Փաստ ինֆո

Ծաղիկներ ու փուչիկներից անդին՝ երեխաների իրավունքները պետք է առհասարակ   գիտակցորեն  պաշտպանված լինեն։ Այս մասին Ազգային ժողովում հայտարարեց ՀՀ ՄԻՊ Քրիստիննե Գրիգորյանը՝ արձագանքելով  ԱԺ փոխնախագահ Հակոբ Արշակյանի հայտարարությանը, թե երեկ՝ Երեխաների պաշտպանության միջազգային օրը, դեպքեր են արձանագրվել, որ ատելության խոսքը արտաբերվել է նաև երեխաների շուրթերով:

ՀՀ ՄԻՊ-ը վստահեցրեց, որ այդ դեպքերը չեն վրիպել նաև իրենց մոնիթորինգից։

«Այսօր մենք հայտարարություն ենք տարածել, օգտվել ենք բացված օրակարգից՝ մեկ անգամ ևս հիշեցնելու երեխայի լավագույն շահի մասին։ Մեր հայտարարության մեջ հստակ ենք ասել, որ երեխաների կարծիքի ազատ արտահայտման, հավաքներին գիտակցված, տեղեկացված  մասնակցության իրավունքը, այո՛, բխում է լավագույն շահից, բայց նաև պետք է հասկանանք, որ այդ լավագույն շահից է բխում, որ երեխաների մասնակցությունը չօգտագործվի մեծահասկաների կողմից իրենց կարծիքը արտահայտելու համար: Այսինքն՝ դա պետք է լինի երեխայի տարիքին, հասունությանը համապատասխան, գիտակցված մասնակցություն»,-ընդգծեց Քրիստիննե Գրիգորյանը:

ՔՊ-ական պատգամավոր Գևորգ Պապոյանն էլ նշեց, թե վերջերս սոցիալական ցանցերում հայտնի հոլովակ կար, մասնավոր մանկապարտեզներից մեկի սաներին՝ 4-5 տարեկան երեխաների, իր տպավորությամբ, կազմակերպված հանել էին դուրս, և երեխաները արտաբերում էին բառեր, որոնք նրանք ակնահայտորեն չէին կարող հասկանալ։

«Չի կարող 4-5 տարեկան երեխան հասկանալ, եզրակացություններ անել դրա մասին և գոռալ: Դա դասական ատելության խոսքի տարածում էր 4-5 տարեկան երեխաների կողմից։ Օրինակ՝ եթե դա իմ երեխային սովորեցրած լինենին, այդ կերպ նրան օգտագործեին, ես անկեղծ եմ ասում, դատի կտայի», - ասաց նա:
 
ՄԻՊ-ն էլ նշեց, որ այդ դեպքը նույնպես չի վրիպել իրենց մշտադիտարկումներից, ավելին՝ հայտարարությամբ անդրադարձել էին երևույթին։

«Ամենավտանգավոր բանը, որ տեսել էինք, այն էր, որ երեխաները, ում հնարավոր էր նույնականացնել այդ տեսանյութի մեջ, ուղղակիորեն դարձել էին թիրախավորման և ատելության խոսքի առարկա: Ակնհայտ էր, որ երեխաները խաղի տրամաբանությամբ ուղղակի կրկնում էին ինչ-որ բաներ, որոնց ամբողջ էությունը, իմաստը  չէին կարող գիտակցել», - ասաց նա:

ՄԻՊ-ի խոսքով՝ երեխայի ծնողները, խնամակալները, դաստիարակները, ուսուցիչները, այսինքն՝ օրենքով երեխայի համար պատասխանատու բոլոր անձինք պարտավոր են առաջնորդվել երեխայի շահով, Սահմանադրությամբ, ազգային օրենսդրությամբ երեխայի իրավունքները հստակ սահմանվել են։ Ըստ նրա՝ պետությունն էլ այստեղ մեծ անելիք ունի՝ իրազեկման։

«Տեսակետը, թե երեխաները որևէ կերպ չեն կարող հավաքների մասնակցել, թյուր կարծիք է։ Երեխաների՝ հավաքներին գիտակցված, տեղեկացված մասնակցության իրավունքը բխում է լավագույն շահից, բայց նաև լավագույն շահից է բխում, որ երեխաների մասնակցությունը չօգտագործվի մեծահասկաների կողմից իրենց կարծիքը արտահայտելու համար»,-կրկին ընդգծեց ՀՀ ՄԻՊ-ը։

Աղբյուր` Փաստինֆո