Փաստ ինֆո

«Կառավարության նիստի հարգելի մասնակիցներ, սիրելի հայրենակիցներ՝ կարևոր լուր ունեմ ձեզ փոխանցելու,- Կառավարության նիստի մեկնարկին այսօր հայտարարել է Հայաստանի Հանրապետությունում վարչապետ աշխատող Նիկոլ Փաշինյանն ու հանդիսավոր կերպով ավետել,- 2022 թվականի մայիսի 25-ին, Երևանի ժամանակով 22:35-ին ԱՄՆ Կանավերել հրվանդանում գտնվող տիեզերակայանից, SpaceX ընկերության տիեզերանավով երկիր մոլորակի ուղեծիր է դուրս բերվել Հայաստանի Հանրապետության առաջին տիեզերական արբանյակը»։

Փաշինյանը ընդգծել է՝ սա տեղի է ունեցել հայկական պետական «ԳեոԿոսմոս» ՓԲԸ և իսպանական «Սատլանտիս» ընկերության համագործակցության արդյունքում և հավելել՝ տեղի ունեցածի նշանակությունը հնարավոր չէ գերագնահատել.«Սրանով Հայաստանի Հանրապետության թևակոխում է տիեզերական գործունեության դարաշրջան, և մենք հույս ունենք, որ այս ոլորտում մեր ունեցած հարուստ ավանդույթները կվերականգնվեն»։

Միաժամանակ, վարչապետ աշխատող անձը հատուկ կերպով կարևորել է երևույթի առաջիկա հավանական ձեռքբերումների հեռանկարը. «Մեր առաջնահերթ նպատակներից մեկը տիեզերական տեխնոլոգիաների տեղայնացումն է, ինչպես նաև՝ տիեզերական սարքերի արտադրության կազմավորումը՝ Հայաստանի Հանրապետությունում։ Առաջիկա տարվա ընթացքում Հայաստանի Հանրապետությունում կստեղծվի արբանյակի հաղորդիչ կայան, որի շուրջ մասնագետների գիտագործնական թիմ կձևավորվի։ Կառավարման կենտրոնի գլխավոր գործառույթներից է լինելու՝ արբանյակի կառավարումը և տիեզերալուսանկարների ստացումը։ Արբանյակների կողմից արված լուսանկարները կօգտագործվեն սահմանների հսկողության, արտակարգ իրավիճակների կանխարգելման և կառավարման, շրջական միջավայրի պահպանության, կլիմայական փոփոխությունների մոնիթորինգի, քաղաքաշինության, ճանապարհաշինության, երկրագիտության և այլ ոլորտներում»,- ասել է Փաշինյանը։

Աղբյուր` Փաստինֆո