Փաստ ինֆո

«Պայքարները շատ տարբեր են լինում։ Երևի, մարդիկ չեն հիշում, որ, նույնիսկ, 88-ի պայքարը 2.5 տարի տևեց։ Պայքարը կարող է լինել մեկ շաբաթ, 3 ամիս, 2 տարի և այլն։

Հետևաբար, այն, ինչ կատարվում է մեր երկրի փողոցներում՝ վերջին ամիսների ընթացքում, նույնպես, պայքար է և ունի իր տրամաբանությունն ու շարժվում է այդ տրամաբանության ուղեծրում»,- «Փաստինֆո» լրատվականի հետ զրույցում ասում է քաղտեխնոլոգ Կարեն Քոչարյանը և միաժամանակ հավելում՝ երբեք որևէ կանխատեսում չի կատարել, հիմա նույնպես չի պատրաստվում կանխատեսում անել՝ թե ի՞նչ կլինի ապագայում «Դիմադրության» շարժման հետ։

Փոխարենը, Կարեն Քոչարյանը նկատում է՝անգամ, եթե, հազարներով մարդիկ ողողեն քաղաքի փողոցներն ու օրեր շարունակ վանկարկեն՝ «Նիկոլ հեռացիր», միայն այդքանով Նիկոլ Փաշինյանը չի հեռանալու։ Պայքարի ընթացքում այս կամ այն փոփոխությունները կախված են լինում իրավիճակներից, որոնք պետք է կարողանալ ճիշտ օգտագործել։

Հարցին՝ ի՞նչ իրավիճակ պետք է փոփոխվի, որպեսզի պայքարի ընթացքը մի փուլից անցնի մյուսին, Կարեն Քոչարյանը պատասխանում է կտրուկ՝ այդ հարցի պատասխանն ինքը չունի։

Համեմատելով նախկին՝ 2018 թվականին տեղի ունեցած պայքարի մեթոդներն այսօրվա ընդդիմության որդեգրած գործելաոճի հետ, Կարեն Քոչարյանը պարզաբանում է՝ ինչպես ավելի վերևում նշվեց՝ իրավիճակները տարբեր են. «2018 թվականին օրվա իշխանությունները շատ ավելի թավշյա էին, միաժամանակ՝ այդ ժամանակաշրջանի փողոցային պայքարի ընթացքին խառնված էին նաև գեոքաղաքական ուժերը։ 2018 թվականի դեպքերին, ինչ -որ պահից սկսած, մարդկանց հոսքը փողոց նկատելիորեն կտրուկ աճ գրանցեց։ Իրավիճակներն էին տարբեր»,- ասում է քաղտեխնոլոգը։

Ամփոփելով զրույցը, բանախոսը նշում է ընդդիմության այն քայլերը, որոնք նա պետք է նախաձեռնի՝ պայքարի ընթացքն այս փուլում, ինչ – որ չափով, փոփոխության ենթարկելու համար.«Եթե ընդդիմությանը հաջողվի ավելի շատ մարդ հանել փողոց և կարգավորել հարաբերությունները միջազգային կառույցների հետ՝ պայքարում բեկում կմտնի»,- ասում է Կարեն Քոչարյանը

Աղբյուր` Փաստինֆո