Փաստ ինֆո

Պահեստազորի գնդապետներն այս պահին ԱԱԾ շենքի մոտ են՝ պահանջելով քրեական գործ հարուցել և պատասխանատվության ենթարկել ոստիկանության այն ծառայողներին, որոնք բռնություն են գործադրել գնդապետի նկատմամբ։ Պահեստազորի գնդապետ Արայիկ Մուրադյանը լրագրողների հետ զրույցում պատմեց, որ մայիսի 8-ի առավոտյան Պուշկինի փողոցում երկու որդիների հետ քայլում էր, տեսնելով, թե ինչպես են իր զինակից ընկերոջը, որը նաև զոհված զինծառայողի ծնող է, փորձում են բերման ենթարկել, ոստիկաններին խնդրել է՝ իջեցնել ոստիկանական մեքենայից, զոհվածի ծնող է, ինչին ի պատասխան ոստիկաններն ասել են՝ «գնա այստեղից, արա»։ 

«Ասացի՝ արա չի, դիմացդ գնդապետ է կանգնած, ասացին՝ մենք էլ գնդապետ չգիտեմ ինչ անող ենք, հետո ասացին՝ սրան տարեք։ Ասացի՝ սրան չէ, մի քիչ նորմալ պահեք ձեզ, սա ինչ դրսևորումներ է։ Ուղղակի մայթով ինձ համար քայլում է, տեսա, որ զինակից ընկերս է, զոհվածի ծնող է։ Եկան, քաշքշեցին, ասացի՝ մեկ րոպե, կբացատրեք, թե ինչու եք տանում, ինչ արարք եմ արել, որ տանում եք, մայթի վրա կանգնած եմ։ Սկսեցին խփելը, հետո վերցրին մեշոկի նման շպրտեցին ավտոեմեքենան, մարմնական վնասվածքներ ստացա, մոտ մի հինգ րոպե երևի գետնի վրա խփում էին անընդհատ։ Ասացի՝ մի խփեք, դուք հո հիմար չեք, դուք եք կարգուկանոն պահողը, թե կարգուկանոն խախտողն եք։ Այդպես տարան ոստիկանական բաժանմունք, մի քանի ժամ հետո՝ բաց թողեցին»,- նշեց Մուրադյանը՝ հայտնելով, որ վնասվածքներ է ստացել։

Մուրադյանը մտահոգություն հայտնեց, որ առ այս պահը պատշաճ քննություն չի կատարվել, խնդրել էին ծառայողական քննություն նշանակել և միայն այսօր իրեն հրավիրել են ոստիկանության ներքին անվտանգության վարչություն, հայտնել, որ ծառայողական քննություն է նշանակված։ Պահեստազորի սպաները, սակայն, պահանջել էին՝ դադարեցնել նշված ոստիկանների լիազորությունները, սակայն առ այսօր ոչ մի դադարեցում չի եղել։

Պահեստազորի սպաներն ԱԱԾ-ից և դատախազությունից պահանջում են քրեական գործ հարուցել ոստիկանության այն ծառայողների նկատմամբ, որոնք բռնություն են գործադրել սպայի նկատմամբ, ինչպես նաև՝ դադարեցնել նշված ոստիկանների լիազորությունները։

Աղբյուր` Փաստինֆո