Փաստ ինֆո

Հայաստանից Ռուսաստան ուղևորվող, Վրաստանում արգելափակված հարյուրավոր ֆուռերից 250-ը կարողացել են հատել սահմանը։ Համապատասխան պայմանավորվածությունը ձեռք է բերվել Վրաստանում Հայաստանի արտակարգ և լիազոր դեսպան Ռուբեն Սադոյանի և Վրաստանի արտգործնախարարի բանակցությունների արդյունքում։ Այդ մասին «Սպուտնիկ Արմենիա»-ին տված հարցազրույցում հայտնել է Վրաստանում Հայաստանի հյուպատոս Արեն Առաքելյանը։

Շուրջ մեկ ամիս առաջ Վրաստանի տարածքում՝ ռուս-վրացական սահմանին կուտակվել էին շուրջ 1200 բեռնատար մեքենաներ։ Անցած շաբաթվա ընթացքում այդ թիվը կրճատվել է 700-ով։

«Ներկա դրությամբ 370-ը դեռ չեն հատել սահմանը։ Նման ցուցանիշ անցած մեկուկես ամսվա ընթացքում չի եղել»,-Առաքելյանի խոսքը փոխանցում է գործակալությունը։

Հյուպատոսի խոսքով՝ Վրաստանի արտգործնախարարի հետ դեսպանի հանդիպմանը պայմանավորվածության է ձեռք բերվել մի քանի վարորդների նկատմամբ նշանակված տուգանքներն անօրիանական ճանաչելու մասին։ Բանն այն է, որ բեռնափոխադրողները Վրաստանի տարածքում անվճար կարող են մնալ ընդամենը 20 օր։ Այս ժամկետը սպառվելուց հետո յուրաքանչյուր օրվա համար նրանք ստիպված են վճարել 80 լարիի (մոտ 25 դոլար) չափով տուգանք։

Առաքելյանը պարզաբանել է, որ հիմա դեսպանությունը Վրաստանի ԱԳՆ-ի պաշտոնական հաստատմանն է սպասում։ Հյուպատոսը տուգանված վարորդներին հորդորում է դիմել իրենց, ներկայացնել լիազորագրերը, որից հետո դիվանագիտական ներկայացուցչության իրավաբանները կդիմեն գերատեսչություն՝ տուգանքները չեղարկելու համար։

«Դա հնարավոր է, քանի որ բեռնատարները Վրաստանի տարածքում մնացել են ոչ իրենց մեղքով»,-ասել է Առաքելյանը։

Նա կրկին հիշեցրել է Վրաստանում առաջացած կուտակումների պատճառը․ մայիսի 16-ից սկսած՝ ամենօրյա ռեժիմով Վրաստանից դեպի Ռուսաստան և հակառակ ուղղությամբ «Վերին Լարս» բազմակողմանի ավտոմոիբլային անցակետով անցել է 500 ուևորատար մեքենա։

Մյուս կողմից, ուկրաինական կոնֆլիկտի ֆոնին ավելացել է տրասնպորտային միջոցների թիվը, ավելացել է նաև դեպի Միջին Ասիա ուղևորվող բեռնատարների թիվը (նախկինում դրանք անցնում էին Բաքվով)։

«Սպուտնիկ Արմենիա»-ի հետ զրույցում Ռուսաստանում Հայաստանի դեսպանությանը կից մաքսային կցորդ Արա Թանանյանն էլ նշել է, որ կուտակումները պայմանավորված են նաև Լարսի անցակետի թողունակությամբ։

Ներկա դրությամբ մշակվում է հավելված, որի համաձայն՝ հայկական բեռնատարները տրանզիտով կանցնեն Լարսով, իսկ մաքսային ձևակերպումները կարվեն Վլադիկավկազի մաքսակետում։

Վլադիկավկազի մաքսակետին կից կլինի մաքսային ձևակերպման համար նախատեսված ընդհարձակ գոտի, ինչը թույլ կտա միանգամից անցկացնել ավելի քան 100 բեռնատար։

Աղբյուր` Փաստինֆո