Փաստ ինֆո

ԱԱԾ հանցագործության մասին հաղորդում է ներկայացվել՝ ոստիկանության ծառայողների կողմից պահեստազորի գնդապետին ծեծի ենթարկելու դեպքի առթիվ քրեական գործ հարուցելու պահանջով։ Փաստաբան Վլադիմիր Զաքարյանը լրագրողների հետ զրույցում հայտնեց, որ պահանջում են քրեական գործ հարուցել պաշտոնեական լիազորությունները չարաշահելու, լիազորություններն անցնելու, ինչպես նաև՝ խոշտանգման հատկանիշներով։ 

Հիշեցնենք, որ մայիսի 8-ին առավոտյան ոստիկանության ծառայողները՝ կամիր բերետավորները, բռնություն են գործադրել պահեստազորի գնդապետ Արայիկ Մուրադյանի նկատմամբ, երբ վերջինս, ականատես լինելով, որ ոստիկանները բերման են ենթարկել զոհված զինծառայողի հորը, պատերազմի մասնակցի, մոտեցել է ոստիկաններին ու խնդրել՝ իջեցնել տղամարդուն ոստիկանական մեքենայից, զոհվածի ծնող է, ինչին ի պատասխան ոստիկաններն ասել են՝ «գնա այստեղից, արա» ։

«Ասացի՝ արա չի, դիմացդ գնդապետ է կանգնած, ասացին՝ մենք էլ գնդապետ չգիտեմ ինչ անող ենք, հետո ասացին՝ սրան տարեք։ Ասացի՝ սրան չէ, մի քիչ նորմալ պահեք ձեզ, սա ինչ դրսևորումներ է։ Ուղղակի մայթով ինձ համար քայլում է, տեսա, որ զինակից ընկերս է, զոհվածի ծնող է։ Եկան, քաշքշեցին, ասացի՝ մեկ րոպե, կբացատրեք, թե ինչու եք տանում, ինչ արարք եմ արել, որ տանում եք, մայթի վրա կանգնած եմ։ Սկսեցին խփելը, հետո վերցրին մեշոկի նման շպրտեցին ավտոեմեքենան, մարմնական վնասվածքներ ստացա, մոտ մի հինգ րոպե երևի գետնի վրա խփում էին անընդհատ։ Ասացի՝ մի խփեք, դուք հո հիմար չեք, դուք եք կարգուկանոն պահողը, թե կարգուկանոն խախտողն եք։

Այդպես տարան ոստիկանական բաժանմունք, մի քանի ժամ հետո՝ բաց թողեցին»,- պատմել է գնդապետ Մուրադյանը՝ հայտնելով, որ վնասվածքներ է ստացել։

Ի դեպ, առ այս պահը քրեական գործ չի հարուցվել ոստիկանության ծառայողների նկատմամբ, որոնք բռնություն են գործադրել սպայի նկատմամբ, որևէ ոստիկանի լիազորություն չի դադարեցվել, իսկ ծառայողական քննության մասին հայտնի է դարձել միայն այսօր։

Աղբյուր` Փաստինֆո