Փաստ ինֆո

Գործողությունների այն տրամաբանությունը, որը որդեգրել է այս իշխանությունը ադեկվատ չէ. ոչ թե հայելային հետքաշման հարց պետք է լինի, այլ՝ օկուպանտներին մեր տարածքից դուրս շպրտելու հարց: Ի՞նչ է նշանակում հայելային հետքաշում, եթե իրենք չեն կարողանում օկուպանտներին դուրս շպրտել, ի՞նչ են առաջարկում, մեր զորքերը մեր տարածքից հետ քաշվե՞ն: Այս մասին «Փաստինֆո»-ի հետ զրույցում ասել է ԲՀԿ անդամ Արման Աբովյանը՝ անդրադառնալով ՀՀ ԱԳՆ երեկվա հայտարարությանը, թե «հրադադարի ռեժիմի խախտումները հիմնավորում են զորքերի հայելային հետքաշման և սահմանագոտում դիտորդական առաքելություն տեղակայելու անհրաժեշտությունը»,-ասաց Աբովյանը:

Գործչի արձանագրմամբ՝ հայելային հետքաշումը նշանակում է միայն մեկ բան, որ այդ տարածքները փաստացի ընդունվելու են որպես վիճելի.

«Հարց՝ ՀՀ իշխանությունները Հայաստանի սահմանագիծը վիճելի՞ են համարում, սա տարրական խնդիր է, միակ լուծումը օկուպանտներին մեր տարածքից դուրս շպրտելն է և ռազմադիվանագիտական այնպիսի միջավայրի ստեղծումն է, որ մեր կողմ վախենան անգամ նայել, ոչ թե խաղաղության դարաշրջան խաղալով՝ խրախուսեն թշնամու մշտական սադրանքները»,-ասաց Աբովյանը:

Դիտարկմանը, թե արդյո՞ք ԱԳՆ այս հայտարարությունը չի նշանակում, որ ՀՀ իշխանությունները մտադիր են ԵՄ-ի հովանու ներքո այլ դիտորդական առաքելություն բերել Հայաստան, ԱԺ նախկին պատգամավորն արձագանքեց.

«Ցավոք, ես ինչպես հասկանում եմ, ՀՀ իշխանությունները վաղուց ոչինչ չեն որոշում, ոչինչ չեմ բացառում, բայց եթե իրենք խաղաղապահների ինչ-որ առաքելության մասին են խոսում, ապա ի՞նչն է խանգարում խաղաղապահական առաքելություն իրականացնող Ռուսաստանի հետ պայմանավորվել և բանակցել»,-ասաց Աբովյանը և հավելեց, որ դիտորդական առաքելության հարցը երկրորդական է, մեր սահմանը պետք է պաշտպանի ՀՀ բանակը:

Նշենք, որ տեղի ունեցող աշխարհաքաղաքական այս զարգացումների ֆոնին ընդդիմադիր «Հայաստան» և «Պատիվ ունեմ» խմբակցությունները «Հայ-ադրբեջանական և հայ-թուրքական հարաբերությունների կապակցությամբ» ԱԺ հայտարարության նախագիծ են հեղինակել, որը պետք է քննարկվի հունիսի 3-ի ԱԺ արտահերթ նիստում: ԱԺ փոխնախագահ Իշխան Սաղաթելյանը հայտարարել է, որ հունիսի 3-ը ջրբաժան է, քաղաքական բոլոր ուժերը պետք է կողմնորոշվեն և իրենց դիրքորոշումը հստակ հայտնեն իշխանությունների վարած քաղաքականության վերաբերյալ՝ միանալով ընդդիմության հայտարարությանը:

ԲՀԿ անդամ Արման Աբովյանից հետաքրքրվեցինք՝ ի՞նչ դիրքորոշում ունեն ընդդիմության նախագծի վերաբերյալ, արդյո՞ք կմիանան նախագծին.

«Ինձ համար զարմանալի է հարցի ձևակերպումը, բոլոր քաղաքական ուժերը և քաղաքացիները տեղյակ են, որ ԲՀԿ-ն սկզբունքորեն և միշտ հենվել է ազգային գաղափարների շուրջ, առ այն որ Արցախը երբեք և որևէ կարգավիճակով չի կարող լինել Ադրբեջանի կազմում, սա Արցախի և արցախահայության ոչնչացումը կլինի, այստեղ երկու կարծիք լինել չի կարող: Ամենայն հարգանքով բոլորի նկատմամբ, բայց մեր դիրքորոշումը երբեք կախված չի եղել այս կամ այն քաղաքական ուժի նախագծից:

Արցախի հանրապետություն կա և մնալու է հայկական և անկախ, վե՛րջ»,-եզրափակեց Աբովյանը:

Աղբյուր` Փաստինֆո