Փաստ ինֆո

Հապա, հապա, չէինք իմացել, որ ՀՀ վարչապետի աթոռից կառչածի աշխատակազմի ղեկավարի աթոռին բազմածը բարոյականության և քաղաքակրթության սահմաններ է չափում, սահմանագծող-սահմանաչափող էտալոնի դեր է իրեն վերապահում։ Ավելին, հաթաթա է տալիս ընդդիմությանը, թե՝ բան է՝ եթե այսպես ու այնպես եք անում, ապա՝ «իշխանությունն էլ իր բարձրությունից դրան պետք է պատասխանի»։

Ավելին, սույնը նաև սպառնում է՝ « եթե ընդդիմությունը շարունակում է նույն կերպ գործել, պարզապես մերժման կենթարկվի»։

Տեղյա՞կ է, արդյոք կրթության, գիտության, մշակույթի և սպորտի ոլորտը հիմնավորապես քանդող, սորոսացնող, հայ մշակույթը՝ գենդերականության հետ շփոթող, «հայ գրականություն» առարկայի հայ բառից հրաժարվող, հայոց պատմությունն էլ՝ թուրք-ադրբեջանական տանդեմին հաճո՝ վերաձևողը, որ իրենց իշխանությունը մերժողների բանակը երկրաչափական պրոգրեսիայով է աճում։

Փաստը՝ ոչ միայն իրենցից վերջնականապես հիասթափվածների բանակն է, այլև «Գելափի» վերջին արդյունքներն են, այն նույն «Գելափի», որը կար ժամանակ՝ թավշյա իշխանությանը «դուխ տվող» թվեր էր հրապարակում։ Այդ թվերը, այսինքն, ՀՀ քաղաքացիների հույսերն ու սպասումները ոչ միայն չի արդարացրել, այլև մսխել է իշխանությունը։

Ոչ միայն մսխել է, այլև՝ աղետ է դարձել ողջ հայ ժողովրդի գլխին։ Պատերազմը տանուլ տված, Արցախի 75 տոկոսը թշնամուն նվիրած, 5000 երիտասարդի կյանքից զրկած, 119 ռազմագերիների ճակատագրին անհաղորդ, անհայտ կորածներով բնավ չհետաքրքրվող, ՀՀ սահմանները ամեն օր հօգուտ թշնամու բզկտող, թուրքերի հետ սիրախաղ անող այս իշխանությունը ամեն օր մի նոր աղետ է բերում ժողովրդի գլխին՝ ահավոր գնաճ, կյանքի որակի անկում, սերունդների ուսերին՝ պետական պարտքի՝ անպատկերացնելի աճող բեռ․․․

Բնականաբար, «իշխանությունն իր բարձրությունից» այս ամենը չի տեսնում, այն, ինչ իրենց պետք է՝ այդ են տեսնում, այդ են անում․․․

Իսկ այս պաշտոնյայի պատկերացրած հրապարակային /«Մեր կառավարությունն իր գործողություններում և հայտարարություններում հրապարակային է»՝ ասում է/ կառավարության նիստերի 44 հարցից միայն 4-ն է լինում զեկուցվող, այսինքն՝ հրապարակային, չզեկուցվողների մեջ էլ հույժ գաղտնիքներ են լինում։

Տեսած կա՞ք այսպիսի հրապարակայնություն․․․

Խորհուրդ՝ մեկ տարի առաջվա ընտրությունների հիշողությամբ պետք չէ ապրել, դուրս եկե՛ք փողոց, քայլեք ձեզ ընտրած քաղաքացիների կողքով, զրուցեք նրանց հետ․․․

Թե բա՝ «գործող իշխանությունը չի պատրաստվում մի փոքր խմբի ազդեցության տակ շեղվել իր ռազմավարությունից ու մարտավարությունից»։

Իյա, իրո՞ք․․․ ԱԺ-ում ու կառավարությունում՝ սև ու կարմիր բերետավորների թիկունքում թաքնվա՞ծ․․․

Աղբյուր` Փաստինֆո