Փաստ ինֆո

Հայաստանի արտաքին քաղաքականության համար պատասխանատու գերատեսչությունը որևէ մեկնաբանություն չունի Եվրոպական խորհրդի նախագահ Շառլ Միշելի՝ բրյուսելյան եռակողմ հանդիպմանը հաջորդած տարակուսելի հայտարարությունների հետ կապված:

Հիշեցնենք, որ մայիսի 22-ին Բրյուսելում կայացած Ալիև-Փաշինյան-Միշել եռակողմ հայտարարությունից հետո Եվրոպական խորհրդի նախագահ Շառլ Միշելը հանդիպման արդյունքների վերաբերյալ ամփոփիչ հայտարարությամբ էր հանդես եկել՝ հայտնելով, որոշ ուշագրավ մտքեր։

Եվրոպացի գործիչը նշել էր, թե կողմերը համաձայնության են եկել տարանցման կարգավորման սկզբունքների վերաբերյալ՝ արեւմտյան Ադրբեջանի եւ Նախիջեւանի, Ադրբեջանի տարածքով՝ Հայաստանի տարբեր մասերի, ինչպես նաեւ երկու երկրների հաղորդակցության ենթակառուցվածքների միջոցով միջազգային բեռնափոխադրումների շուրջ։ Բացի այդ նա օգտագործել էր «Ղարաբաղի էթնիկ հայ բնակչություն» եզրույթը՝ նշելով, թե կողմերին ուղղակի ասել է, որ «անհրաժեշտ է ապահովել Ղարաբաղի էթնիկ հայ բնակչության իրավունքներն ու անվտանգությունը»։

«Փաստինֆո»-ն մայիսի 24-ին գրավոր հարցմամբ դիմել էր ԱԳՆ՝ մեկնաբանություն ստանալու Միշելի՝ վերը նշված հայտարարությունների կապակցությամբ: Մասնավորապես խնդրել էին պաշտոնական տեղեկատվություն, թե ՀՀ ո՞ր մասերը պետք է միմյանց հետ կապվեն Ադրբեջանի տարածքի միջոցով։ Արդյոք ԵՄ պաշտոնյան նախապես համաձանեցրել էր «Ղարաբաղի էթնիկ հայ բնակչություն» եզրույթի օգտագործելիս։ ԱԳՆ-ին խնդրել էինք տեղեկացնել նաեւ , թե «Խաղաղության պայմանագրի» շուրջ բանակցություններում Արցախի կարգավիճակի շուրջ բանակցություններ տեղի ունենալու են, թե ոչ։ Սակայն ԱԳՆ-ն չի պատասխանել նշված հարցերին եւ ի պատասխան գրավոր հարցման ուղարկել է ԱԺ-կառավարություն հարցուպատասխանի մայիսի 25-ի տեսագրության հղումը և հորդորել մեր հարցերի պատասխանները փնտրել Նիկոլ Փաշինյանի՝ ԱԺ-ում ունեցած ելույթում:

Իսկ այդ օրը ԱԺ-ում չեն հնչել մեր հարցերի սպառիչ պատասխանները։ Մասնավորապես՝ Փաշինյանը չի ասել, նախապես տեղյակ եղել է, թե ոչ, որ եվրոպացի պաշտոնյան հանդիպման արդյունքներով նման հայտարարությամբ է հանդես գալու։ Փոխարենը՝ նշել է, որ Բրյուսելում Լեռնային Ղարաբաղի հիմնախնդրի վերաբերյալ տեղի է ունեցել շատ լուրջ քննարկում։ Ասել կուզի՝ Հայաստանի ու Ադրբեջանի միջեւ դիվանագիտական հարաբերությունների հաստատելու բանակցություններին զուգահեռ ԵՄ ներքո հայ պաշտոնյաները մտադիր են կարգավորել նաեւ Ղարաբաղյան հիմնախնդիրը՝ հրաժարվելով ԵԱՀԿ-ից։ Քանի որ նույն օրը Արարատ Միրզոյանը, արձանագրելով ԵԱՀԿ Մինսկի խմբի աշխատանքների փաստացի սառեցումը, հայտարարել էր, որ Հայաստանը
չի կարող թույլ տալ վակուումի առաջացումը եւ ողջունում ենք Եվրամիության ջանքերը։ Այսինքն՝ Հայաստանը ողջունում է այն ԵՄ-ի ջանքերը, որի պաշտոնյան չի խոսում Արցախի ինքնորոշման մասին եւ օգտագործում «Ղարաբաղի էթնիկ հայ բնակչություն» եզրույթը։

Աղբյուր` Փաստինֆո