Փաստ ինֆո

Զոհված զինծառայողների ծնողները պահանջում են Նիկոլ Փաշինյանի կողմից առերևույթ պետական դավաճանություն կատարելու դեպքի առթիվ քրեական գործ հարուցելու պահանջով բողոքը քննել հրապարակային՝ դռնբաց նիստում և թույլատրել ծնողների մասնակցությունը՝ դատավարությանը։ «Փաստինֆո»-ի թղթակցի հաղորդմամբ՝ Վերաքննիչ քրեական դատարանում՝ դատավոր Կարեն Բիշարյանի նախագահությամբ, այսօր դռնփակ ռեժիմով կայացել է դատական նիստը, որը, սակայն, երկար չի տևել՝ ընդամենը 30 րոպե, քանի որ նախագահողն ունեցել է նշանակված մեկ այլ դատական նիստ, ընդ որում, նախապես նշանակված դատական նիստի մասին դատարանը հայտնել է դրա մեկնարկից հետո, երբ ավարտին մնացել էր միայն 15-20 րոպե։

Ինչպես արդեն տեղեկացրել ենք՝ դատական նիստերը դռնփակ անցկացնելու մասին դատարանը որոշում էր կայացրել նախորդ դատական նիստում, երբ իրավիճակը կրկին լարվել էր։ Մասնավորապես, դատարանում քննարկվում էր զոհված, անհետ կորած զինծառայողների ծնողներին որպես շահագրգիռ կողմ ներգրավելու մասին՝ Արծվիկ Մինասյանի և Հակոբ Մարտիրոսյանի կողմից ներկայացված միջնորդությունը, որի ընթացքում զոհված և անհետ կորած զինծառայողների հարազատ Արսեն Ղուկասյանը տեղից հայտարարությամբ հանդես եկավ։ Դատարանը՝ նախ նկատողություն տվեց, հետո՝ դատական սանկցիա կիրառեց Ղուկասյանի նկատմամբ՝ դատական նիստերի դահլիճից հեռացման տեսքով, սակայն Ղուկասյանը հրաժարվեց դուրս գալ նիստերի դահլիճից, արդյունքում՝ վիճաբանություն-քաշքշուկ սկսվեց դատական կարգադրիչների և ծնողների մի մասի միջև։

Այսօր կայացած դատական նիստի ընթացքում բողոքաբեր կողմը՝ Արծվիկ Մինասյանը և Հակոբ Մարտիրոսյանը բարձրաձայնել են՝ գործը դռնբաց ռեժիմով քննելու հարցը, թեև նախագահող դատավորը նախ նշել էր, որ պետք է ավարտել ավելի վաղ ներկայացված՝ զոհված զինծառայողների ծնողներին որպես շահագրգիռ կողմ ներգրավելու մասին միջնորդությունը, ապա՝ անցնել հաջորդ միջնորդությանը։ Բողոքաբեր կողմը փաստել է, որ հանրային գերակա շահով պայմանավորված՝ անհրաժեշտ է գործը քննել հրապարակային, հետևաբար, պնդում են, որ առաջնային պետք է քննարկել դա և հայտարարությամբ հանդես գալով միջնորդեցին գործը քննել դռնբաց ռեժիմով։

Բողոքաբեր կողմը գտնում է, որ նախորդ նիստում կայացված՝ գործը դռնփակ ռեժիմով քննելու որոշման արդյունքում խաթարվել է իրական արդարադատությունը, հանրային շահը, հասարակության տեղեկացվածության իրավունքը, թափանցիկության հիմնարար կանոնը։ Արդյունքում՝ ոչ զոհված զինծառայողների հարազատներին որպես շահագրգիռ կողմ ներգրավվելու, ոչ էլ՝ դռնբաց ռեժիմով գործը քննելու միջնորդությունների քննությունը չի ավարտվել, դատարանը հետաձգել է դատական նիստը՝ մինչև հունիսի 1-ը, ժամը՝ 12.30-ը։

Արծվիկ Մինասյանի գնահատմամբ՝ դատախազը և դատավորը տրամադրված չեն նիստը բաց, հրապարակային անցկացնելուն, քանի որ դատախազների խոսքում անթույլատրելի մեղադրանքներ էին հնչում՝ իբրև ականջահաճո հայտարարություններ են տրվում, մինչդեռ, արդարադատության շահը պահանջում է, որպեսզի այս բոլորին տրվեն պատասխաններ։

«Դատախազների կողմից առարկությունն առ այն, թե իբր հարազատները չեն կարող ներգրավվել որպես երրորդ անձ, քանի որ Քրդատ. Օր. -ում նման ընթացակարգ չկա, որովհետև մենք ունենք ՄԻԵԴ բազմաթիվ վճիռներ, ունենք նաև պրակտիկայում վճիռներ, երբ կոնվենցիոնալ իրավունքը հստակ ասում է՝ տուժողը՝ անկախ նրանից, թե պետական որ մարմինն է սխալ թույլ տվել, իսկ այս դեպքում սխալը եղել է ի սկզբանե, երբ քննչական մարմինները և դատախազությունը մեր հայրենակիցներին այն ժամանակ չեն ներգրավվել որպես տուժող, տուժողի իրավունքը չի կարող ոտնահարվել։ Անհրաժեշտ է, որպեսզի այն վերականգնվի, ապահովվի քննություն իրականացնող իրավասու մարմնի կողմից»,- նշեց Մինասյանը՝ հավելելով, որ հետևողական են լինելու։

Զոհված զինծառայողների հարազատները, որոնք ամբողջ ընթացքում դատարանի բակում սպասում էին՝ հույս ունենալով, որ իրենց ի վերջո թույլ կտան մուտք գործելու դատարան՝ մասնակցելու դատավարությանը, դժգոհություն հայտնեցին՝ ինչպես դատական նիստերը դռնփակ անցկացնելու, այնպես էլ ընդամենը 30 րոպե անցկացնելու հարցերի շուրջ, քանի որ ծնողների մի մասը գալիս է մարզերից։ Նրանք այդ հարցերի պատասխանը ստանալու համար հանդիպեցին ԲԴԽ նախագահի պաշտոնակատար Գագիկ Ջհանգիրյանին, սակայն, հոդաբաշխ պարզաբանումներ չեն ստացել։

Հիշեցնենք, որ նախկին դատախազ Հակոբ Մարտիրոսյանը և Արծվիկ Մինասյանը դեռևս 2021թ. հունիս ամսին ներկայացված հանցագործության մասին հաղորդման մասին է։ Մասնավորապես, նրանք հաղորդում էին ներկայացրել՝ պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։ Ներկայացված հանցագործության մասին հաղորդմամբ Հակոբ Մարտիրոսյանը ներկայացրել է փաստական հանգամանքներ, որոնք առերևույթ վկայում են Նիկոլ Փաշինյանի կողմից թշնամի պետությանն օգուտ տալու մասին՝ ի վնաս ՀՀ-ի։ Ներկայացված հանցագործության մասին հաղորդումն առանձին քննության առարկա չի դարձվել, մասնավորապես, դատախազությունը հաղորդումը «մասնատել» է և մի մասով ուղարկել է ԱԱԾ քննչական դեպարտամենտ՝ Շուշիի անկման և Արցախի հարավային ուղղությամբ կատարված իրադարձությունների վերաբերյալ քրեական գործի, իսկ մի մասով՝ ՀՔԾ-ում քննվող՝ Մովսես Հակոբյանի կողմից ասուլիսում արված հայտարարությունների առթիվ հարուցված քրեական գործի շրջանակներում։ Դատախազության կողմից հաղորդմանը պատշաճ կարգով ընթացք չտալու հանգամանքը դիտարկվել է որպես անգործություն և դատախազության անգործության դեմ փաստաբանը բողոք է ներկայացրել դատարան։ Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մերժել էր բողոքը։ Դատարանի այս որոշման դեմ վերաքննիչ բողոք է ներկայացվել, որը մակագրվել է Վերաքննիչ քրեական դատարանի դատավոր Կարեն Բիշարյանին։

Հեղինակ՝ Իզաբել Սահակյան

Աղբյուր` Փաստինֆո