Փաստ ինֆո

«Հաղթանակ» թաղամասի բնակիչները կառավարության շենքի դիմաց են, պահանջում են ժառանգություն ստացած իրենց հողերի սեփականաշնորհման գործընթացը չձգձգել։ Կառավարությունը 1990-ականներին օգտագործման համար հող է հատկացրել նրանց, բայց հիմա սեփականության վկայականի տրամադրման հետ կապված խնդիրներ են առաջացել, և բնակիչները չեն կարողանում կառուցապատման կամ գյուղատնտեսական աշխատանքներ իրականացնել:

«Հիմնական մեր բողոքը՝ հողերի հետ կապված թանկացումների վերաբերյալ է։ Ժողովուրդը հիմա իր վրդովմունքը հայտնելով հավաքվել է, որ հարցերի պատասխան ստանա՝ ինչի հաշվին է կատարվել թանկացումները՝ առանց հանրությանը տեղյակ պահելու։ Ավելի են բարդացրել բնակչության իրավիճակը, հողերի կարգավիճակը վերցրել են և այգեգործական կարգավիճակը փոխելու համար քաղաքացին նախկինում պետք է վճարեր 2500 դրամ, հիմա պետք է վճարի 10500 դրամ, քանի որ նախկինում եղել է այգեգործական և քաղաքի մեջ եղել է ադմինիստրատիվ տարածքներ, որոնք ունեցել են այգեգործական նպատակով հողեր։ 2010թ վարչապետի հրամանագրով բոլոր կարգավիճակները փոխվել են և անցել բնակելի կառուցապատման»,- լրագրողների հետ զրույցում ասաց իրավաբան Սամվել Գաբրիելյանը՝ հավելելով, որ քաղաքացիներին անպատասխանատու ձևով մեծ գումարային ծախսերի տակ են դնում, քաղաքացիները վաճառում են իրենց ունեցվածքը, որպեսզի նախկինում իրենց անցած գույքը տնօրինի, տիրապետի։

Ակցիայի մասնակիցները մտավախություն ունեն, որ մի օր կարող են ասել, որ այդ հողը տնօրինողն իրենք չեն։ Կառավարությունից հայտնեցին, որ հարցը կքննարկվի վարչապետի հսկողությամբ, և 15 օր հետո պատասխան կտան նրանց։ Ակցիայի մասնակիցները հայտարարեցին` եթե իրենց խնդրին լուծում չտրվի, ապա կսկսեն անհնազանդության ակցիաներ անել, փողոց փակել։

Աղբյուր` Փաստինֆո