Փաստ ինֆո

ՀՀ գործող վարչախումբը չի պահանջել, որպեսզի ՀՀ ինքնիշխան տարածք ներխուժած ադրբեջանական զորքերը դուրս բերվեն ու վերադառնան իրենց ելման դիրքերը, որոնք զբաղեցրել են մինչեւ 2021թ-ի մայիսը, ու պատրաստ է հանդուրժել օկուպանտներին, քանի դեռ իրականացվում են սահմանազատման ու սահմանագծման աշխատանքները։ Համենայն դեպս «Փաստինֆո»-ի հարցմանն ի պատասխան ՀՀ փոխվարչապետ Մհեր Գրիգորյանը, որը ղեկավարում է նաև հայ-ադրբեջանական սահմանազատման և սահմանային անվտանգության հարցերով հանձնաժողովը,չի պնդել հակառակը։

Մասնավորահպես՝ «Փաստինֆո»-ն ապրիլի 24-ին գրավոր հարցում էր ուղարկել՝ ՀՀ փոխվարչապետ Մհեր Գրիգորյանից պարզելու՝ արդյո՞ք մինչև սահմանազատման և սահմանագծման աշխատանքների մեկնարկը հայկական կողմը նախապայման չի դնելու, որպեսզի ադրբեջանական զորքերը դուրս գան ՀՀ տարածքից: ՀՀ փոխվարչապետի գրասենյակը, սակայն, մեր հարցին չեն պատասխանել, ինչը հիմք է տալիս մեզ ենթադրելու,որ նման նախապայման հայկական կողմը առաջ չի քաշել:

Ավելին, Մհեր Գրիգորյանի գրասենյակից չեն պատասխանել նաև, թե արդյոք համաձայնություն կա, թե ո՞ր թվականի քարտեզով է իրականացվելու երկու երկրների միջեւ սահմանազատումը։ Կամ արդյո՞ք հայկական կողմը մտադիր է ձևավորել փորձագիտական խումբ, որը կարող է օգնել ՀՀ կառավարությանը՝ մեր շահերից բխող քարտեզների ընտրության հարցում:

Այս հարցերի պատասխանը եւս հանձնաժողովի նախագահը չի ունեցել։ Պատասխանել են միայն մեկ հարցի, թե որտեղ է տեղի ունենալու առաջին համատեղ նիստը, այն էլ դրա կայանալուց հետո՝ արձանագրելով, որ հանդիպումը կայացել է Նախիջեւանի հետ սահմանին։

Նշենք, որ հարցումն ուղարկել էինք նախքան հանձնաժողովի առաջին նիստի մասին հայտնի դառնալը,եւ անգամ այս հարցին պատասխանելու համար փոխվարչապետի գրասենյակին անհրաժեշտ էր խախտել օրենքը։ Նախ` խախտվել է հարցմանը պատասխանելու 5 օրյա ժամկետը, երկրորդ՝ երկու հարցի չեն պատասխանել՝ առանց որեւէ հիմնավորման, նեղություն չեն կրել անգամ նշել, թե ինչու է տեղեկատվության տրամադրումը մերժվում։

Աղբյուր` Փաստինֆո