Փաստ ինֆո

«Հայաստանի Հանրապետության Արտաքին գործերի նախարարությունը, հերթական անգամ, խոսում է թույլի դիրքերից։ Հայաստանի Հանրապետությունն, առհասարակ, իրեն պահում է որպես թույլ՝ բանակը չի կատարելագործում, չունի Գլխավոր Շտաբի պետը, որն, ըստ երևույթին, Ադրբեջանի նախագահ Ալիևի պահանջն է, ով հայտարարում էր, որ թույլ չի տա, որպեսզի Հայաստանի Հանրապետությունը վերականգնի իր բանակը,- «Փաստինֆո» լրատվականի հետ զրույցում ասել է քաղաքագետ Ստեփան Դանիելյանը՝ մեկնաբանելով նախօրեին ՀՀ Արտաքին գործերի նախարարության կողմից տարածված պաշտոնական հաղորդագրությունը։

Հիշեցնենք, որ երեկ ՀՀ ԱԳՆ-ն հայտարարություն էր տարածել՝ դատապարտելով մայիսի 28-ին ՀՀ սահմանագոտու հարավ-արևելյան ուղղությամբ Ադրբեջանի զինված ուժերի կողմից հրադադարի ռեժիմի կոպիտ խախտումը, որի հետևանքով զոհվել է ՀՀ ԶՈՒ զինծառայող, շարքային Դավիթ Վահանի Վարդանյանը։ Սիաժամանակ ՀՀ արտաքին գերատեսչությունը նշել է, թե նախկինում տեղի ունեցած նմանօրինակ սադրանքներն ու միջադեպերը, հրադադարի ռեժիմի պարբերական խախտումները հերթական անգամ հիմնավորում են Հայաստան-Ադրբեջան սահմանագծից զորքերի հայելային հետքաշման և սահմանագոտում դիտորդական առաքելություն տեղակայելու անհրաժեշտությունը, ինչի մասին հայկական կողմը բազմիցս բարձրաձայնել է:

Ստեփան Դանիելյանը նկատում է՝ օգտվելով Հայաստանի Հանրապետության իշխանությունների որդեգրած թույլ դիրքերից, Ադրբեջանը համապատասխան քաղաքականություն է վարում՝ փորձելով արագացնել Հայաստանի հետ փաստաթղթերի ստորագրումն ու սահմանագծման և սահմանազատման գործընթացը։ Հայաստանն էլ, իր հերթին, ըստ քաղաքագետի, փորձում է ժամանակ ձգել, ըստ երևույթին, սպասելով ուկրաինական դեպքերի զարգացման ընթացքին, նաև՝ համաշխարհային քաղաքականության փոփոխության տեմպերին։ Արդյունքում ունենք այն, ինչ ունենք՝ արդեն մոտ երկու տարի ձգվող պարբերաբար նկատվող սահմանային լարումներ և ռազմական բախումներ, ինչպես նաև, որպես սրա հետևանք հանդիսացող՝ զոհեր։

Հարցին՝ որքա՞ն կարող է շարունակվել այս իրավիճակը, երբ մենք, ըստ էության, սահող պատերազմի մեջ ենք, տալով զոհեր, Ստեփան Դանիելյանը պատասխանել է՝ իրավիճակը կշարունակվի մնալ նույնն այնքան ժամանակ, քանի դեռ մենք թույլ քաղաքականություն ենք վարում՝ պատրաստ առանց լուրջ հակազդեցություն նախաձեռնելու, զոհեր տալու.«Գործող պրոցեսն արագացնելու համար, ամեն անգամ, Ադրբեջանը կամ տարածք է բռնազավթում, կամ զինծառայող է սպանում, Հայաստանն, իր հերթին, չի դիմադրում, ամեն անգամ կրկնելով, որ պատրաստ է արագացնել պրոցեսներն, այսինքն, այսպիսով, ընդունում է ադրբեջանական կողմի որդեգրած դատապարտելի վարքը՝ հայաստանյան կողմի նկատմամբ։ Իրավիճակը կշարունակի նույնությամբ մնալ այնքան ժամանակ, քանի դեռ մենք ունենք զինվորներ, որոնց պատրաստ ենք առանց դիմադրության զոհելու՝ Ադրբեջանի ռազմական արկածախնդրությունների դիմաց, իսկ զինվորներ, մենք դեռ ունենք…», - ցավալիորեն արձանագրել է քաղաքագետը։

Անդրադառնալով Լեհաստանում ՀՀ նախկին դեսպան Էդգար Ղազարյանի հայտարարությանն առ այն, որ եթե այս շաբաթ հայ ադրբեջանական սահմանազատող հանձնախմբին հաջողվի ռուսական կողմից վերցնել համապատասխան քարտեզները, ապա հենց այս շաբաթվանից սկսած, հայկական կողմի համար կարող է, այլևս, անհնարին դառնալ մուտք գործել Արցախ, մեկնաբանելով, որ ըստ էության, այսպիսով, կփակվի Հայաստանից դեպի Արցախ տանող այս պահի միակ հասանելի՝ Բերձորի ճանապարհը, որը թույլ չտալու համար, սահմանազատող խմբի հայաստանյան կողմի անդամները պետք է անհապաղ կերպով հրաժարականներ ներկայացնեն՝ զերծ մնալու համար այս ողբերգական զարգացումներից, Ստեփան Դանիելյանը պատասխանում է՝ որպեսզի վերոհիշյալ զարգացումները տեղի չունենան, անհրաժեշտ է ոչ միայն սահմանազատող խմբի հայաստանյան ներկայացուցիչների հրաժարականներն, այլև՝ ողջ Կառավարության հրաժարականը։ Օրվա իշխանությունը, ամբողջ կազմով, պետք է անհապաղ կերպով վայր դնի լիազորություններն ու հեռանա, թույլ չտալով Հայաստանի Հանրապետության և Արցախի համար կործանարար զարգացումների այս ընթացքը, ընդգծել է Ստեփան Դանիելյանը։

Աղբյուր` Փաստինֆո