունների կարմիր գծերի վերաբերյալ հայտարարության նախագծին և դրա շուրջ քննարկումներին, «Ալյանս» կուսակցության ղեկավարը վրդովված նշեց.
«Ցավոք սրտի, մեզ որևէ մեկը չի առաջարկել միանալ-չմիանալ, ես տեսա, որ արտախորհրդարանական ուժերին հրավեր եղել է, բայց մեզ չեն էլ բարեհաճել հրավիրել՝ նշանակություն չտալով, հետևաբար մենք որևէ առնչություն չունենք դրա հետ»,-ասաց նա:
Զրուցակիցն, այնուամենայնիվ, ընդգծեց, որ ընդդիմության հեղինակած փաստաթղթում ամրագրված սկզբունքներն ամբողջությամբ ընդունելի են իրենց համար.

«Հայ մարդու լեզուն էլ չի պտտվում ասել, որ այդ սկզբունքներն ընդունելի չեն, ես զարմանում եմ, որ պետական պաշտոնյաները, որոնք պետական կառավարման մեջ տեղ ունեն, փող են ստանում, որ պետություն պահեն ու վախենում են այդ ձևակերպումներն արտահայտել կամ բացառել, նրանց բոլորին պետք է վտարել պետական համակարգից՝ առնվազն մոտակա 10 տարին արգելելով պետության հետ առնչություն ունենալ »,-ասաց Տիգրան Ուրիխանյանը;

Աղբյուր` Փաստինֆո