Փաստ ինֆո

Նիկոլ Փաշինյանին ձերբակալելու մասին միջնորդությունը մերժելու և նրան որպես մեղադրյալ ներգրավելու միջնորդության լուծումը հետաձգելու որոշումների դեմ բողոք է ներկայացվել դատարան։ Այս մասին «Փաստինֆո»-ն տեղեկանում է զոհված զինծառայողների ծնողների ներկայացուցիչ, փաստաբան Վահան Հովհաննիսյանից։

Ինչպես արդեն տեղեկացրել ենք՝ զոհված զինծառայողների հարազատները օրեր շարունակ բողոքի ակցիաներ են իրականացրել ՀՀ գլխավոր դատախազության շենքի մոտ։ Ծնողները պահանջում էին անհապաղ ձերբակալել և որպես մեղադրյալ ներգրավել Նիկոլ Փաշինյանին։ Նման պահանջ ծնողների կողմից ներկայացվել է ԱԺ-ում Նիկոլ Փաշինյանի աղմկահարույց հայտարարությունից հետո, որ կարող էր պատերազմը կանխել, ինչի արդյունքում կունենայինք նույն այսօրվա վիճակը, բայց՝ առանց զոհերի։

Փաշինյանին որպես մեղադրյալ ներգրավելու մասին առաջին միջնորդության լուծումը Հակակոռուպցիոն կոմիտեն հետաձգել էր, իսկ այն բանից հետո, երբ դատախազությունը փաստել է ՀԿԿ անգործությունը՝ Մովսես Հակոբյանի հայտարարությունների հիման վրա հարուցված քրեական գործով, որի շրջանակներում քննության առարկա են դարձվել Նիկոլ Փաշինյանի գործողություններին և պատերազմական հանցագործությունների վերաբերյալ ներկայացված մի շարք հաղորդումներ, գործը փոխանցել ՔԿ ԶՔԳՎ-ին՝ հետագա քննության համար, զոհված զինծառայողների ծնողներին տրվել է տուժողի իրավահաջորդի ներկայացուցչի կարգավիճակ։

Ծնողների ներկայացուցիչը միջնորդություն է ներկայացրել՝ Նիկոլ Փաշինյանին անհապաղ ձերբակալելու, ինչպես նաև՝ որպես մեղադրյալ ներգրավելու մասին, սակայն դատախազությունը մերժել է ձերբակալման միջնորդությունը, իսկ ՔԿ-ն էլ հետաձգել է մեղադրյալ ներգրավելու միջնորդության լուծումը հետաձգել է։

Այժմ փաստաբանը վիճարկում է իրավապահ մարմինների անգործությունը և դատական կարգով պահանջում վերացնել որոշումները՝ պարտավորեցնելով ձերբակալել և որպես մեղադրյալ ներգրավել Նիկոլ Փաշինյանին։

Անդրադառնալով ձերբակալման միջնորդությունը մերժելու հիմքերին՝ փաստաբան Վահան Հովհաննիսյանը «Փաստինֆո»-ի հետ զրույցում նշեց, որ դիտարկվել է մի քանի հանգամանք։
«Դիտարկվել է, որ անձինք չեն հանդիսանում ականատես, մինչդեռ 129-րդ հոդվածը նշում է ականատես տերմինը։ Մենք նշել ենք, որ կա վկա, որն ականատես չէ, բայց ցանկացած ականատես վկա է։ Ընդ որում, այդ անձինք ականատես և ականջալուր են եղել և՛ Փաշինյանի հայտարարությանը, և՛ 44-օրյա պատերազմի ամբողջ ընթացքին, իսկ պատերազմի ամբողջ ընթացքը ենթադրաբար Նիկոլ Փաշինյանի հանցավոր գործողությունների արդյունքում են իրականացվել, հետևաբար, նրանք նաև ականատես են։ Հաջորդ հանգամանքն, այն է` նշվում, թե մեր կողմից ներկայացված փաստերը դեռևս ստուգման փուլում են գտնվում և պետք է դրանք ստուգելուց հետո միայն գնահատական տրվի, սակայն այդ մասով ևս հայտնել ենք մեր անհամաձայնությունը, որովհետև կոնկրետ մի քանի դրվագներով արդեն իսկ փաստարկված է նրա կողմից գոնե առերևույթ հանցագործությունների կատարումը և մնացած բոլոր հանգամանքները կարող են պարզվել նաև քննության ընթացքում»,- նշեց Վահան Հովհաննիսյանը՝ հավելելով. «Մասնավորապես, նոյեմբերի 9 հայտարարությունից հետո Սյունիքի մարզի դիրքերից հետքաշվելը և Սյունիքի մարզի տարածքները թշնամուն հանձնելը, որի համար որևէ լիազորություն՝ ոչ Սահմանադրությամբ, ո՛չ ներպետական օրենսդրությամբ սահմանված Նիկոլ Փաշինյանը չի ունեցել, ապրիլի 13-ի հայտարարությունը, երբ հայտարարեց, որ կարող էինք ունենալ նույն իրավիճակը, բայց՝ առանց զոհերի։ Պարզաբանման ենթակա հանգամանքներ այստեղ չկան, ամեն ինչ այստեղ պարզ է»։
Հովհաննիսյանը գտնում է, որ Նիկոլ Փաշինյանի ձերբակալումն անհրաժեշտ է՝ նրա հետագա հանցավոր՝ տարածքային ամբողջականության դեմ ուղղված գործունեությունը կանխարգելելու նպատակով, մասնավորապես, անկլավների հանձնումը կանխարգելելու նպատակով, քանի որ Փաշինյանն իր հայտարարություններում նշել է, որ ՀՀ-ում առկա են անկլավներ, մինչդեռ, դե ֆակտո և դե յուրե ՀՀ-ում անկլավներ չկան։

Դիտարկմանը, որ Մովսես Հակոբյանի հայտարարությունների հիման վրա հարուցված քրեական գործն արդեն 1.5 տարի է, ինչ քննվում է, սակայն բազմադրվագ գործի որևէ դրվագով որևէ անձի, այդ թվում՝ Նիկոլ Փաշինյանին մեղադրանք առաջադրված չէ ՝ Վահան Հովհաննիսյանն արձագանքեց՝ նշելով, որ նմանատիպ հանգամանքներում, եթե գործը վերաբերեր այլ անձի, այլ ոչ՝ Նիկոլ Փաշինյանին՝ վաղուց կունենայինք մեկից ավել մեղադրյալներ, ընդ որում՝ խափանման միջոց կալանավորումներով։

«Երբ խոսքը վերաբերում է Նիկոլ Փաշինյանին, այդ նույն վերաբերմունքը չենք տեսնում։ Ակնհայտ խտրական վերաբերմունք կա։ Ընդ որում, գործում կան դրվագներ, որոնց համար քննություն իրականացնել պետք չէ։ Օրինակ, երբ անձը սպանություն է կատարում, որը նախատեսված է ՔՕ-ով, էլ ի՞նչ լրացուցիչ հանգամանքներ են պետք՝ անձին ձերբակալելու և մեղադրանք առաջադրելու համար։ Նոյեմբերի 9-ից հետո Նիկոլ Փաշինյանը չունի որևէ սահմանադրական կամ այլ օրենքով նախատեսված լիազորություն՝ միանձնյա, բանավոր համաձայնությամբ հիշյալ տարածքներն Ադրբեջանին հանձնելու։ Այստեղ քննելու ոչինչ չկա, էլ ինչ կա պարզաբանելու»,- նշեց Վահան Հովհաննիսյանը։

Հարցին՝ արդյո՞ք դատախազությունն ինչ-որ չափով կոմպրոմատներ է հավաքում՝ Նիկոլ Փաշինյանի դեմ՝ հետագայում օգտագործելու համար, Վահան Հովհաննիսյանը պատասխանեց. «Մենք ինքներս դրա վերաբերյալ ենթադրություններ ունենք, որ, հավանաբար, այդպես է։ Ավելի բարենպաստ վիճակում՝ ավելի բարենպաստ ժամանակ օգտագործելու համար»։

Հեղինակ՝ Իզաբել Սահակյան

Աղբյուր` Փաստինֆո