Փաստ ինֆո

«Յուրաքանչյուր մարդ, անկախ իր մասնագիտական կոչումից, նամանավանդ, արվեստագետը, ինչպե՞ս կարող է ասել՝ ես զբաղված եմ, չեմ կարող գալ Ֆրանսիայի հրապարակ։ Ինչի՞ մասին է խոսքը …Սա է հիմա մեր բոլորի գլխավոր զբաղվածությունը։ Այսօր պետք է այստեղ զբաղված լինես, որ վաղը քո Հայրենիքում կարողանանս ազատ ստեղծագործես»,- Ֆրանսիայի հրապարակից ասում է դերասան Հրանտ Թոխատյանը՝ պատասխանելով «Փաստինֆո» լրատվականի հարցին։ Նշենք, որ այսօր դիմել էինք ստեղծագործական միություններից մեկի ղեկավարին՝ ցանկանալով պարզել նրա դիրքորոշումն Արցախի ու Հայաստանի ապագայի մասին, սակայն նա հայտարարել էր, թե Ֆրանսիայի հրապարակ չի գնում, զբաղված է ու հրաժարվել պատասխանել որեւէ հարցի։

Հ. Թոխատյանը մեզ հետ զրույցում նկատել է՝ կան բազմաթիվ երգեր, որոնք չեն լսում, գրված գրքեր կան, որոնք չեն կարդում և նկարված նկարներ, որոնք ոչ մեկ չի նայում։ Սրանք հենց այն մարդկանց «ստեղծագործություններն» են, որոնք, իրենց քաղաքացիական դիրքորոշմամբ, վերոհիշյալ խավին են պատկանել։ Ինչպես վերաբերում ես քո երկրին, այնպիսին քո ստեղծած արվեստն է, ասում է դերասանն ու հավելում. «Այդ մարդկանց ստեղծածի մեջ չկա հոգի, միտք չկա։ Եթե այսօր ինձ չի հետաքրքրում իմ երկրի ճակատագիրը, վաղը ես իրավունք չեմ ունենալու բեմ բարձրանամ ու հանդիսատեսի հետ խոսեմ այդ երկրի խնդիրների մասին»,- ասում է Թոխատյանը։

Անդրադառնալով հարցին, ինչո՞ւ է Նիկոլ Փաշինյանը հրաժարվել ընդունել պաշտոնական այցով Հայաստան ժամանած Փարիզի քաղաքապետին՝ ձախողելով, արդեն իսկ, ամրագրված պաշտոնական հանդիպումը (ըստ շրջանառվող վարկածի՝ Փաշինյանը վախեցել է Իլհամ Ալիևի հավանական արձագանքից, ով նախօրեին դատապարտել էր Փարիզի քաղաքապետի հանդիպումը՝ Արցախի նախագահ Արայիկ Հարությունյանի հետ ) Հրանտ Թոխատյանը պատասխանում է՝ եթե իր երկրի վարչապետը պետք է ընկճվի, թե ինչ արձագանք կլինի իր կատարած քայլերին ինչ – որ երկրի ղեկավարի կողմից, ուրեմն մենք լուրջ խնդիր ունենք. «Դուխով բառը մեր վրա չեկավ, չկա էդ դուխը. գլխարկը կա, դուխը չկա, այ սա է վատը»,- ամփոփելով զրույցն, ասում է դերասանը։

Մանրամասները՝ տեսանյութում։

Աղբյուր` Փաստինֆո