Փաստ ինֆո

ՀՀԿ խոսնակ Էդուարդ Շարմազանովը հերքում է շրջանառվող լուրերը, թե ՀՀԿ-ն առաջարկել է դադար վերցնել բողոքի ակցիաների հետ կապված, քանի որ արդեն արդյունքներ են գրանցվել։ Լրագրողների հետ զրույցում Էդուարդ Շարմազանովը, անդրադառնալով շրջանառվող լուրերին, նշեց, որ դա ծիծաղելի, զավեշտալի, մտացածին, ֆեյք լուր է։

Նրա գնահատմամբ՝ մեկամսյա անհնազանդության պայքարը, տասնյակ հազարավոր քաղաքացիների միասնական, հայկականության, ազգային պետականություն ունենալու, հայկական Արցախ ունենալու պայքարն ընդդեմ նիկոլիզմի արդյունավետ է, արդյունքները տեսանելի են։

«Ինչպես ժողովուրդն է ասում՝ Նիկոլ Փաշինյանի իշխանությունը և անձամբ Փաշինյանը որպես քաղաքական արժեք դարձել է զրո, տասը կոպեկի արժեք չունի։ Վառ ապացույցն այն է, որ թաքնվում է ոստիկանական շարասյան թիկունքում, երբեմնի հեծանիվով շրջող ժողվարչապետը վախենում է ժողովրդի մեջ մտնել։ Նիկոլն իշխանություն չունի, Նիկոլին պաշտպանում է Չավուշօղլուն, Էրդողանը, Ալիևը, Բայրամովն ու մեկ էլ ՔՊ-ի իր որոշակի սաստավ և ուժային կառույցների մի մասը»,- ասաց նա։

Նրա խոսքով՝ ՀՀԿ-ն ի սկզբանե արձանագրել է «սրա» ազգակործան, հակապետական բնույթը ու ժողովրդի, քաղաքական, հասարակական գործընկերների հետ հանուն Հայաստանի ու հանուն Արցախի պայքարելը շարունակելու հարցում վճռական է։ Շարմազանովը՝ որպես ՀՀԿ ներկայացուցիչ վերահաստատեց, որ ՀՀԿ-ն պայքարել, պայքրարում և պայքարելու է ընդդեմ ազգակործան պատուհասության, ընդդեմ կապիտուլյանտի, ընդդեմ այս ազգակործան խունտայի։

«Մեկ անգամ չէ որ ասել ենք՝ կամ Հայաստանը կլինի, կամ կլինի նիկոլիզմը։ Հետևաբար նիկոլիզմը չի կարող հաղթել Հայաստանին ու Արցախին, նիկոլիզմը գնալու է, Հայաստանն ու Արցախը մնալու են»,- ասաց ՀՀԿ-ական գործիչը։

Շարմազանովը գտնում է, որ Ալիևը, Էրդողանը անհանգստացած են Հայաստանի ներքաղաքական գործընթացներով, որովհետև Ադրբեջանի ղեկավարությունը երազում էլ դժվար ունենար այնպիսի նվեր, ինչպես Փաշինյանն է և իր իշխանությունը։
«Փաշինյանը թուրքերի, ադրբեջանցիների համար նվեր է, Նիկոլը ներկայանցում է Ադրբեջանի ու Թուրքիայի քաղաքական օրակարգը, հետևաբար նրանք շահագրգռված չեն, որ այստեղ լինեն ազգային ուժեր»,- ասաց նա։

Աղբյուր` Փաստինֆո