Փաստ ինֆո

Իշխող ՔՊ-խմբակն այնքան է խորացել իր պետականակործան գործողություների մեջ, որ նրանցից որևէ մեկը չի համարձակվում հայտարարել մեր կարմիր գծերը, որ Արցախը չի կարող լինել Ադրբեջանի կազմում, որ հնարավոր չէ ուժի սպառնալիքի ներքո սահմանազատում և սահմանագծում անել, Թուրքիայի հետ հարաբերություններ հաստատել՝ ցեղասպանությունն ուրանալով։ Որևէ մեկը չի համարձակվում արտաբերել այս խոսքերը, որովհետև ունեն մեկ բռնապետիկ՝ խղճուկ, սուտխոսան ղեկավար, որն այսօր դարձել է Հայաստանի չարիքը:Լրագրողների հետ զրույցում այսօր նման տեսակետ է հայտնել «Հայաստան» խմբակցության պատգամավոր Աղվան Վարդանյանը:
Ընդդիմադիր պատգամավորը կարծում է, որ ՔՊ-ականներից շատերն այսօր «գերության» մեջ են, նրանք հասկանում են, որ իրենց քաղաքական ուժը երկիրը տանում է կործանման, բայց չեն համարձակվում դուրս գալ ՔՊ-ից:

Աղվան Վարդանյանը անդրադարձավ նաև այս օրերին ոստիկանության գործողություններին՝ նկատելով, որ թեև ընդդիմադիր պատգամավորների հետ հանդիպմանը ոստիկանապետ Վահե Ղազարյանը խոստացել էր, որ ոստիկաններն այլևս բռնություն չեն կիրառի ցուցարարների նկատմամբ, սակայն ոստիկանապետն իր խոստումը չի պահել.

«Դա պատիվ չի բերում տղամարդուն, երբ խոսք է տալիս իր գործառույթներն անել, բայց չի անում, ամո՛թ է, պետք է գետինը մտնեք, որ ձեր խոստումը չեք կատարում»,-ասաց Վարդանյանը:

Պատգամավորն ընդգծեց՝ պետության կործանարար ընթացքի համար պատասխանատվություն են կրում նաև ԱԱԾ ղեկավարը և ԲԴԽ նախագահը.

«Արմեն Աբազյանը փոխանակ ազգային անվտանգություն ապահովի, պետական բյուջեից գումար է ստանում և այդ ամբողջ միջոցները ծախսում է մարդկանց հետապնդելու, մարդկանց գաղտնալսելու համար, որոշ ՔՊ-ականների անվտանգությունն ապահովելու համար, սա ԱԱԾ-ի գործառույթ չի, այն զառնիթափը, որով բռնապետիկը տանում է երկիրը, դրա համար, պարո՛ն Աբազյան, դուք ևս պատասխան եք տալու: Հաջորդը ԲԴԽ-ն է՝ Գագիկ Ջհանգիրյան սիրուն տղայի ղեկավարությամբ, որը դատարաններին է կառավարում և ապօրինի կալանավորում է մարդկանց, պարոն Ջհանգիրյանը, որքան էլ ճարպիկ լինի, պատասխան է տալու»,-ասաց Վարդանյանը:

Ընդդիմադիր պատգամավորն առաջարկեց պաշտոնաթող գեներալներին և գնդապետներին, ոստիկանության սպաներին խմբեր կազմեն և գնան ոստիկանապետի, ՊՆ նախարարի, ԱԱԾ-ի ղեկավարի և բացատրեն նրանց, որ պետություն են կործանում և անձնական պատասխանատվություն են կրում այս իրավիճակի համար:

Մանրամասները՝ տեսանյութում։

Աղբյուր` Փաստինֆո