Փաստ ինֆո

Ընդդիմությունը շատ ծանր կացության մեջ է, կներեք արտահայտությանս համար, իրենք մնացել են իրենց «պրիյոմի» տակ: Մենք իրենց թույլ ենք տալու մինչև վերջ մաշեցնել իրենց բոլոր հնարավորությունները: Խորհրդարանում լրագրողների հետ զրույցում հայտարարել է ԱԺ նախագահ Ալեն Սիմոնյանը՝ անդրադառնալով ընդդիմության ակցիաներին:

Ա.Սիմոնյանը հայտարարեց, թե ընդդիմության ակցիաները վերածվել են «մարդկանց նեռվայինացնելու, խցանումներ ստեղծելու մանյայի».

«Ժողովուրդն իրենց քվե է տվել, որ իրենք փողոցում լինե՞ն, բա ինչո՞ւ գործի չեն գալիս։ Իրենք իրենց թույլ են տալիս ասել, որ վարչապետը և այսօրվա իշխանությունը լեգիտիմությունը կորցրել են, բայց ակնհայտ է, որ լեգիտիմության խնդիր այսօր հենց իրենք ունեն, որովհետև իրենց 21 տոկոս քվե տված ժողովրդի նույնիսկ 2 տոկոսն իրենց չի աջակցում, փողոց դուրս չի գալիս»,-ասաց ԱԺ նախագահը և ներողություն խնդրեց ժողովրդից այն բանի համար, որ ընդդիմության գործողությունների հետևանքով խցանումների ականատես են լինում։

Լրագրողի հարցին՝ արդյո՞ք ժողովրդից ներողություն խնդրել են այն ամենի համար, «ինչ իրենց իշխանությունը բերել է ժողովրդի գլխին», Ալեն Սիմոնյանն ասաց, որ դրա համար ներողություն խնդրել են, պատերազմից հետո գնացել են արտահերթ ընտրությունների և հանձնվել են ժողովրդի դատին.

«Այն իշխանությունը, որը ժողովուրդը 2018 թվականին տվել է մեզ, մենք վերադարձրել ենք ժողովրդին, և ժողովուրդը նորից պատվիրակել է այնպիսի ընտրություններով, որը որևիցե մեկի մոտ կասկած չի առաջացրել»,- ասաց Սիմոնյանը։

Անդրադառնալով ընդդիմության հունիսի 3-ի նախաձեռնած ԱԺ արտահերթ նիստին չմասնակցելու իշխանության որոշմանը, Ալեն Սիմոնյանը կարծում է, որ այդ նախաձեռնությունը ևս մեկ հերթական փորձ է՝ իրավիճակից ինչ-որ ելք գտնելու.

«Հիմա փորձում են այդ «տուպիկից» ինչ-որ ելք գտնել։ Բայց ամեն անգամ իրենց երթերը, ցույցերը, ելույթները տեսնելով ու լսելով՝ ես ապշում եմ, թե ոնց կարելի է անընդմեջ ընդդիմության կողմից արված սխալների 20-30 տարվա ցիկլի մեջ մնալ»։

Անդրադառնալով ԱԺ փոխնախագահ Իշխան Սաղաթելյանի՝ ՔՊ-ականներին ուղղված հայտարարությանը, «տղա եք, եկեք մասնակցեք նիստին», Ալեն Սիմոնյանն ասաց․

«Իր մակարդակն է այդ հայտարարությունը, թող ինքը գար նախորդ նիստերին մասնակցեր, այլ ոչ թե միկրոֆոնը շուռ տար, անհասկանալի է՝ ինձնից է հեռու նստում, Ռուբինյանից, թե՞ ուզում է վարչապետին մոտիկ նստել։ Էդ հյուրանոցը, որ կառուցել էր Սևանի ափին, թող Շուշիում կառուցեր, Սեյրան Օհանյանի՝ ֆրանսիական ոճով առանձնատունը թող Ստեփանակերտում կառուցեին, թող Ագնեսա Խամոյանը Ցվետանա Պասկալևայի պես ծրագրեր անի Արցախի մասին»։

Ըստ Սիմոնյանի՝ այս իշխանության կողմից աննախադեպ ծրագրեր են իրականացվում Արցախի համար, և Արցախը փրկում են ոչ թե կենտրոնով շրջապտույտներ ու սելֆիներ անելով, այլ փրկում են գործով»։

Աղբյուր` Փաստինֆո